Fronzeesich in Airoba
Fronzeesisch
dud as Weldschbroch gelde, wals vun rund 200 Millione Schbrecha uff alle Kondinende geredd un aa as Fremdschbroch vun edwa 85 Millione bharschd werrd.
Ugfahr 115 Millione sin Muddaschbrochla. Es is Omdsschbroch in
Frongraisch
,
Kanada
, de
Schwaiz
,
Belgje
,
Lugsebursch
,
Monaggo
,
Haidi
un in zahlraiche Lenna in
Weschd- un Zendralafrigga un in Polynesie un ward in fasch alle sonsdische ejemalische Kolonie noch gschbroche.
Die
fronzeesisch Schbroch
gheerd zu de romanisch Grubb vum idalische Zwaich vun de indogermanische Schbroche. Dodemid is die Schbroch unna onrem mim Idalljanische, Ratoromanische, Schbonnische, Kadalanische, Pordugisische un Rumanische naha vawond.
Des haaßd nix onnaschdes, als wie daß es Gallisch (haid noch im Woad "galisch" zu heere) vunde Gallia sisch schdaag mim Ladain vunde aale Reema vamischd hod.
De Schaalemanje hod anno 800 noch ohne Iwwasedza mide Laid im Lond - bis hie noo Sagse - schwadze gekennd, uf Ladain grad wie inde "thiuske" Schbrooch - darre Schbrooch, aus dar wo sich donn Daidsch un Fronzeesisch andwiggld han. Awwa schun des Word "thiusk" (=im/vum Volg) is germanisch - orra hod doch zmindschd germanische Wurzle. Im haidische Frongraisch waan awwa wenischa Germane als wie Gallia. Un die han ian eischne Schbrooche un Dialegde gschbroche un so mid schdaage Vamischung mid ladainische Ausdrigg ian aischne Schbrooche andwiggld. Schun Oddo de Große hod 150 Joa schbada die Parisa nimmi vaschdeje gekennd.
Im gonze Middlalda waa Ladain noch die uniwarselle Diblomadeschbrooch - des waa die Schbrooch vun de Karsch, dodemid konnd mar sisch in alle grisdlische Lanna mid gebildede Laid unnahalde, des waa die Lehr- un ofd aach Umgongsschbrooch ande Uniwarsidade. Arschd inde Naizaid is des dorsch Reformadzion un augejende Renesoos im diblomadische Beraisch onnaschda geworrn: do hod sisch mea un mea Fronzeesisch dorschgsedzd. Andgildisch bsieschld worrn is des unnam Lije-Lui, dar wo sisch Sunnekeenisch hod nenne geloßsd. Saiddam is die "Linqua Franka" (lad.: Fronzeesisch Schbrooch) an feschde Begriff. Wonn Karl May gschriwwe hod, des Aramaisch, Griechisch, Arabisch war zu sella orra daare Zaid do orra dord die Linqua Franka gewaßd, donn hodda dodemid gmaand, die Schbrooch war zu darre Zaid in sellem Gebied an alle Heefe un vun alle Diblomade grad so vaschdanne worrn, wie Fronzeesisch zu saina Zaid an alle oiropaische Forschdeheef, vum Ural bis zum Adlandig.
Haid gabds in Frongraisch an egschdra Gsadz zum Schudz vunde Schbrooch.
Schbroochkenndnis vun de Fronzeesisch Schbrooch
Fronzesisch is noo Englisch unn Daitsch die driddmaischd gebabbelde Fremdschbroch in Oiropa. In
Daitschlond
kenne sisch 14% vun de Bevelgerung uff Fronzeesisch ausdrigge, dodemid is Fronzeesisch die zwaddmaisch geschwadzde Fremdschbrooch in Daitschlond, noo Englisch.
Fronzeesisch werd iwwerall in Daitschlond unnerrischded, des hot soi Worzel im Elysee-Vadraach, als sisch Frongraisch unn Daitschlond naher kumme sinn. Saidem sisch die BRD dorsch die Weschdbindung aa naher on Frongraisch gebunne hot, is es Fronzeesische aa wischdischer worre. Frongraisch war im Kalde Kriesch de midd Abschdond wischdigschde Hondelspaddna, wail im Oschde faschd gar keen Hondel schdaddgfunne hot. Aa haid noch is Frongraisch wischigschda Hondelspaddna vun Daitschlond unn Fronzeesisch dooher im Hondelswese noo wie vor wischdisch, aa wonn inzwische zumindschd die maischde Imporde aus Schina kumme.
In grenznahe Regione, wie z. B. Bade, Saarlond unn Palz hot Fronzeesisch en eggsdrem wischdische Schdellewerd, wail mer jo midd de direggde Noobarn am eheschde Beziehunge uffbaud, sowohl gschafdlisch als aa fraindschafdlisch, unn aa viele in Frongraisch schaffe gehe (Lehn sinn in Frongraisch zum Daal aa heher). In de grenznahe Regione werd Fronzeesisch an mansche Schule doher aa monschmol sogar als erschdi Fremdschbrooch unnerrischded.