Custu articulu est iscritu cun sa grafia Limba Sarda Comuna . Abbaida sas ateras bariedades graficas:

campidanesu · logudoresu · nugoresu

Is Patos de su Lateranu sunt istados un'imparis de acordios o patos firmados in Roma su 11 de freargiu de su 1929 ^[1] intre su Regnu de Italia (rapresentadu dae Benito Mussolini ) e sa Santa Sede (rapresentada dae su cardinale e secretariu de Istadu Pietro Gasparri ). Si ddi narat gasi sende chi fiant istados firmados in su Palatzu de su Lateranu, antigu palatzu de is pabas. Custa firma aiat serradu su cunflitu politicu de sa Chistione Romana , cumintzadu in su 1870 con la Conchista de Roma , cando su Regnu de Italia aiat annessionadu su chi tando abarraiat de s' Istadu de sa Cresia , boghende·nche su podere temporale de is Pabas .

S' unificatzione de Italia , in su 1870 , aiat cumportadu s'isperdimentu de sos Istados Pontifitzios, territorios chi de prus de milli annos fiant suta sa soberania de is pabas de Roma. Su paba Piu IX , chi fiat su chi regnaiat in cussu tempus, aiat dennegadu de reconnoschere s'istadu italianu nou, aiat iscomunigadu su re, Vittorio Emanuele II , e aiat bividu su restu de sa vida sua in situatzione de isulamentu in is palatzos de su Vaticanu. Durante 50 annos, Italia e sa Santa Sede aiant mantentu unu clima de ostilidade pare·pare.

Durante su pontificadu de Piu XI si fiat trincadu custu clima de isulamentu cun s'Italia e si fiant firmadas is Patos de su Lateranu, chi fiant intrados in vigore su 7 de lampadas de su 1929. ^[2]

Is patos fiant istados tres:

• Unu patu chi reconnoschiat s'indipendentzia de sa Tzitade de su Vaticanu , chi de custa manera si cunfiguraiat che a Istadu. In cambiapare, sa Santa Sede aiat reconnotu s' Italia .
• Unu cuncordadu chi istabiliat is relatziones intre sa Cresia italiana e s'Istadu italianu.
• Unu cumpensu economicu pro is perdidas chi aiat padessidu sa Santa Sede in su 1870 a cunsighidu de s'unificatzione italiana.

S'Italia si fiat decrarada cunfessionalmente catolica e sa Cresia aiat retzidu una positzione de favore in su campu de s'imparu. Piu XI aiat proibidu a su cleru de pigare parte in sa vida politica de su paisu e aiat prescritu chi is piscamos giurarent fidelidade a su Regnu de Italia. Is membros de su cleru fiant istados decrarados esentes a su serbitziu militare, e is leges de coja e divortziu fiant adatadas a is de sa Cresia catolica.

Acordios de Villa Madama [ modifica | modifica su codighe de origine ]

Su Cuncordadu (ma non su Tratadu) fiat torradu a biere in su 1984 cun sa Republica Italiana , a pustis de tratativas longas e dificultosas, in sustantzia pro nche bogare sa clausula chi pertocaiat sa religione de Istadu de sa Cresia catolica in Italia. Sa revisione chi aiat giutu a su Cuncordadu nou fiat firmada in Villa Madama , in Roma , su 18 de freargiu dae su tando presidente de su Cussigiu Bettino Craxi , dae s'Istadu italianu, e de su cardinale Agostino Casaroli , Secretariu de Istadu, in rapresentantzia de sa Santa Sede. Su Cuncordadu nou aiat istabilidu chi su cleru catolicu esseret finantziadu dae una fratzione de sas intradas totales, a traessu de su mecanismu nodidu che a oto pro milli e chi sa pro sa nomina de is piscamos non esseret prus dimandada s'aprovatzione de su guvernu italianu. ^[3] Fiat fintzas istabilidu chi in is iscolas faghiat a pedire s'esentzione dae s'ora de religione catolica, in antis obligatoria, chi nointames fiat abarrada curriculare, fartende s'ocasione de dda faghere a s'imbesse facultativa isceti pro sos interessados a tale materia: s'isseberu relativu depet essere fatu e comunicadu a s'atu de iscritzione in antis de su cumintzu de s'annu iscolasticu. ^[4]

Riferimentos [ modifica | modifica su codighe de origine ]

1. ↑ ( EN ) David I. Kertzer, Prisoner of the Vatican: The Popes' Secret Plot To Capture Rome From The New Italian State , Houghton Mifflin Harcourt, 2006, p.292, ISBN   0618619194 .
2. ↑ ( EN ) Gerhard Robbers, Encyclopedia of World Constitutions , Infobase Publishing, p.1007, ISBN   0816060789 .
3. ↑ ( IT ) Governo Italiano - Le intese con le confessioni religiose , in presidenza.governo.it .
4. ↑ Servizio per i rapporti con le confessioni religiose e per le relazioni istituzionali - Accordo tra l'Italia e la Santa Sede e le successive intese di attuazione , in presidenza.governo.it .