E artikulo aki ta skirbi na papiamentu . Lo ta apresia si por mantene e artikulo aki na estilo di papiamentu .

Rudolf Boskaljon

Pais di nashonalidat	Reino Hulandes
Nomber di dilanti	Rudolf , Frederik , Willem
Fam	Boskaljon
Fecha di nasementu	28 mart 1887
Yu	Lucila Engels-Boskaljon
Dominio di idioma	Papiamentu , Hulandes
Okupashon	musiko , conductor , kompositor , violinist
Dunado di trabou	Curacaos Philharmonisch Orkest
Studiante di	Paul de Lima
Instrumento	violin
Obra notabel	Museo di Korsou
Distinshon	Officer of the order Orange-Nassau , Zilveren Anjer

Rudolf Frederik Willem Boskaljon (☆ 28 di mart 1887 na Korsou - † 31 di desember 1969 na Korsou ) tabata un musiko, dirigente, instrumentalista i kompositor di Korsou . El a haya fama pa su dedikashon na arte na Korsou i a atkeri e titulo di honor "tata di musika kurasoleno". ^[1]

Biografia [ edita | edita fuente ]

Rudolf Boskaljon, konosi tur kaminda komo "Shon Dodo", a nase na 1887 komo yu di Johannes Petrus ("Shon Janchi") Boskaljon (1863-1936), kende tabata dirigente di orkesta i kompositor di wals i danza banda di su profesion komo militar. Durante su karera largu komo amtenar Shon Dodo a okupa diferente funshon, entre otro komo archivista na sekretariado di gobiernu. ^[2]

Shon Dodo tabata toka diferente instrumento i tabata outodidakto. ^[3] Pa fio el a yega di tuma les di Paul Quirino de Lima, dosente di fio, kompositor i tata di kompositor Emirto de Lima . ^[4] E tabata fundado di e prome i na 1939 di e di dos Orkesta Filarmoniko di Korsou ( Curacaosch Filharmonisch Orkest ) i tabata su dirigente pa mas ku 25 ana. E orkesta tabata tene presentashon i konsierto na Korsou i Aruba, inkluso ku solista tantu lokal komo internashonal. Na yuni 1944 e orkesta a alkansa un klimax den su eksistensia, ora durante konsierto tabata toka piesanan unikamente di kompositor antiano . Boskaljon tabata aktivo komo kompositor. Tin varios komposishon di marcha riba su nomber, di kual "De Prinsessenmarsch" a wordu toka na okashon di e nasementu di prinsesa Juliana dia 30 di aprel 1909. ^[5] Pa su komposishon sinfoniko "Curacao" el a usa material tematiko deriva di kantikanan popular kurasoleno manera "Luna ku solo lagami pasa" , "Nos tera ta baranka" i "E kas e kas ta bon traha" .

Komo pionero i motor Boskaljon tabata stimula bida kultural pa komunidat di Korsou; el a organisa entre otro konsiertonan pa hubentut i a introdusi musika klasiko i mundial. E tabata kofundado di e Sirkulo di Arte di Korsou ( Curacaosch Kunstkring ) i durante su ananan komo presidente a atrae un hala di artista internashonal pa duna presentashon. Huntu ku su yerno Chris Engels e tabata na 1947 kofundado di Museo di Korsou y na 1960 fundado di Skol di Musika di Korsou ( Curacaose Muziekschool ). ^[6] Na 1958 a sali publika su estudio tokante bida musikal na Korsou titula Honderd jaar muziekleven op Curacao .

Rudolf Boskaljon tabata kasa ku Graciela V. Ecker i huntu nan tabatin dos yu muhe, di kual Lucila Engels-Boskaljon (1920-1993) a destaka komo artista visual. Despues di un periodo di lucha pa su salu el a fayese dia 31 desember 1969 na edat di 82 ana.

Distinshon [ edita | edita fuente ]

• Na 1935 el a keda kondekora komo Kabayero (Ridder) den Orden di Oranje-Nassau y na 1962 a wordu promove pa Ofisial (Officier). ^[7]
• Pa su meritonan musikal e ta risibi na 1954, como prome antiano, e "Klavel di Plata" ( Zilveren Anjer ) institui pa prinsipe Bernard di Hulanda. ^[8]
• Shon Dodo a keda apunta pa bida presidente honorifiko di Orkesta Filarmoniko di Korsou.