D Barbara Bosch (* 5. Sepdembr 1958 z Stuegert ) ischt a pardeilosa Kommunalpolidigere. En sellra Funkzioo isch-se vo 2003 bis 2019 d Obrbirgermoischdore vo dr Graußa Kreisstadt Reitlenga gwaa. Vom Januar 2011 bis Januar 2017 isch dui Frau au Prasidendin vom Stedtedag Bada-Wirdaberg gwaa. ^[1] Seid Juli 2021 isch-se als Staatsratin fir Zivilgsellschaft un Birgerbedoiligung Mitgliid vo der bade-wirttebargische Landesregierong .

Aus ihrem Leaba [ andere | Qualltaxt bearbeite ]

D Barbara Bosch ischt am 5. Sepdembr 1958 z Stuegert uf d Welt komma. Wia se ihr Abidur en dr Dasch ghet hot, hot-se noh d Handlsschual bsuacht und dui mit-ma staatlich priafda Abschluss beendet. Do drnoch hot-se a Universideetstudiom ufgnomma. Ihre Hauptfecher send Polidikwissaschafda ond d Gschicht vo dr Konscht gwaa. Abgschlossa hot-se ihr Studiom mit-em ?Magister Artium“. Scho gega Schluss vo ihrer Schualzeit ond wahrend-em Studiom hot-se neabaher a bissle bei vrschiidene Vorwaldonga gschafft ond sich so an Doil vo ihrem Studiom finanziira kenna. Tadich gwaa ischt-se ondr andrem als Schreibkraft emma Vorzemmer, als Sachbearbeidere en dr Sozial- ond Jugendarbeit, als Honorarkraft en dr Erwachsenabildong. A Zeitlang hot-se au an Lehrufdrag an dr Fachhochschual fir Geschdaldong en Schwabisch Gmend ghet. Do drnoch hot se d Leidong vo dr Abdeilong Sozialarbeit beim DRK-Kreisvorband Rems-Murr kriagt. Weil-se deet ihr Sach so guad gmacht hot, ischt-se bald zor Assischdendin vom Gschaftsfihrer beim DRK-Landesvorband Bada-Wirdaberg ufgschdiiga.

Em Johr 1990 isch d Barbara Bosch zor Leidere vom stedtischa Sozialamt Fellbach ernannt worra. Als nagschda Stazioo en ihrer Karriere ischt-ra Leidong vom Perseenlicha Referat vom Fellbachr OB ibrtraga worra. Dui Stell hot-se so lang ausgiabt, bis-se dr Gmoidrot vo Fellbach 1997 zor Beigeordnada vom OB gwehlt hot. En sellra Stellong hot-se d Bezeichnong ?Birgermoischdore“ gfihrt.

Wia em Johr 2003 z Reitlenga wiidr amol a OB-Wahl oogschdanda ischt, hot sich au d Barbara Bosch om dui Stell beworba, obwohl dr seitherig OB, dr Stefan Schultes vo dr CDU, au wiidr kandidiirt hot. D Barbara Bosch isch zwar en koira Pardei gwaa, abr trotzdem vo dr SPD ond dr FDP ondrstitzt worra. Ond was viil et fir meglich ghalda hend, ischt eidroffa: D Barbara Bosch hot s Renna gmacht. Am 3. April hot-se ihr Amt oodredda. Weil z Bada-Wirdaberg d Amtszeit vo de Birgrmoischtr ond Obrbirgrmoischtr noch acht Johr auslauft, ischt em Johr 2011 z Reitlenga wiidr a OB-Wahl oogschdanda. Nochdem d Barbara Bosch abr ihr Amtszeit ohne Fehl ond Tadl hendr sich brocht hot, hot sich vo de etabliirde Pardeia naamert draut, gega d Amtsinhabere zo kandidiira. Bloß a obedeidendr Kandidat ischt gega-se ens Renna ganga. Am End isch d Barbara Bosch mit 85,6 % vo de Stemma wiidrgwehlt worra. A kloiner Scheeheitsfehler ischt gwaa, dass mr so a ehnlichs Ergebnis erwardet hot, worom bloß 23,8 % vo de Wehler an d Wahlurna ganga send.

Bei der Wahol 2019 hot-se neme kandidiert. ^[2] Am 22. Juli 2021 isch d Bosch vom bade-wirttebargische Landdag zur Staatsratin fir Zivilgsellschaft un Birgerbedoiligung em Kabinett Kretschmann III gwahlt worda. ^[3] In dieser Funktion folgte sie Gisela Erler nach.

D Neabaamdr vo dr Barbara Bosch [ andere | Qualltaxt bearbeite ]

• Mitgliid em Kreisdag vom Landkreis Reitlenga
• Mitgliid em Regionalvrband vo dr Regioo Neckr-Alb
• Mitgliid em Vrwaldongsrat vo dr Kreisschbarkass Reitlenga
• Prasidendin vom Stadtedag Bada-Wirdaberg (vo Januar 2011 bis Januar 2017)

Ihre Ehraemtr [ andere | Qualltaxt bearbeite ]

• Vizeprasidende vom Landesvrband Bada-Wirdaberg vom DRK
• Vorstandsmitgliid vom Reitlengr Konschtvorei
• Mitgliid em Stifdongsrat vo dr Bruadrhausdiakonii
• Vorstandsmitgliid vo dr Stifdong ?Konkrete Kunst Reutlingen“
• Mitgliid em Kuradorium ?Zeitenspiegel Reportageschule Gunter Dahl“

Weblink [ andere | Qualltaxt bearbeite ]

• A Kurzportraa uf dr Webseit vo dr Stadt Reitlenga
• A graußa Bildrgalerii ibr d Barbara Bosch
• A Zeidongsbericht ibr d Wiidrwahl

Oinzlne Nochweis [ andere | Qualltaxt bearbeite ]

1. ↑ http://www.schwaebische.de/region/baden-wuerttemberg_artikel,-Neuer-Staedtetagspraesident-Salomon-fordert-mehr-Mittel-fuer-Schulsanierungen-_arid,10606194.html
2. ↑ Barbara Bosch tritt nicht mehr an . In: swp.de, 25. Juli 2018.
3. ↑ Kretschmann findet neue Staatsratin: Reutlinger Ex-OB Bosch. In: Zeit Online . 21. Juli 2021, abgruefen am 21. Juli 2021 .