Albert Camus tir francaf suterotik isu trakopik : berpot, berpotam, wenyaxa, trakopaxa, felaxa.

1913-1932 : Kimtaf rumeugal [ betara | va krent beta ]

Albert Camus koe Mondovi ( re Aljazair  ) ba 7/11/1913 koblir. Tir taneaf nazbeik ke Lucien Camus, tawamiduraf dodelik, is Catherine Sintes, jotafa zanisikya vey espanafa xanta megrusutesa is wavdon muxawesa. Lucien Camus bak Taneafa Tamavageja zo tixar nume bak Marne Meld di xonuker. Jotaf Albert va gadikye me di grupeyer. Gadikya ko tana wawafa revava ke Aljazair, Belcourt, bam koirubar. Tuke pomara ke tan tavesik, Albert Camus va filav seotar nume koe Bugeaud olda ke Aljazair batkane wan rovayar. Va daava va nugaviputi ( vanpis senzasusik ) is trakopa kosmar. Aze kotcakoler, batdume va cugadob va trakopa me di tcilkar.

1932-1944 : Sayudasik is acagisik [ betara | va krent beta ]

Bak 1932 va ekul seotar aze va trakopa toz vayar. Battandon koe kotlafa virda va konak taneaf teliz sanegar. Bak 1934 va Simone Hie kurer ise ta fukorlara va vayara is pomoyara va olegara ke tolonga va konaka exavama goksuber. Bak 1935, va doevafo pako yoter voxe arti tolda bulutur. Bak 1936, miledje gu trakopa zo dobar, va Wenya ke Kobara redur ise do baroy nik va Revolte dans les Asturies ( Kevmadara koe Asturias ) , va kopoutuna drunta. Va jontika drunta zirser ise zaler : Vligurugal ke Andre Malraux , is Wadra ke Gorki , is Karamazov baroye berikye ke Dostoyevski . Bak 1938, vanpir felik koe Alger-Republicain fela lize va yon aljazairaf gaderopaf jiz tulon gomunester.

Walvedeyafa debala sotcewer. Alger-Republicain ten awir nume Albert Camus ko Paris mallapir lize dene Paris-Soir zo vilter. Va Simone Hie solyerumar, aze va Francine Faure tolyerumar.

Bak 1942, vanmiae acagis lizor sayudar ise va yon teliz ko Combat fela sanegar. Battandon, dene Gallimard va L'Etranger (  Diveik  ) is Le Mythe de Sisyphe ( Vund va Sisifos ) sanegar. Bata toloya neva va jontik jotaf belisik koteyad nume batviele Albert Camus va fiuntuca vansar.

Bak 1944, va Jean-Paul Sartre kakever. Bantel galper da in va Huis clos ( Ton budeyen tuvel ) drunta di konakilar. Batugale toloy trakopik non skedad : ≪ mafelafa etekara va korik is grabom ≫ ~ Sartre icde Camus suter. Soe skedara di blokapar.

1945-1957 : Viltes vrutasik [ betara | va krent beta ]

Bak 1945, tir redura va Caligula . Kaiki tolda, va kiewatcapaf La Peste ( Keftakola ) berpot sanegar. Miltandon va Combat fela bulur.

Bak 1951, sanegara va L'Homme revolte ( Kevienik ) va belcafa glebara ke yon vamoegeltrevik isu kruldevik gu Camus vodar. Taneon ke yon vamoegeltrevik : Andre Breton tir yatkaf gu konaka draga icde Lautreamont is Rimbaud . Luxe kruldevik, sin evied, sanegason va malyopapas teliz koe Les Temps modernes , koe virda gadena gan miv Sartre. Arti tanda, kaljoara wal Camus is Sartre di tir.

Batugale Camus va Aljazairafa debala kranavepeson blidar. Koe Express fela kan konak teliz kotirkar lize nedir da va bata piza dum ≪ ilkafa volkalaca ≫ blidar. Ko Aljazair ta kabera va tolnepalera dace di lapir. Giopon. Bak 1956, va La Chute ( Akeoyera ) sanegar ; va sonus is xayes grabom golde oxuca is rotatrakusuca.

1957-1960 : Nobel poradro is awalkera [ betara | va krent beta ]

Bak 1957 Albert Camus va L'Exil et le royaume (  Divblira is Gazaxo  ) sanegar, larma dem tevoy warzot icde bali. Va Nobel suterotafo poradro bak saneaksat ke 1957 zilukur, joke "varaf grabom kolupuson koafis va zvakeem batugale sokis ta ayafa jiluca". Bam tir 44 ^-daf is gablen lerdeaf francik. Va dewitca gu Louis Germain tarizar, gu tavesik noveyes da wan vayayar. Gan konak miltik zo sendar : tulon Roger Martin du Gard is Francois Mauriac is William Faulkner . In wori batcer : co galpeyer da bata poraca pu Andre Malraux krupten dum feliik zo yofter. Kaiki barda, ba 04/01/1960 bal diremwalta xonuker. To bali. Koe direm metenukeyes nubasuteks va Le Premier homme ( Taneaf ayik ) di zo trasir.

Ozwaks [ betara | va krent beta ]

Albert Camus va konak grupecken ozwaks al isker.

Kalkotavayan suterot [ betara | va krent beta ]

• Yon ozwaks ke Albert Camus (  Citations d'Albert Camus ), kalkot- 2015 gan Angela Wagner, Wikikrenteem dotay, banliz
• Emudenik, Divblira is Gazaxo (  L'Hote, L'Exil et le Royaume ), berpotam kalkot- 2012 gan Daniel Frot, Wikikrenteem dotay, banliz
• Foredonesikya, Divblira is Gazaxo (  La Femme adultere, L'Exil et le Royaume ), berpotam kalkot- 2013 gan Daniel Frot, Wikikrenteem dotay, banliz

• Kev edegaora : felavil ba 8-e ke anyusteaksat ke 1945, Combat fela (  Contre la bombe nucleaire, editorial du 8 aout 1945, journal Combat  ), felavil kalkot- 2014 gan Damien Etcheverry, Wikikrenteem dotay, banliz