Ny fiteny tseky dia anisan' ny fiteny slava andrefana, miaraka amin' ny fiteny kasoba , ny fiteny poloney , ny fiteny slovaka , ny fiteny soraba , izay sampan' ny fianakaviam-piteny indo-eoropeana . Tenenina indrindra ao Tsekia io fiteny io, izay tenenin' ny olona miisa 11 tapitrisa any ho any. Atao hoe ?e?tina io fiteny io amin' ny fiteny tseky.

Ny fiteny tseky dia manakaiky ny fiteny slovaka sy ny fiteny poloney ary ny fiteny rotena (na roteniana). Ny ankamaroan' ny olon-dehibe tseky sy slovaka dia afaka mifankahazo fiteny. Izy ireo mantsy, tamin' ny andron' i Tsekoslovakia , dia nifanerasera lalandava amin' ireo fiteny roa ireo tamin' ny alalan' ny fampielezam-peo sy ny fahitalavi-pirenena. Ny sekoly koa dia nanolotra angano ho an' ny ankizy amin' ny fiteny faharoa mba hanazarana azy. Samy niteny amin' ny fiteny roa ny olona tsirairay ary tsy nifarana izany raha tsy tamin' ny fivakisan' i Tsekoslovakia tamin' ny Janoary 1993 ka namorona an' i Tsekia sy i Slovakia . Ankehitriny, ny Tseky sy ny Slovaka dia mbola manana fandaharana am-pahitalavitra iraisana. Na dia izany aza, ny ankizy sy ny tanora izay tsy mahalala ny fotoanandron' i Tsekoslovakia dia sahirana amin' ny fahazoana rehefa mampiasa teny sasany tena hafa, na rehefa mihaino fitenenana haingana.

Noho ny hasaro-drafitry ny fiteny tseky dia heverina ho sarotra ny mianatra azy. Izany hasaro-drafitra izany dia vokatry ny endri-pandrafetan-teniny sy ny rafi-pifehezanteniny. Toy ny fiteny slava rehetra (afa-tsy ny fiteny bolgariana vaovao sy ny fiteny makedoniana vaovao), ny teny ( anarana , mpisolo tena , mpamaritra ) dia miova endrika arakaraka ny anjara asa sahaniny ao amin' ny fehezanteny . Amin' io lafiny io, ny fitsipiteny tseky sy slava dia akaiky kokoa ny fiaviana indo-eoropeana raha ampitahaina amin' ny fiteny indo-eoropeana hafa, izay nanjary nihavitsy ny fiovan' endrika araka anjara asa (toy izay mitranga amin' ny fiteny alemana ), na nanjavona mihitsy aza (toy izay miseo amin' ny fiteny frantsay ).