Ju
Aquarellmoalerai
is dat
Moaljen
mad
Aquarellfaawen
.
Mad Woater fermoalde Faawen wuden al in ju
Steentied
bruukt, t.B. in
Hoolenmoaleraien
. Man dat wieren noch neen Aquarellfaawen in dan Sin fon daalich, do dakkeden fuul moor, un do wuden uk uurse Techniken bruukt, t.B. mad stuuwende Faawpigmante un aal sowat.
Aleer wude Aquarellfaawe bloot bruukt, uum Skizzen un Studien tou moakjen. Wakke Aquarelle fon
Albrecht Durer
sunt indaid bikoand wuden un habe dan Roup fon ju Aquarellmoalerai een bitje staarked, man daach had Albrecht Durer saarm sien Aquarelle bloot as Skizzen un Studien blouked, un so bleeuw dat uk noch een poor hunnerd Jiere.
Laiweloa broachte aan
Romantiker
uut
Anglound
, dat waas
Joseph Mallord William Turner
, ju Aquarellmoalerai tou ju Bitjuudenge, ju ju daalich in ju
Moalerkunst
had.
-
Kop fon aan
Rai
-Buk, moald fon Albrecht Durer
-
Ju
Paiterssaarke
fon dat Suude, moald fon Joseph Mallord William Turner
In ju Aquarellmoalwiese rakt dat two wichtige Moalwiesen, dat is dat Lasierjen un dat Lavierjen. Maasttieds waide ferskeedene Moalwiesen ferbuunen.
Dat Lasierjen (af: ju Lasuurtechnik) is, wan me mad waite Faawe ap druugen Unnergruund moald. Dat is dan so, dat me in moorere Faaw-Loagen moalt, wiertou een Faawloage aaltied druuged weese mout, eer ju naiste Loage deer ap kumt. Deer mout me uk nit loange taiwe, uumdat ju Aquarellfaawe gau druuch is. Dat duurt fielicht een poor Minuten, aal atter ju Masse fon Woater, wiermad me ju Faawe fermoald had.
Dat Lasierjen had dan Foardeel, dat me dat goud stjuurje kon. Me kon ap dusse Wiese kloore Kontuuren in ju Bielde brange. Un wan me daach wol, dat two Faawflakten ineenuur uurgunge, kon me mad ju waite Faawe dan Skeed-Biriek fon ju druuge-Faaw-Flakte wier wait moakje un een bitje madeenuur fermoalje. Deertou mout me een bitje energisker mad dan Pinsel wierkje.
Dat Lavierjen is, wan two waite Faaw-Loagen sik roakje konnen. Dat mad konnen bisunnere Uurgongs- un Ferloop-Wierkengen antstounde, man dat is nit so eenfach tou stjuurjen, as bie dat Lasierjen.
Lavierjen kon me mad ju Wait-in-Wait-Technik un mad ju Ferloop-Technik. Wait-in-Wait, dat is, wan du een waite Faaw-Flakte hast un moalst deer mad een waite Faawe roane un ju Ferloop-Technik is, wan an dat Skeed fon een waite Faaw-Flakte (af een mad Woater waitmoakede Flakte) uurs een Faawe ounbroacht wad. Ju lopt dan in ju Flakte roane, un deertruch antstoant aan Faaw-Ferloop.
Buute dusse fier ferspratte Moalwiesen rakt dat fonsaarm uk litje Trikke, do nit alken Moaler bikoand sunt.
Toun Biespil rakt dat ju Muugelkhaid, dat me dan Pot mad ju Faaste Faawe foar kuute Tied in dat Woater smit un dan wier ruut lukt, un dan had me een tjuk Faaw-Smeer, dat dan heel uurs uutsjucht as normoale Aquarellfaawe. Dut Faawsmeer is, mad aan druugen Pinsel fermoald, dakkend, so kon mad do normoale Moalwiesen heel un aal nit moald waide, normoal skiemert bie Aquareelfaawen aaltied die Unnergruund truch.
Wal buute moald, die skuul dat fonsaarm bloot bie goud Weeder dwo. Man foar dan Faal, dat dat daach rient, skuul me sik woorm Woater meenieme (goud isolierd, dat dat nit so gau oukeele kon), uumdat sik dat woorme Moalwoater dan nit so goud mad dat koolde Rienwoater misket. Daach skuul me ju Skilleroatsje so goud as muugelk skuule, uumdat me mad dan Trik dan Skoade bloot minnerje, man nit heel un aal fermeede kon.