Willemstad

Fecha di fundashon of kreashon	1634
Nomber duna di	William II, Prince of Orange
Pais	Korsou
Kapital di	Korsou
Situa na	Korsou
Koordinato geografiko	12°6′29″N 68°56′6″W
Twinned administrative body	Amsterdam , Paramaribo

E artikulo aki ta skirbi na papiamentu . Lo ta apresia si por mantene e artikulo aki na estilo di papiamentu .

Willemstad ta kapital i siudat mas grandi di Korsou . E tabata tambe e kapital di Antias Hulandes te ku e disolushon di esaki na oktober 2010. Willemstad ta konta ku un poblashon di mas o menos 125.000 habitante. E bahia di Santa Ana ta dividi Willemstad entre Punda i Otrobanda . For di 1886 e Koningin Emmabrug (e brug di ponton) ta konekta e dos barionan. Awendia mayoria trafiko ta pasa riba e Koningin Julianabrug .

Willemstad su arkitektura ta un meskla di varios estilo kolonial hulandes i spano i esaki a logra buta e siudat riba UNESCO su lista di herensia mundial .

Historia [ edita | edita fuente ]

E spanonan a deskubri Korsou na 1499 . Nan lo a yega dia 26 di yuli , dia di Santa Ana, lokual lo splika e origen di bahia di Santa Ana su nomber. Nan a disidi di establese nan mes na ana 1527 .

Na 1634 , despues di mas ku shen ana biba riba e isla, e spanonan a perde Korsou na e hulandesnan . Nan a yama e parti ost di bahia di Santa Ana De punt , na Papiamentu Punta , lokual a bira Punda. E ana despues, 1635 , nan a traha Fort Amsterdam pa defende e entrada di e haf natural. E ta e forti mas bieu ku West-Indische Compagnie tabata tin. E stat a desaroya ront di e forti. Na ana 1707 nan a disidi di establese un bario nobo na e parti west di e bahia di Santa Ana: Otrobanda. Esaki tabata mira komo e sentro kultural di e stat.

Riba 30 di mei 1969 , ananan di tenshon entre gruponan sosial i derechinan limita di trahadonan a resulta den un welga. Despues ku welguista nan a tende ku Wilson Godett , lider di sindikato Algemene Haven Unie , a hana bala, nan a sende Heerenstraat na kandela. Hulanda a manda 300 marinir pa restora orden na Korsou.

Ekonomia [ edita | edita fuente ]

E haf natural tabata e faktor prinsipal den e desaroyo di Willemstad. Ya den siglo 17 , Asiento tabata e sentro di negoshi di katibu . Hende tabata trese katibu di Afrika na Korsou pa despues nan bai varios destinashon den Sentro- i Sur Amerika .

Despues di abolishon di sklabitut, e ekonomia di Korsou a sufri basta. Hopi hende a emigra pa otro islanan den Karibe buskando trabou. Hopi di nan a hana trabou riba plantashinan di suku na Cuba . Ta te 1914 , ana ku Shell a establese un refineria nobo den Schottegat , e ekonomia a mehora. E refineria, miho konosi komo Isla , a ofrese hopi trabou, pa antianonan ku a emigra i pa straneronan di, entre otro, Karibe i Sur Amerika . Den e di Dos Guera Mundial e refineria tabata produsi kerosine pa bombarderonan merikano.

For di ananan 1960 Willemstad su ekonomia a kuminsa depende mas riba turismo.

Deporte [ edita | edita fuente ]

Beisbol tin un presensia fuerte na Willemstad. Hungado di MLB Andruw Jones (All-star), Jair Jurrjens (Atlanta Braves pitcher), i Wladimir Balentien (Cincinnati Reds outfielder) tur ta bini for di Willemstad. Pabao Little League a aparese den sinku Little League World Series , ganando na 2004. Na 2008, un entro tim di Pabao Little League a gana e Junior League World Series, despues ku nan a gana e region Latino Merikano, anto despues ganando e region Asia-Pasifiko anto Mexico su kampeonnan regional pa bira e kampeon internashonal, i despues nan a gana e U.S. champion (West Region), Hilo Merikano/LL Nashonal (Hilo, Hawaii), ku 5-2.

Galeria [ edita | edita fuente ]

Koningin Emmabrug
Zona historiko di Willemstad
Banco di Caribe
Zona historiko di Willemstad deklara pa UNESCO sitio di herensia mundial na 1997
Koningin Emmabrug na Willemstad
Koningin Emmabrug anochi
Edifisio Penha konstrui na Punda na 1708
Koningin Julianabrug