Riforma protestante
: Movimento religiozo comensou in Germania inte l'anno 1517 ch’o l'a provocou a scision inta Gexa Crestiann-a. O l'a avuo asci de consegoense culturali, politiche e economiche.
Catolichi e protestanti inte l'Ouropa centrale into 1618
E raxoin da “Riforma” son principalmente de caratere religiozo. A corucion, a degeneracion morale e spiritoale tanto difuze inta Gexa de Romma son stæte o pretesto perche o
Martin Lutero
o fisesse inte 95 texi (atacæ a-a porta da Gexa de
Wittenberg
a-i 31 d’otobre do 1517) quello ch’o l’ea o so pensceo religiozo. Queste texi che ean contra o scandalo de indulgense e afrontavan i problemi do pecou, da penitensa e da gracia inte ’na neuva letua di Evangei co-in neuvo anoncio de quella ch'a l’ea a libera gracia de Dio dæta a ogni pecato indipendentemente da-i so meriti.
I Principi tedeschi, che ma soportavan o potere de Romma ch’o no ghe permeteiva d’agi liberamente into governo di so teritoi, fan subito so questa “Riforma” e a l’e questa a raxon da scision co-a Gexa Catolica. Questa scision a l'a provocou lotte asæ due fra quelli ch’acetavan questa neuva vixon do Crestianeximo e quelli in cangio fedeli a-o Pappa. Queste lotte son finie co-a paxe d'Aogosta (into 1555) quande a divixon fra Catolichi e Protestanti a l’e diventa definitiva in baze a-o principio cuius regio, eius religio, ch’o l’imponeiva a-i suditi de segoi a religion do so Principe. A dotrinn-a luterann-a (dita poi protestante perche quelli chi-a segoivan “protestavan contra o Pappa) a s'e difuza sorvetutto in Germania e inti paixi nordichi. In Inghiltæra a l’a avuo caratere prevalentemente politico quande a l’e stæta inposta da l'
Enrico VIII
.
Martin Lutero int'in dipinto de Lucas Cranach (Uffizi)
No solo in Germania gh’ea questa difuza rouxia verso o potere do Pappa e da Gexa Romana. In Svisera, a Zurigo, o
Huldrych Zwingli
, con l’arenbo de Aotoritæ do posto o l’aveiva le asci proposto de Riforme contra o Pappa e a Curia Romana. Morto le, e so idee son stæta repigiæ da-o
Gioane Calvin
ch’o l’a reize ancon ciu severe e o l’a realizou ’na streita organizacion teocratica pontando sorvetutto in scio tema da predestinacion. A Riforma Luterann-a a l’a inpedio a-e idee do Calvin d’afermase inte l'Ouropa do Nord, ma se son asæ difuze inte neuve tære americane portæ da chi, persegoitou in Ouropa, o s’ea rifugiou la.
In Inghiltæra, paize catolico e asæ ligou a-o Pappa, o re
Enrico VIII
, pe raxoin politiche e naturalmente economiche (i paixi a-o de la de Arpi ma soportavan de dovei paga pe mantegni a Gexa de Romma), o l’a provocou ’n scisma ch’o l’a mantegnuo quella ch’a l’ea l’organizacion de baze da Gexa Catolica, ma aplicando a teologia da Riforma. Questo o l’a provocou lotte due e sangoinoze che in quarche moddo son ancon prezenti inte l'
Irlanda do Nord
(Ulster) donde Catolichi e Anglichen son de longo a-i færi curti.
Queste neuve vixoin do Crestianeximo an dæto vitta asci a sette e movimenti religioxi duamente contrastæ segge da-i catolichi che da-i Riformisti.
O principio baze da Riforma protestante o l’e chi-a sarvessa a s’otegne solo co-a fede e no co-e indulgense. Son refuæ dotrei Sacramenti (o bateximo e a comenion) e vegne afermou o principio che fra Dio e l’ommo no gh’e nisciun intermediaio. O Pappa o no gh’a donca nisciunn-a aotoritæ e questo principio o l’e sostitoio da-o “libero ezamme” e da-a responsabilitæ do credente davanti a Dio e a-o so proscimo. Co-a “Riforma” vegne eliminou a diferensa fra cego e laico e introduto a distincion fra o potere civile e quello ecleziastico: da questa distincion nasce o processo de secolarizacion da socjetæ.