S' Africa de su Norti o Nordafrica est sa regione prus setentrionale de su cuntinente africanu . Segundu sa definitzione de is Natziones Unidas nde faghent parte ses istados:

• Algeria
• Egitu
• Libia
• Maroco
• Sudan
• Tunisia

A custos, segundu is bisuras benint azuntos fintzas:

• Chad
• Mali
• Mauritania
• Niger

Algeria, Maroco, Tunisia, Libia e fatuvatu sa Mauritania e su Sahara Otzidentale cumponent su Maghreb , intames Egitu e Sudan cumponent sa Badde de su Nilu (chi pigat numene de su frumene omonimu ).

S'Egitu est unu istadu transcuntinentale, sende chi sa penisula de su Sinai geograficamente est posta in Asia . S'Africa de su Norti contat fintzas is possidentzias ispagnolas de Ceuta , Melilla , duas exclaves chi s'agatant a cara de sa costera de su Maroco. Is isulas Canarias , chi faghent parte de s'Ispagna e is isulas de Madeira , chi sunt portughesas , a illargu de sa costera norti-otzidentale de s'Africa, sunt carchi bortas cunsideradas a partes de sa regione.

Culturalmente su Nordafrica s'iscerat de su restu de su cuntinente africanu, pro ite su desertu de su Sahara at fatu de barriera limitende is cuntatos cun is ateros populos chi bivent in a sud de su desertu. S'Africa de su norti est duncas istoricamente e antropologicamente prus custrinta a s' Oriente Mediu , in Asia e a s' Europa . S'influentzia islamica in s'area, nde faghet fintzas una parte significativa de su mundu arabu.