Publius Ovidius Naso (daalich maast kuut Ovid  ; * 20. Meerte 43 f. Kr. in Sulmo ; † weerskienelk atter 17 a. Kr. in Tomis ) waas aan roomsken Dichter . Sien ap Latiensk ferfoatede Wierke sunt deelwiese noch arheelden, wierbie moonige Seeken, do him touskrieuwen waide, wildaage uk fon uurswal stomje (so as do Halieutica). Besunners bekoand sunt do Ferwonnelengen (af "Metamorphosen"), een groote Goaderenge fon Ferwonnelengs-Mythen un -Fertalstere, do maasttieds gjucht tragisk uutgunge. Faare is hie bekoand foar sien groote Wierke uur ju Ljoofte, t. B. sien tjo Beende fon "Ars amatoria", ju "Ljooftes-Kunst". Dusse as swiensk apfoatede Skrift waas dan weerskienelk ieuwenske sien Wieten fon aan Skendoal een Uurseeke, dat hie atter ju Swotte See ferbonned wude, wier hie sik nit heemsk failde un t.B. do Tristia ("Truurige Seeken") skreeuw. Daalich wad hie fon do deer lieuwjende Rumanen , do je uk ap do Roomere touraachgunge, as Nasjonoal-Dichter fereerd.