Dit artikel is gesjreve (of begos) in 't Mestreechs . Laes hie wie v'r mit de versjillende saorte Limburgs omgaon.

De vriedag is 'nen daag vaan de week . Vaanajds waor 't de zesde weekdaag, meh in de westerse werkweek is 't de vijfde.

Vriedag is verneump nao Frija /Frigge, 'n Germaanse godin die deks met Freyja weurt verwart daan wel geliekgesteld. D'n oersprunkeleke naom is Veneris dies in 't Latien en ?φροδ??τη? ?μ?ρα ( Aphrodites hemera ) in 't Aajdgrieks . Frija woort dus geliekgesteld met Venus . Dit is neet allein 'n religieus meh ouch 'n taolkundege interpretatie: zoewel venus es fr?ja beteikene 'leefde' ('t leste word is verwant aon vrije en vrund ). In feite is d'n daag neet direk nao de godin geneump, meh nao de planeet Venus . 't Astronomisch symbool vaan die planeet ( ♀ , ouch 't symbool vaan 't vrouwelek geslach) woort veural vreuger ouch es teike veur de vriedag gebruuk.

Vriedag moot vaan oersprunk 'ne geloksdaag zien gewees, umtot de godin en planeet Venus euver 't algemein gunstege associaties hobbe (leefde, vrei, meh ouch verleiing). Door christeleken invlood is 't evels in vaol culture 'nen oongeloksdaag gewore. Goje Vriedag weurt herdach es d'n daag boe-op Zjezeke aon 't kruus genegeld woort en dit is veur vaol lui d'n ierste associatie. Veural in de modernen tied is 't bijgeluif wiedverbreid geraak tot me moot oppasse veur Vriedag d'n Daartiende ; 'nen daag dee twie oongeloksbringers kruis en daorum bezunder oongelokkeg zouw zien. Op deen daag weure groete beslissinge wie trouwe of e hoes koupe significant minder genome. In de Roems-Kathelieke Kerk waor 't vaanajds 'ne vastendaag, noe nog (of entans tot veur kort) waor 't oonder kathelieke de gewoente op vriedag ves te ete.

In d'n islam is de vriedag de rosdaag en daag vaan 't gebed, wie dat in 't joededom de zaoterdag en in 't christendom de zondag is.

In de seculiere wereld heet de vriedag allewijl geunsteger associaties. Sinds me op de zaoterdag neet mie hoof te werke, begint op vriedag 't weekend . Op vaol bedrieve is de sfeer get losser. Sommege hantere de Casual Friday ; me hoof daan op vriedag neet in pak nao ketoer te koume.