Als Barner Oberland bezeichned mu e Region im Kanton Barn . Si umfasst ds Haslital , d'Gagend ume Brienzersee und ume Thunersee , d'Litschinetaller, ds Tal von dr Chander , ds Sibetal (Simme) und ds Tal um Saane .

Geografii u Vercheer [ andere | Qualltaxt bearbeite ]

Im Barner Oberland het s en huufen Bach. Das Wasser geid alls i d Aara , wan ihri Quella im Haslital hed und wa nahr diren Brienzer- und Thunersee fliesst. Sidlich von dene Seenen gan mehreri Taller i d Barga uehi. Gag Norden het s o Taller, aber chlinderi. Us dene meh ol minder stotzigen Chrachen chemen aben die Bach. D Uusnahm ischt natirli ds Tal um Saane . Nid wils glaager wan, aber wil das Wasser en grossa Umwag macht, sogar d Statt Friburg umrunded, bis s den im Underland bin Gimmenen i d Aara fliesst. U dar Umwag heisst Saana oder Sarine, wie die Waltschen derzue sagen.

Gage Weschten ischt ds Barner Oberland offes, gag Norde, Oschte und Siiden isches vo heien Bargen umgahn. Dr Brinigpass verbindet ds Haslital mid Obwalden , dr Suschten fierd i ds Urnerland und d Grimsla i ds Wallis . D BLS verbindet Baren mit Thun , Chanderstag u diren Letschbarg mit dm Wallis. Ds Saaneland isch hingage mid der MOB gag Weschten verbunden. Da cha mu uf Montreux an Ganfersee fahren.

Ds Barner Oberland hed natirli o politisch Bezirka: Oberhasli , Inderlachen , Thun , Frutigen , Nider- un Obersimmetal u Saane .

Turismus [ andere | Qualltaxt bearbeite ]

Ds Barner Oberland ischt es wichtigs turistisches Gebiet vor Schwiiz mit en huffen bekannten Ferienorten wie Gstaad , Adelbode , Chanderstag , Beatebarg , Inderlachen , Grindelwald oder Wenge . Ds Landschaftsbild ischt einersiits lieblich um e Thuner- und Brienzersee un anderersiits stotzig un oben uus vegetationsfeindlich. Einmalig ischt halt die gwaltigi Culissa von heien Bargen, allne voraan Eiger , Mench und Jungfrou . En grossa Teil vom UNESCO Waltnaturerb Jungfrou-Aletsch-Bietschhoren, wan o dr Eschinesee derzue gheert, liit im Barner Oberland.

Das mu nid alls geng z Fuess mues erchlatteren, gits o en huffen Zahnradbahni, Luftseilbahni, Gondli u Sassellifta. Die bringen eim bequem uehi uf d Alpi u Barga. Zum Biispil uf ds Jungfroujoch, ds Brienzer Rothoren, ds Schilthoren oder die Schynigi Platta. Fir Bargstiiger gits o Uusaforderigi in allen Schwirigkeitsgraaden. Mu mues ja nid grad als erschts i d Eigernordwand istiigen u sech naher vom Helikopter la reichen.

Im Summer hed mu en huufen Wanderer, Biker oder Basejumper, wan die herrlichi Bargwalt chemen chon bewunderen. Dire Winter chemen den ender Schifahrer, Snowborder, Langleiffer, Schlittler, Schliifschueleifer, Ischchlatterer u settigs alls. Z Grindelwald natirli o d Gemelfahrer.

Dialakta [ andere | Qualltaxt bearbeite ]

Dialakta vom Barner Oberland gheeren zum Hegschtalemannischen . Typischi Merkmal fir die Sprachfamillia siin:

• d Extremverschiebig, wie triihe fur trinke ,
• ds Underlahn vor Hiatdiphthongierig, also schniie statt schneije ,
• Monophthongierig vo mittelhochditsch /ou/: gloobe statt gloube ,
• Diphthongierig vo langem /e/: Sea fur See
• Velarisierig vom /l/: [?a?d?] (Wald) statt wie Flachland-Barndiitsch [?awd?] (Waud)
• im Hasli- und in de Litschinetaller dr Erhalt vom /-n/ im Uusluut: singen statt singe

Im Barner Oberland hed jedes Tal u jedes Dorf eigeti Werter oder Betonigi.

E paar Links [ andere | Qualltaxt bearbeite ]

• Eppis Liedtegschta uf edimuster.ch - under anderem z'Grindelwaldlied u wiiter ahi uf dr Siiten o no z'Luuterbrunnelied