Martin Luther o Martin Luteru (Eisleben 10 noviembri de 1483 - Eisleben, 18 hebreru de 1546) hue un religiosu aleman , eniciaol la Reholma Protestanti.

Tuvu nacencia endrentu duna familia acomoda de campesinus. Estuvu a estudial filosofia en Erfurt i alogu estuvu nun conventu d'agustinus. Tamien estudio luengas crassicas i teologia. Conoceol de las condicionis de la elesia de la epoca, enicio el movimientu reholmaol en 1517 conas sus 95 tesis al tentu las endulgencias, ondi creticaba el gastaeru d'estas por parti la elesia. Condenas por Roma, nel Conciliu de Worms hue condenau al esiliu, pero el eletol de Sajonia le ofrecio protecion. Ali escrevio albondu obras ondi esponia la su tesi.

El pensaeru religiosu de Luteru recibi el nombri de Luteranismu. Se carateriza por consieral a la fe sola como unica holma de salvacion, sin que las guenas obras tuvieran valol angunu. El ombri no tien capacia pa eligil entre el bien i el mal, Dios es el que salva a los ombris a traves la gracia devina. Tamien es partidariu duna relacion mas pressonal cona Biblia, la parabra de Dios, i en la su libri enterpretacion. La Biblia agora se trauzira a la luenga vernacula. Amas, landea una elesia mas igualitaria i una liturgia ena que los fielis puean participal.