Frederic Francois Chopin (geboaren as Fryderyk Franciszek Chopin ; 1. maart 1810 ? 17. oktober 1849 ) was nen poolsken musikskryver un pianovirtuoos in de romantik . Hee skreav voarnamelik stukke voar enkelspel up de piano . Wearldwyd is hee noch altyd bekend as eyne van de beste spoalers uut synen tyd, eyne "warvan syne dichterlike genialiteit egrunded was up ne professionele spoaltechnik dee ginnen gelyken had under syne tydgenouten." ^[1]

Chopin wor geboaren in ?elazowa Wola in et hartogdom Warsau un groiden up in Warsau , wat in 1815 deyl wor van et Poolske Kongres . As wunderkind rundden hee syne musikale upleiding af un skreav hee syne meysterwarken voar synen 20., do as hee uut Polen vord gung. Dat was noch ginne mand voar den Upstand van November 1830 . Med 21 kum hee in Parys torechte. In de latste 18 jar van syn leaven troad hee mar 30 mal up. Hee spoalden et leevste in kleine salons. Underholden deade hee sikselv doar syne stukke to verkoupen un musiklessen to geaven. Dar wolden se em wal voar hebben. Hee wor kameroade med Franz Liszt un kunde reakenen up voale bewundering van voale van syne musikale tydgenouten, sou as Robert Schumann .

Tusken 1836 un 1837 was he verloyvd med Maria Wodzi?ska, mar dat gung uut. Ouk had hee noch ne lastige verkeyring med de franske skryvster Aurore Dupin (bekend under oare skryversname George Sand). Hee gung tusken 1838 un 1839 kort med oar nar Majorka , mar dar was weinig an. Et hulp em wal skryven. Et was eyne van de periodes at hee et meyst uut de vingers kreag. In syne latste jaren kreag hee regelmatig geld to estoaken van ne leevhebster, Jane Stirling, dee as em ouk na Skotland hen noydigden un voar de reise betaalden in 1848 . Et meyste van syn leaven was Chopin en seek un fragil man. Hee storv in Parys in 1849 do as hee 39 was, warskynlik an pericarditis of tbc .

Invloden up syne kompositystyl sint poolske volksmusik, de klassike traditys van Bach , Mozart un Schubert, un de sfeer van de paryske salons waras hee vake kum. Syne vernying in styl, harmony un musikalen form, un ouk syne verbinding van musik med nationalisme, hadden grouten invlood up de romantik.

Chopin wor by leaven al beroomd. Hee was eyne van de eyrste sterren. Deyls vanweage syne (indirekte) banden med upstandigen, syn leevdesleaven wat voar volk un vaderland breyd uutemeaten wor un synen doud up sou jungen leavtyd. Syn leaven is meyrmals verfilmed, med verskillende maten van betrouwbarheid. Et poolske parlement richtden et Fryderyk Chopin Instituut up um syn leaven un warken to undersoken un an to jagen. Se holdet regelmatig ouk de Internationale Pianowedstryden van Chopin, waras deylneamers enkel syne warken magt spoalen.

Brunnen [ bewark | bronkode bewarken ]

1. ↑ Rosen, Charles (1995). The Romantic Generation . Cambridge, MA: Harvard University Press. ISBN 978-0-674-77933-4 .