Dit artikel is gesjreve (of begos) in 't Mofers . Laes hie wie v'r mit de versjillende saorte Limburgs omgaon.

Dit artikel geitj euver 't apparaat zelf, veur 't abstrak begrip, zuuch: tillefonie .

d'n Tillefoean is e toestel womit gesprekke meugelik zeen tosse persoeane die zich boete gehuuerbereik van einanger bevinje. Veur e dergelik gesprek zeen minstes twiee tillefoeans nuuedig en e netwirk worop dees tillefoeans bei zeen aangeslaote.

Opboew [ bewirk | bron bewerke ]

E tillefoeantoestel kan de volgendje ongerdeile bevatte:

• 'ne Microfoon , deze zetj spraok om in lektriktrillinge.
• 'nen Tillefoean, det is 't ongerdeil det lektriktrillingen omzetj in geluid en det taengen 't oear wuuertj gehaje.

Bie e modern toestel bevinje de microfoon en tillefoean zich inne haore, ouch waal microtillefoean geneump. Wiejer guuef 't eindeilige toestelle wobie 't gans toestel 'ne haore is, wie ederen hendie .

• 'n Haokkontak worop de haore wuuertj gelag. Hiedoor wuuertj 't toestel oetgezatj en ane tillefoeancentraal gesignaleerdj det 't toestel vrie is. De bel wuuertj netuurlik neet oetgezatte.
• 'n Bel veur inkommendje gesprekken aan te kondige. Vreuger waas det ouch 'n echte bel die besting oet twiee klukskes wotaengen 'ne klepel sloog. Nodern tillefoeans hobben 'ne luudspraeker en doks deentj 't loesterdeil inne haore ouch es bel. De spanning womit de bel wuuertj aangestuurdj hetj wekspanning.
• 'nen Triller. Deze truf me aan inne meiste hendies. Dae kan waere gebroek inplaats 'n bel. Wen de gebroeker d'n tillefoean op 't lief druueg, den veultj t'r det wuuertj gebeldj songer det de omgaeving wuuertj gestuuerdj.
• 'n Antilokaalsjakeling. Dees zurg d'rveur det 't eige stumgeluid neet goed huuerbaart is (det wuuertj namelik es hinjerlik ervare). De stum vanne gesprekspartner mot netuurlik waal huuerbaar zeen.

• 'n Keesinrichting veur bie 'n oetgaondj gesprek 't nommer te keze. Vreuger waas dit 'n keessjief, allewiel meistes drokknuup. Allewiel is bao ederen tillefoean aangeslaoten op 'n autematis netwirk, zoeadet de keesinrichting neet kan ontbraeke.
• 'nen Handjdynamo mit 'ne slinger veur belstroum op te wekke, zodet bieje taengepartie (doks de tillefoeancentraal) de bel geitj rinkele. Saer 't begin vannen twintjigsten ieef wuuertj de belstroum inne centraal opgewek en is de slinger neet miee nuuedig.