Dit artikel is gesjreve (of begos) in 't Mofers . Laes hie wie v'r mit de versjillende saorte Limburgs omgaon.

Boris Nikolajevitsj Jeltsin ( Russisch : Бори?с Никола?евич Е?льцин) ( Boetka , 1 fibberwarie 1931 - Moskou , 23 april 2007 ) waas van 1991 toet en mit 1999 d'n ieeste prizzendent van Roslandj .

Van 1961 toet 1990 waas Jeltsin lid vanne Communistische Partie vanne Sovjet-Unie . In 1986 waerde d'r door Michail Gorbatsjov beneump toet partiesjef van Moskou, wo d'r zich onger anger inzat veur 't taengegaon van corruptie . Jeltsin vonj det de perestrojka , de hervormige vanne Sovjet-Unie, te traog gonge, wodoor d'r oet zien amb gezat waerde.

In 1989 woort t'r aevel verkaozen es lid van 't Congres van Vouksaafgevaerdigde en kreeg t'r zitting inne Opperste Sovjet . In 1990 verleet t'r de Communistische Partie; hae stal zich pertieloos kandidaot veure prizzendentsverkeziginge. Op 12 juni 1991 won d'r mit 57% vanne stumme dees verkeziging.

Onger aanveuring van Vladimir Krjoetsjkov woort op 18 augustus 1991 'ne staotsgreep gepleeg taenge Gorbatsjov en Jeltsin. Hiebie troch Gorbatsjov zich trogk, meh Jeltsin zat juus d'n aanval in taenge de staotsgreep. Jeltsin klom hiebie op 'nen tenk wo d'r 'n toespraok heel; hiedoor koos 't laeger ziene kantj en mislokdje de staotsgreep. Begin dieetsember 1991 verklaordje Oekraine zich onaafhenkelik en 'n waek d'rop deej Gorbatsjov de Sovjet-Unie ontbinje; Jeltsin bleef de prizzendent van Ruslandj.

De jaore daorop heel Jeltsin vaol kontak mitten Amerikaanse prizzendent Bill Clinton , waat good waas veure verstandjhajing tosse de twiee lenjer. Zien prizzendentsjap kinmirk zich aevel ouch door 'n minder periood, woronger de Roebelcrisis , waat de economie van Roslandj deej samevalle. Zien slechte gezondjheid en drankperbleem zorgdje dokker veur apaarte toestenj.

Op 31 dieetsember 1999 lag Jeltsin zien wirkzaamheje neer, worop Vladimir Poetin zien functie euvernoom. Jeltsin storf op 23 april 2007 op 76-jaorige laeftied door 'nen onverhodsen hertstilstandj.