E artikulo aki ta skirbi na papiamentu . Lo ta apresia si por mantene e artikulo aki na estilo di papiamentu .

Jurickson Profar

Pais di nashonalidat	Reino Hulandes
Country for sport	Korsou
Fecha di nasementu	20 februari 1993
Luga di nasementu	Willemstad
Ruman(nan)	Juremi Profar
Okupashon	pelotero
Posishon	shortstop , infielder
Miembro di tim of klup	Texas Rangers
Deporte	beisbol
Liga	Major League Baseball

Jurickson Barthelomeus Profar (☆ 20 di februari , 1993 na Willemstad ) ta un pelotero profeshonal di Korsou ku desde september 2023 ta hunga pa San Diego Padres den posishon di shortstop . Den Major League Baseball (MLB) el a hunga pa e ekiponan Texas Rangers, Oakland Athletics, San Diego Padres i Colorado Rockies.

Hubentut [ edita | edita fuente ]

Profar a partisipa den beisbol den Little League World Series na ana 2004 i 2005. Komo parti di e selekshon di e ekipo di Pabou Little League di Willemstad , Korsou , el a yuda gana e ekipo di Conejo Valley East Little League di Thousand Oaks, California pa nan titula kampion 2004. Ku e selekshon di 2005 el a bolbe logra yega final, pero e biaha aki nan a perde kontra di e ekipo di West Oahu Little League di Ewa Beach, Hawaii .

Karera profeshonal [ edita | edita fuente ]

Riba 2 di yuli, 2009, Profar a firma ku e ekipo di Texas Ranger. Otro ekiponan kier a firma Profar komo picher , pero e ekipo di Texas Rangers tabata e uniko ku kier a firme komo shortstop, su posishon preferi. El a pasa su prome temporada profeshonal huntu ku e ekipo di Spokane Indians. El a bati .250 ku 4 home run den 63 wega.

Prome ku e temporada di 2011, Baseball America a skohe Profar komo e di dos miho prospekto di e ekipo di Texas Rangers i e di 74 ente. El a hunga e temporada di 2011 ku e ekipo di Hickory Crawdads. El a wordu skohe komo representante di e ekipo di Texas Rangers den e All-Star Future Game di ana 2011. El a finalisa e temporada batiendo .286/.390/.493 ku 12 home run i a wordu nombra komo e South Atlantic League MVP. Tambe el a keda nombra e miho shortstop di e tim di Baseball America's Minor League All Star. El a keda nombra pa aparese den e All-Star Future Game di ana 2012.

Riba 31 di ougustus 2012, Texas Rangers a subi Profar riba nan roster di Grandes Liga i komo posibel hungado den "postseason". E ta e prome pelotero nase na 1993 ku ta hunga den liga grandi i aktualmente ta esun di mas yon tambe. Den su debut den liga grandi, Profar a kuminsa na segunda base na luga di Ian Kinsler, ku tabata for di wega pa leshon i den su prome turno na bate Profar a bati un home run di 388 pia na man di Zach McAllister. Den su segundo turno el a bati un doblete i bai di 2-4 pa e partido ei.

Profar a kuminsa e temporada di 2013 den e Triple-A Round Rock. Den mei 2013, Rangers a yama Profar na momentu ku mester a pone Kinsler riba e lista di hungado leshona. Den e wega di 26 di mei na Seattle , Profar a dal su di dos home run na man di Hisashi Iwakuma, picher di Seattle Mariners.

Na final di e temporada di 2013, Rangers a hasi un interkambio di Kinsler, kual a buta ku Profar a sigura e puesto di segunda base.

Profar a kuminsa e temporada di 2014 ribe e lista di hungadonan leshona di 60 dia i no tabata spera pa e regresa te medio juni. Riba 22 di mei, e organisashon di Rangers a anunsia ku Profar a bolbe leshona su brasa, kual a pone ku e lo mester a perde henter e temporada di ana 2014. Riba 23 di februari 2015, Profar a opera su brasa, kual a pone ku e lo perde henter e temporada di ana 2015.

Dia 21 di desember 2018, den un deal di tres ekipo Texas Rangers a negosha pa Profar pasa pa Oakland Athletics. Un ana despues Oakland Atletics ta pasa Profar pa San Diego Padres den kambio pa Austin Allen i un di dos pelotero of pa plaka. ^[1] Pa temporada di 2023 el a firma ku e ekipo Colorado Rockies di Denver , Colorado . ^[2] Na 1 di september 2023, Profar a firma un kontrakt di Liga Menor pa bolbe na e organisashon di San Diego Padres. Desde 8 di september el a wordu agrega e na e roster di Grandes Liga i a bira un agente liber despues di e temporada. Mirando su prestashon modera na 2023, San Diego Padres a disidi di ofrese Profar un kontrato di 'prove yourself' na februari 2024 pa un ana. ^[3]

Tim nashonal hulandes [ edita | edita fuente ]

Despues ku e ekipo nashonal hulandes a avansa pa semi final di e World Baseball Classic 2013, manager Hensley Meulens a pidi publikamente pa Profar por forma parti di e ekipo hulandes, ya ku Profar a nase na Korsou . E ekipo di Texas Rangers a duna Profar permit pa por partisipa komo miembro di e ekipo hulandes korto tempu despues di esaki.

Bida personal [ edita | edita fuente ]

Na 2012, e ekipo di Texas Rangers a firma Juremi Profar , ruman chiki di Jurickson.