Inaki Egana (musikaria)

Inaki Egana (musikaria)
Bizitza
Jaiotza	Portugalete , 1948ko urriaren 24a (75 urte)
Herrialdea	Bizkaia , Euskal Herria
Hezkuntza
Hizkuntzak	gaztelania ; euskara
Jarduerak
Jarduerak	kantugilea eta bass guitarist (en)
Musika instrumentua	baxua

Artikulu hau musikariari buruzkoa da; beste esanahietarako, ikus ≪ Inaki Egana (argipena) ≫.

Inaki Egana Azpeitia ^[1] ( Portugalete , 1948ko urriaren 24a -) Euskal Herrian jaiotako musikaria da. 1960ko hamarkadatik hainbeste rock eta blues taldetan zein bakarlari baxu -jotzaile, kantari eta kantagile aritu da. Europa mailan erreferentzia eta mitikotzat jotzen dute. ^[2]

Biografia [ aldatu | aldatu iturburu kodea ]

Portugaleten jaio eta hiru urtetik Erromon bizi izan zen. ^[3] Familian musikazaletasuna zegoen eta aita Portugaleteko Danok Bat Otxotearen sortzaileetakoa izan zen; urte luzez otxote bereko zuzendari bere anaia ibili da. Anaia zenbait kanta ezagunen (adibidez Euskal Herri polita gora ) egilea da. Hamalau urterekin gitarra jotzen hasi zen eta bere lehen taldea Duo Danger izan zen, 1966an ; gero Los Tanidores taldean ibili zen. Bi talde hauek Bilboaldean kokatuta zeuden eta bigarrenak single bakarra atera zuen, Jose Maria Inigoren laguntzaz.

Hortik aurrera Madrilera jo zuen eta harrezkero musika izan zen bere ogibidea; Combination Five eta Los Snobsekin denbora laburraz aritu ostean 1968an Los Buenos blues rock taldean sartu zen; taldeak nahiko arrakasta lortu zuen estatu mailan eta lau single atera zituen. ^[4] Bere kideen artean John Mayall ezagunaren anaia, Rod Mayall teklatu jotzailea, zegoen. Ivan Zuluetaren Un, dos, tres, al escondite ingles ( 1969 ) filmaren musika ere egin zuten.

1970ean Los Brincos taldean ibilitako Fernando Arbex bateria jotzailea eta Oscar Lasprilla gitarra jotzailearekin Alacran osatu zuen; taldeak Santanaren ildo musikala -latindar rocka- jorratu zuen. Urte horietako espainiar estatuko musikan erreferentetzat jotzen den izen bereko diskoa atera zuten eta kasu honetan ere arrakasta erdietsi zuten. Lasprilla Ingalaterrara joan zenean Egana eta Arbexek Barrabas sortu zuten esperientziadun musikari batzuekin batera; ^[5] taldearekin Europan eta AEBetan arrakastatsuak izan ziren zenbait single plazaratu zituzten. Wild safari bere lehen albumaren azala Luis Eduardo Autek marraztu zuen.

1973an Eganak taldea utzi eta Los Bravosen aldi labur batez egon eta gero bakarlari lanean hasi zen; 1974an Karma izeneko hard rock albuma atera zuen Kiko Guerrero bateria jotzailearekin batera. Juan Camacho kantariaren lehen albumerako hitzak ere idatzi zituen. 1976an Egana eta Guerrerok Manuel Rodriguez gitarra jotzailearekin bat eginez Iman ^[6] taldea eratu zuten; 1970eko hamarkadaren amaieran Imanek album batzuk argitaratu zituen.

1982an Manuel Rodriguezek proposatuta Etiqueta Negra izeneko esperientzian parte hartu zuen. 1983an Egana Barrabasera itzuli zen Prohibido albuma grabatzeko; taldea berriro utzi eta Juan Pardorekin 1984tik 1992ra baxu jotzaile ibili zen. 1999an Dr Blues Band taldearekin hasi zen; gaur egun ere bertan aritzen da, ^[7] Iman eta Barrabasekin egiten duen lanarekin batera.

2009 - 2010ean Los Mitos taldearen itzuleran esku hartu zuen. Azken urteetan Bilboko Txurdinaga auzoa du bizitoki eta Indautxu Hotelean orkestra batekin aritzen da. 2011n Wild Safari Band izeneko proiektua sortu zuen. ^[8]