Da Wikipedia, l'enciclopedia libara.
El termene
streaming
, inte el canpo de łe tełecomunegasion, l'identifega un fluso de dati audio/video trazmesi da na sorzente a una o pi destinasion traverso de na rete tełematega. 'Sti dati cua i vien reprodoti man man che i riva a destinasion.
Visto el suceso grando che el ga vesto el streaming, doramai i ze tanti ase i server costruii a posta par ospitar escluzivamente file audio o video. Una de łe pi resenti apregasion de ła tegnołozia streaming ła ze sta aprega inte el canpo de ła publisita co ła creasion de videobrochure.
Sostansialmente A eziste do tipołojie de streaming:
- Streaming on demand
- Streaming live
Siben che a volte par trazmision via web A se dopara el termine "streaming" cofa sinonemo de "direta", A ze da ciarir che un contenjudo in streaming el pol esar live o anca no.
I contenjudi audio/video a l'inisio i ze conprimesti e memorizai so un server cofa file. Un utente el pol domandarghe al server de inviarghe i contenjudi audio/video. A no ghe ze mia de bezonjo de descargarli par intiero sol PC par poderli reprodur: i dati resevesti i vien deconprimesti dal codec e reproduzesti pochi secondi dopo de l'inisio de ła risesion. 'Sto retardo cua el serve a crear na memoria tenporanea ("buffer" in zergo) par remediar a łe łatense o a łe microintarusion de ła rete. De 'sto tipo cua i ze i flusi streaming de Real Video e Real Audio, Windows Media Player, QuickTime, Adobe Flash Video. 'Sto ultemo tipo de formato de file el jera dopara dal sito de YouTube, prima de l'introdusion del łinguajo HTML5 che el parmete nativamente el streaming audio/video.
El ghe someja a ła tradisionałe trazmision radio o video in broadcast. Anca in 'sto cazo i dati i ze trazmesi doparando oportune conpresion par łezarir el pi posibiłe el carego so ła rete. Ła conpresion de i contenjudi ła introduze inte el fluso un retardo de sirca dieze secondi. De sołito inte el canpo del streaming live 'sto retardo no'l costituise un problema.
