Dit artikel is gesjreve (of begos) in 't Mestreechs . Laes hie wie v'r mit de versjillende saorte Limburgs omgaon.

Londe ( Ingels : London ) is de hoofstad vaan 't Vereineg Keuninkriek en ein vaan de groetste stei vaan Europa . De agglomeratie Londe, gevaange in de county Greater London , heet zeve miljoen inwoeners. 't Is zetel vaan de Britse regerende voors en vaan 't parlemint en de regering, e veurnaom financieel centrum en 'n veurnaom toeristische attractie. De stad weurt doorsnoje door de revier de Teems ( Thames ).

Indeiling [ bewirk | bron bewerke ]

't Graofsjap Greater London besteit oet de City of London en 32 London boroughs (aw stei, door Londe geannexeerd). Us begrip vaan neet allein Londe, meh ouch vaan 't centrum vaan Londe, strek ziech allewijl oet euver vaol mie es de City , jeh Westminster heet zjus de gebouwe die allewijl weure aongezeen es geziechbepalend voor Londe.

Historie [ bewirk | bron bewerke ]

Roond 't jaor 50 vestegde de Romeine ziech in de huidege city, boe ze 'n borg stiechde, Londinium . Allewel tot dao gein archeologisch of historisch bewies veur te vinde is nump me op groond vaan de naom (dee neet vaan Latiensen oorsprunk is) aon tot de stad awwer is es de Romeinse aonwezegheid in Groet-Brittannie .

In d'n Angelsaksischen tied woort eve boete de vesting e dorp, Lundewic , opgeriech, wat 't aajd Londe vervink. In de negende iew moot die vesting weer bewoend geraak zien. Willem de Verovereer vereuverd in 1066 Ingeland nao de slaag bij Hastings . Willem veel ouch Londe aon en woort in Westminster tot keuning gekroend en begint met de bouw vaan d'n tore vaan Londe . In d'n elfden iew greujde Londe en Westminster, zetel vaan de keuninge, aonein, boemet dit groet Londe de groetste en mechtegste stad vaan Ingeland woort. In d'n twelfden iew woort Londe ouch hoofstad vaan Ingeland, in plaots vaan Winchester .

Daonao greujde 't snel door. De stad woort zelfs zoe mechteg tot de keuning touwstumming nudeg heet om de stad binne te koume. In 1666 lag de Groete Stadsbrand vaan Londe de stad veur e good deil in de as, wat de greuj vaan de stad evels neet kos remme. In de 18e iew nump Londe de rol vaan financiele hoofspeuler euver vaan Amsterdam . Met de greujende riekdom vaan de kolonies in de Victoriaonsen tied en de industrieel umwenteling greujde 't inwoenertal gaw. In 't begin vaan de negentienden iew waor de stad de groetste op Eerd .

In d'n Twiede Wereldoorlog woort Londe behuurlek zwoer gebombardeerd door de Duitse Luftwaffe . 30.000 lui voonte d'n doed. In de twintegste iew raakde Londe beruch door zien miljeuprobleme met smog : (steinkole)rouk vermingk met nievel. Tege 't eind vaan die iew waor 't probleem door 't gebruuk vaan zuverder brandstoffe groetendeils opgelos. Op 2 september 1972 hiemelde heer eine vaan de bekindste Ingelstaolege sjrievers oets, J.R.R. Tolkien . In 2000 woort de umstreje meh populaire politicus Ken Livingstone tot borgemeister vaan Londe gekoze. Op 7 juni 2005 woort Londe 't doel vaan 'nen aonslaag vaan Al-Qaedah , dee veural op de 'Underground' ( oondergrondse ) geriech waor. In datzelfde jaor woort bepaold tot de stad in 2012 de Olympische Speule maag organisere. Daobij liet Londe stei wie Moskou , New York City , Madrid en Paries achter ziech.

Toerisme en bekinde gebouwe [ bewirk | bron bewerke ]

't Toeristisch "Iezere Rippertoir" besteit oongeveer hei-oet:

• De Londese Tower : iers paleis vaan de keuninge, later gevaangenis, allewijl es museum gebruuk;
• De Houses of Parliament , Westminster: Neo-gotische gebouwe boe-in 't Hoegerhoes en 't Liegerhoes vergadere;
• Westminster Abbey : gotische kerk, sinds iewe in gebruuk veur ceremonie;
• Buckingham Palace : 't woen- en werkpaleis vaan d'n Ingelse keuning (neet touwgenkelek);
• Saint Paul's Cathedral : classicistische kathedraal ;
• Hyde Park : Drokbezoch stadspark;
• Tower Bridge : negentiende-iewse brok euver de Teems;
• London Eye : e reuzeraad , opgeriech in 1999 .
• 30 St Mary Axe , bijgenaomd De komkommer (De Augurk) : 'ne wolkekrabber in de City of London, aofgeroond in 2004 .

Demografie [ bewirk | bron bewerke ]

Londe steit bekind veur zien vaol versjellende inwoeners. De versjeienheid is ouch e gevolg vaan de vaole kolonies die Ingeland heet gehad. De stad waor roond 1900 de groetste stad op eerd. Die positie naom New York City in 1925 euver. Op 't hoegtepunt, in 1939 had Londe mie es 8 mieljoen inwoeners. Daonao kroomp 't inwoenertal tot get minder es 7 mieljoen. Intosse greujt de populatie opnui tot bijnao 8 mieljoen (7.556.900 inwoeners 2007).

Economie [ bewirk | bron bewerke ]

Es stad heet Londe een vaan de groetste economiee op Eerd. Londe is good veur 20% vaan 't BNP vaan 't Vereineg Keuninkriek. Debie heet Londe 'n internationale effectebaors - de 'London Stock Exchange' - en is 't groetste deil vaan de media dao gevesteg, zoewie de BBC en gezette wie The Daily Telegraph en The Times .

Infrastructuur [ bewirk | bron bewerke ]

Londe steit al iewe bekind um zien drokke straote. 't Verkier steit daan ouch deks vas. Allewijl weurt 't verkier gedomineerd door de gekinde taxi's en (roej) bosse . Aander verkier weurt oet 't centrum geweerd met 'n tolheffing. 'n Aander gekind verveur is d'n oondergrondse , ouch wel bekind es 'the (London) Underground' of 'the Tube'.

Bekinde Londenere [ bewirk | bron bewerke ]

Gebore [ bewirk | bron bewerke ]

• 1343 (oong.) - Geoffrey Chaucer , bekind es groondlegker vaan Ingelse literatuur
• 1788 - George Gordon Byron , sjrijver en diechter
• 1791 - Michael Faraday , natuurkundege en chemicus
• 1795 - John Keats , diechter
• 1889 - Charlie Chaplin , acteur en filmregisseur
• 1899 - Alfred Hitchcock , rezjisseur
• 1912 - Alan Turing , wiskundege en informaticus
• 1955 - Tim Berners-Lee , bedinker vaan 't World Wide Web (WWW)
• 1957 - Sid Vicious , basgitaris vaan de Sex Pistols
• 1958 - Mark Mazower , historicus
• 1969 - Ed Miliband , politicus
• 1974 - Emilia Fox , actrice
• 1986 - Robert Pattinson , acteur
• 1988 - Adele Laurie Blue Adkins , zangeres

Gehiemeld [ bewirk | bron bewerke ]

• 1400 - Geoffrey Chaucer , bekind es groondlegker vaan Ingelse literatuur
• 1759 - Georg Friedrich Handel , Saksische componis
• 1883 - Karl Marx , Duitse filosoof, econoom, socioloog en groondlegker vaan marxisme
• 1939 - Sigmund Freud , neuroloog en groondlegker vaan de psychoanalyse
• 1965 - Winston Churchill , veurmaoleg premier
• 1970 - Jimi Hendrix , gitaris en zenger
• 1972 - J.R.R. Tolkien , filoloog en sjrijver
• 1994 - Karl Popper , Weense filosoof en weitesjapper
• 1999 - Stanley Kubrick , Amerikaanse regisseur