Un alicopteru es una aeronavi que es sustenta i propulsa pol unu o mas rotoris orizontalis, ca unu hormau pol dos o mas aspas. Los alicopterus estan crasificaus cumu aeronavis de alas giratorias, pa destinguilus delas aeronavis de ala fija, polque los alicopterus crean sustentacion con las palas que rotan alredeol dun eji vertical.

La prencipal ventaja delos alicopterus vieni da pol el rotol, que propolciona sustentacion sin que la aeronavi se esti desplazandu. Estu permiti realical despegues i aterricajis verticalis sin necesida de pista. Pol esta racon, los alicopterus se gastan a menudu en conas congestionas o aislas ondi los avionis nu puein despegal o aterrical. La sustentacion del rotol tamien hazi posibli que el alicopteru puei mantenelsi volandu en una cona de horma muchu mas eficienti dela que podria otra aeronavi VTOL (de despegue y aterricaji verticalis), i puei hazel tareas que una aeronavi de ala fija nu podria.

Comparau con otrus tipus de aeronavi cumu el avion , el alicopteru es muchu mas complehu, tien un mayol costu de habricacion, gastu i mantenimientu, es relativamenti lentu, tien menus autonomia de vuelu i menol capacida de carga. No obstanti, toas estas desventajas se ven compensas pol otras delas sus carateristicas, cumu la su gran maniobrabilida i la capacida de mantenelsi estaticu nel airi, giral sobri si mesmu, despegal i aterrical verticalmenti. Si nu se consideran aspetus talis cumu la posibilida de repostahi o las limitacionis de carga i de altol, un alicopteru puei viajal a qualquiel lugal i aterrical en qualquiel sitiu que tenga la suficienti superfici (dos vezis la ocupa pol el aparatu).