StarCraft
es un
videojoc
d'estrategia de temps reau desvolopat per
Blizzard Entertainment
. La premiera version foguet publicada en marc 1998 apres lei sortidas de
Warcraft: Orcs and Humans
e de
Warcraft
II
: Tides of Darkness
. Amb mai de 11 milions de copias vendudas, es un dei succes pus importants de l'istoria dau
videojoc
informatic
. Aquo permetet la sortida d'una extension,
StarCraft: Brood War
,
novembre de 1998 e d'una seguida,
StarCraft 2: Wings of Liberty
, en 2010.
L'intriga dau joc se debana au segle XXVI e conta lei guerras qu'opausan tres especias diferentas per la dominacion dau Sector Koprulu, una region de la
Via Lactea
. Lei Terrans son lei descendents de forcats originaris de la Terra. Lei Zergs son una raca insectoida modificada per de manipulacions
geneticas
per assimilar d'autrei formas de
vida
. Enfin, lei Protoss son una raca a l'origina d'una
civilizacion
avancada, anciana e
conservatritz
. Cada faccion dispausa d'unitats que presentan de diferencias importantas, co que necessita d'adoptar de tacticas especificas. Aquela particularitat era una innovacion importanta en 1998 e es un dei factors qu'explica lo succes dau joc.
StarCraft
compren tanben un mode multijogaire qu'es lo suport de competicions professionalas, especialament en
Corea dau Sud
.
StarCraft
es un
videojoc d'estrategia
fondat sus lo concepte ≪ recoltar-bastir-conquistar ≫ popularizat per lei serias
Command and Conquer
e
Warcraft
. De missions de tipe comando son tanben prepausadas. Lo jogaire i dispausa d'un nombre limitat d'unitats e deu percorrer la carta per realizar d'objectius segon un scenari determinat. Pasmens, l'innovacion majora de
StarCraft
foguet de prepausar tres faccions forca diferentas.
StarCraft
demanda au jogaire de recoltar dos tipes diferents de ressorsas per construrre de basas e crear de tropas :
- lo
minerau
es la ressorsa pus importanta car es requista per la produccion de totei leis unitats. Es en quantitat limitada sus cada carta e son contrarotle es donc sovent un enjoc estrategic.
- lo gas vespin es una ressorsa segondaria qu'es demandada per fabricar leis unitats pus poderosas. Sei jaciments permeton de'n produrre una quantitat infinida mai la produccion demenis forca apres l'extraccion d'una quantitat donada de gas.
Lo nombre d'unitats disponiblas es limitat per la construccion de depaus d'avitalhament. Cada unitat consuma una partida de la capacitat d'avitalhament dau jogaire. Pasmens, aquela capacitat pou pas excedir la valor 200 e leis armaments pus poderos necessitan mai d'avitalhaments que leis unitats pus feblas.
Leis unitats de
StarCraft
son dotadas d'un ensemble de caracteristicas :
- l'ataca designa la valor de degalhs infligits a un adversari. Certaneis unitats an doas atacas diferentas coma lo goliath terran qu'utiliza un canon mitralhaire contra leis unitats terrestras e de
missils antiaerians
contra leis unitats aerianas.
- l'armadura e lo bloquier designan la reduccion de degalhs recebuts apres una ataca enemiga. Lei degalhs comptabilizats son la diferencia entre lei valors d'ataca e d'armadura.
- lei ponchs de vida designan lo nombre totau de degalhs qu'una unitat pou subir avans sa destruccion.
- una velocitat de desplacament e un camp de vision.
Leis unitats regularas son produchas per lei bastiments de la basa. Per fabricar leis unitats pus complexas, es necessari de construrre de bastiments addicionaus. Certaneis unitats particularas an l'estatut ≪ d'
erois
≫. Son marcadas per una color diferenta e son provesidas per de mecanismes scenaristics. Leis ≪ erois ≫ an de caracteristicas superioras ais unitats normalas equivalentas e correspondon a d'unitats d'eleit o a de personatges importants de l'istoria coma
Kerrigan, Raynor o Zeratul
.
Mai d'una unitat dispausa de caracteristicas suplementarias :
- lei Protoss an una valor de
bloquier
e de ponchs de bloquier. Foncionan coma la valor d'
armadura
e lei ponchs de vida e, per destrurre una unitat protoss, es normalament necessari de li infligir una quantitat de degalhs egala a sei ponchs de
vida
e a sei ponchs de bloquier. Lei ponchs de bloquier son consumats avans lei ponchs de vida.
- lei ponchs de poder mesuran la capacitat d'activar e de mantenir de poders especiaus coma l'invisibilitat o l'ataca psionica.
Lei Protoss son una raca guerriera dotada de poders psionics importants. Sus sa planeta d'origina, Aiur, avian un mode de vida tribau. Sei capacitats psionicas de tria atraigueron l'atencion dei Xel'Naga, una raca forca avancada que protegissia mai d'una planeta. S'interesavan tanben forca a l'estudi dau vivent en vista de crear una
vida
≪ perfecta ≫. Lei Xel'Naga ajuderon lei Protoss dins son desvolopaments. Apres quauquei millenaris, lei Protoss vengueron una raca avancada. Pasmens, lei relacions se degraderon amb sei benfactors e lei diferentei tribus, desirosas de desvolopar son identitat propria, s'aluncheron. Lei tensions entraineron una revouta dei Protoss que tueron per suspresa de miliers de Xel'Naga.
Apres la partenca dei Xel'Naga, l'unitat de la nacion protoss resistiguet pas longtemps ai desacordis tribaus. Durant de segles, una guerra civila opauset lei diferentei faccions. La situacion se reglet amb la redescuberta d'un artefacte xel'naga que permetet de restablir un ancian liame telepatic entre totei lei Protoss. Aquo permetet de recampar lei Protoss au sen d'una comunautat telepatica unica e de restablir la patz. Una societat de castas foguet creada per dirigir la nacion protoss. A sa testa, se trobet un ≪ Conclave ≫ format per lei judicators, un grop reduch de Protoss experimentats. La mager part de la populacion jonhet lei khalais, encargats dau foncionament de la societat. Enfin, lo resta formet lei templiers, una casta militara destinada a protegir Aiur e seis abitants. Lei Protoss que refuseron aquel ordre noveu degueron s'enfugir. Considerats coma
eretics
, fonderon una societat novela sus la planeta Shakuras e fogueron dichs templiers negres.
Pauc a pauc, lei Protoss adopteron una filosofia similara a aquelei dei Xel'Naga e comenceron d'explorar l'Univers per observar la vida. Pasmens, manipular l'existencia dei racas descubertas foguet enebit. Es dins aquel encastre que lei Protoss rescontreron la raca umana dins lo Sector Koprulu. Fogueron leu intrigats per l'expansionisme uman e per son mode de vida pauc respectuos de la
natura
. Pasmens, demoreron fideus a sa politica de non intervencion fins a l'intrada de patrolhas zergs dins la region. L'analisi dei teissuts organics d'aquela raca novela mostret la presencia de materiau genetic xel'naga. Aquo foguet una grossa suspresa per lei Protoss qu'assaieron de comprendre l'interes dei Zergs per leis umans.
Lei Protoss dispausan d'unitats poderosas dotadas de capacitats ofensivas importantas, d'un
bloquier
energetic recargable e d'una armadura importanta. En revenge, lo cost d'aqueleis unitats es important e la creacion d'una grossa
armada
protoss es donc sovent impossibla. En placa, es necessari d'organizar una armada pichona, sovent en inferioritat numerica clara. Un autre limit dei Protoss es la necessitat de construrre de
cristaus
per alimentar sei bastiments. En consequencia, tota extension d'una basa protoss deu premier concebre un ret de cristaus.
Lei Zergs son originaris de Zerus, una
planeta
cauda pauc favorabla a l'aparicion de la vida. Eran una pichona raca insectoida dotada de facultats d'adaptacion de remarca. Aqueu trach intriguet lei Xel'Naga qu'avian perseguit seis recercas apres la revouta dei Protoss. Aquo li permetet de comprendre l'origina de la resistencia dei Zergs ai condicions ostilas de Zerus : eran capables d'infiltrar lo sistema nervios d'un autre animau per ne'n prendre lo contrarotle. Un sistema de seleccion genetica dirigissia totjorn lei Zergs vers leis especias amb un potenciau d'evolucion important.
Pivelats per aquelei caracteristicas, lei Xel'Naga decideron d'estudiar e de manipular la genetica dei Zergs. Aquo menet rapidament a la formacion de l'Overmind, una entitat capable d'exprimir la consciencia collectiva dei Zergs. Aquo entrainet la formacion d'una nebla de Zergs centralizats a l'entorn de l'Overmind que transmetia seis ordres per lo mejan de Zergs especializats. La
genetica
zerg s'adaptet a aquela transformacion amb l'establiment d'una mena de ≪ barriera mentala ≫ destinada a assegurar lo respecte estricte de la ierarquia. Una autra consequencia de la formacion de l'eissame foguet l'aparicion de Zergs especializats dins de pretzfachs especifics.
Per cop d'azard, una raca capabla de viatges galactics s'espotiguet sus Zerus. Foguet leu assimilada per lei Zergs que pogueron s'interessar ai regions perifericas de sa
planeta
. I descurbigueron lei Xel'Naga que pensavan a tort qu'una ataca era impossibla en causa de son rotle decisiu dins l'evolucion zerg. L'ataca duret solament quauquei jorns e lei Xel'Naga fogueron a son torn assimilats per lei Zergs. Aquo permetet a l'Overmind d'aquistar totei lei conoissencas de sei creators. Descurbigueron tanben leis archius que recensavan totei leis observacions xel'naga sus lei racas de l'Univers.
Aquo ofriguet la possibilitat ai Zergs d'identificar leis especias d'assimilar per perseguir son desvolopament. Pasmens, li permetet egalament de descubrir l'existencia e la poissanca dei Protoss. L'objectiu major de l'Overmind foguet desenant de leis absorbir. Dins aquo, avans de realizar aqueu projecte, era necessari de redurre la diferencia de poders entre lei Protoss e lei Zergs. En particular, l'Overmind crenhava lei poders psionics protoss. Per aquela rason, s'interesset ais umans dau Sector Koprulu car lei raports xel'naga indicavan un important potenciau psionic en aquela especia.
Lei Zergs forman un eissame qu'es compausat de neblas. L'Overmind es l'expression de la consciencia collectiva de l'especia. Seis ordres son retransmes per una cadena de Zergs especializats. Dins aqueu sistema, lei pus importants son lei cerebrats qu'asseguran lo comandament efectiu d'un grop de Zergs. A respecte deis autrei faccions, una autra particularitat dei Zergs es son aspecte organic. Totei seis unitats e sei bastiments son d'organismes vivents que son dotats de capacitats de regeneracion que li permeton de garir automaticament apres un combat. En revenge, lei construccions zergs devon esser installadas sus una substancia especiala, lo creep.
Au combat, leis unitats zergs son generalament mens poderosas que seis adversaris umans e protoss. En revenge, son pus nombrosas car son cost de fabricacion es pus feble. De mai, son tanben generalament pus rapidas. Podon donc saturar lei defensas enemigas per li rompre. Enfin, per sostenir aquela estrategia, lei Zergs an quauqueis unitats especializadas dins l'agarriment.
Lei Terrans son d'umans originaris d'una populacion de forcats expulsats de la
Terra
apres de trebols entrainats per la subrepopulacion durant lo segle XXI. Lo contacte foguet perdut entre lei vaisseus de transport de presoniers e leis autoritats terrestras. Lei subrevivents arriberon dins lo Sector Koprulu e prengueron lo nom de Terrans. Sus la planeta Tarsonis, fonderon la Confederacio, un Estat inspirat deis
Estats Confederats d'America
, que venguet leu la poissanca umana dominanta de la region. Pasmens, leis umans arribats sus lei planetas Moria e Umoja garderon son independencia e fonderon lo Combinat Kel-Morian e lo Protectorat Umojan.
Dins lo resta dau Sector, l'egemonia confederada foguet mau acceptada per certanei colonias. Per exemple, la planeta Korhal se revoutet contra la corrupcion dei senators confederats. Menats per Angus Mengsk, lei rebels obtengueron lo retirament dei tropas confederadas. Pasmens, en realitat, aquo era una leca. Angus Mengsk e la quasi totalitat de sa familha fogueron leu
assassinats
. Lo darrier subrevivent, Arcturus Mengsk, prenguet alora la direccion de l'insureccion e s'aliet amb lo Protectorat Umojan contra la Confederacion. La reposta foguet forca violenta : una ataca nucleara generala destruguet Korhal. Dins aquo, Mengsk subrevisqet car era absent de sa planeta durant sa destruccion. Amb quauquei fideus, fondet lei Fius de Korhal, una milicia que perseguiguet lo ocmbat contra la Confederacion gracias a de tacticas de guerilha.
L'arribada dei Zergs dins lo Sector Korpulu foguet una suspresa per lei Terrans. De mai, l'amplor de la menaca foguet pas compresa per lei diferentei faccions. La pichona
colonia
de Chau Sara foguet ansin leu conquistada per leis envaisseires. Pasmens, aqueu succes duret gaire. Tre la presa de Chau Sara, una flota protoss bombardet la planeta e i exterminet tota forma de vida. La campanha terran de StarCraft e lo joc comencan amb l'arribada dei Zergs sus la planeta Mar Sara.
Leis unitats dei Terrans son inspiradas deis armaments terrestres amb la presencia de soudats armats de fusius, de carris de combat, de pecas d'artilharia e de cacaires. Lei bastiments pus importants son equipats de reactors que permeton de lei desplacar. Leis unitats mecanicas e lei construccions podon esser reparadas. En revenge, es pas possible de garir leis unitats d'infantaria dins lo joc originau car i a ges d'unitat medicala. De mai, se lei bastiments subisson de degalhs importants, un incendi acaba lor destruccion. Au combat, leis unitats terrans son consideradas coma equilibradas car an d'estatisticas intermediarias entre aquelei dei Protoss e dei Zergs. Sensa aver la poissanca dei Protoss, son generalament pus poderosas e mens rapidas que lei Zergs.
Dins la premiera partida dau joc, lo jogaire incarna un cap militar de la
colonia
terrana de Mar Sara. Encargat d'enquistar sus una ataca extraterrestra, descubris lei Zergs e destrutz d'installacions de la Confederacion infectadas per leis envaisseires. Pasmens, lo govern confederat ? l'organizacion politica que dirigis lei colonias terranas dau Sector Koprulu ? ordona l'arrestacion dau jogaire e de Jim Raynor, un marshal locau aguent ajudat a destrurre lei Zergs. Per permetre l'evacuacion dei colons menacats, lo jogaire es obligat d'acceptar l'ajuda dei Fius de Khoral.
Amb Raynor, lo jogaire raganta lei Fius de Khoral e mena mai d'una mission per Arcturus Mengsk. Aquo permet ai rebels d'anihilar la Confederacion gracias a l'utilizacion d'un emetor d'ondas capable d'atraire lei Zergs dins la capitala. Venceire, Mengsk se proclama emperaire e ven lo cap de la mager part dei colonias terranas. Pasmens, durant lo proces, sacrifica son luoctenent, Sarah Kerrigan, co qu'entraina la revouta de Raynor e dau jogaire. Amb un grop de milicians de Mar Sara, lei dos omes capitan a s'esfugir apres aver romput lei linhas dei Fius de Khoral.
Dins la segonda campanha, lo jogaire incarna un
cerebrat
, una creatura encargada de dirigir un grop de Zergs. Dins un premier ensemble de missions, lo jogaire deu protegir la crisalida Sarah Kerrigan. D'efiech, capturada per lei Zergs, l'ex-luoctenent dei Fius de Khoral es transformada per lei Zergs que son desiros d'aprofichar sei capacitats psionicas per renforcar sei forcas.
Dins lo resta de la campanha, lo jogaire e sei tropas son engatjats contra lo
cors expedicionari
dau templier protoss Tassadar. Amb sei forcas, Tassadar assaia d'enquistar sus lei Zergs per trobar un mejan de leis anientar. Aquo li permet de descubrir la resistencia dei cerebrats ais armas convencionalas. En revenge, descubris qu'un grop de Protoss eretics, lei templiers negres, a la capacitat de tuar definitivament un cerebrat. Pasmens, sa contra-ofensiva es arrestada e l'execucion d'un cerebrat per lei templiers negres permet a l'Overmind, l'esperit que dirigis lei neblas zergs de localizar Aiur, la planeta d'origina dei Protoss.
Lei darrierei missions fisadas au jogaire son donc destinadas a permetre l'invasion d'Aiur. En despiech d'una resistencia de part dei Protoss, lei Zergs prenon lo contrarotle d'un temple sacrat que permet a l'Overmind de s'installar directament sus la planeta e d'aumentar sa poissanca.
La darriera campanha dau joc comenca sus la planeta Aiur onte lo jogaire es cargat de dirigir de contra-ofensivas contra lei Zergs. Apres quauquei victorias, permet de redurre la pression militara exercida per lei Zergs e lo Conclave, lo conseu que comanda lei Protoss, decidis de lo mandar dins lo Sector Koprulu per arrestar Tassadar. Pasmens, a son arribada dins la region, lo jogaire chausis de ragantar lo templier rebel. Aquo entraina una guerra civila entre lo Conclave e la faccion fidela a Tassadar.
Durant aquelei combats, lei rebels protoss eliminan dos autrei cerebrats zergs gracias a l'ajuda dau contingent de templiers negres menats per Zeratul. Aquo permet de conclure una treva amb lo Conclave. Ajudats per lei Terrans de Raynor, lei Protoss de Tassadar e Zeratul atacan e destruson l'Overmind. Dins aquo, Tassadar es obligat de se sacrificar per assegurar la destruccion de la creatura.
StarCraft
recebet un acuelh positiu tant critic que comerciau. Lei sites Metacritic e GameRankings li donan respectivament de notas de 88% e 93%. Se certanei jornalistas observeron de similituds importantas amb de jocs precedents de Blizzard, la qualitat de l'intriga e de l'Univers creat e la diversitat dei tecnicas de joc necessarias per mestrejar lei tres faccions fogueron sotalinhadas. Au niveu comerciau, mai de 1,5 milions de copias fogueron vendudas en 1998 dins lo mond. Aqueu succes continuet durant leis ans seguents amb un totau de 11 milions de copias vendudas entre 1998 e 2009.
Gracias a aqueu succes, una extension,
StarCraft: Brood War
, pareguet en novembre de 1998. Prepausant tres campanhas e quauqueis unitats suplementarias, foguet tanben un succes amb 10 milions de copias vendudas entre 1998 e 2007. Lo joc venguet un classic dei competicions de videojoc. Puei, una seguida,
StarCraft 2: Wings of Liberty
,
foguet editada en 2010, totjorn per Blizzard.