O Sacro Imperio naixio d'a Francia Oriental d'as tres en as cuals se trestallo l' Imperio Carolinchio en 843 ( Tratato de Berdun ). En Francia Oriental a dinastia carolinchia s'extinguio en l'anyo 911 y ye esleito rei o duque de Saxonia , Henrique o paixarero . En l'anyo 925 adquiere Lotarinchia . Henrique o paixarero ye succedito por o suyo fillo Oton I en l'anyo 936 . Oton I adquiere o Reino d'Italia en l'anyo 951 . O Sacro Imperio Romano Chermanico naixe oficialment cuan en 962 Oton I de Saxonia recibio a corona imperial en Roma por la suya aduya contra Berengario II d'Ivrea . O 13 de febrero Oton I reconoixeba bellas concesions a lo pontificato, pero establiba que os papas no podesen estar consagratos sin churar enantes fidelidat a l'emperador.

En relacion con l'Imperio Carolinchio o Sacro Imperio Romano Chermanico no incluiba o territorio d'a dita Francia Occidental y yera constituito por os ducaus chermanicos de Saxonia , Franconia , Ducau de Suabia y Bavera y por o territorio en parte romanz de Lorena . Comprendeba zonas limitrofes como Austria , Carintia y las marcas d'o nord-este, Bohemia , Moravia , norte y centro d'Italia: Piemont , Liguria , Toscana , Romanya , Veneto y Lombardia , a mes d'os Estatos Pontificios . En 1032 Baixo o reinato de Conrado II s'adhibio o Reino de Borgonya , con o Ducau de Provenza como apendiz.

L'apocheu de l'imperio estio con Henrique III . Baixo este periodo l'autoridat de l'emperador prevaleixio sobre l'autoridat d'os papas y suya eleccion, tamien procuroron dirichir a las autoridaz relichiosas de Chermania d'alcuerdo con as suyas conveniencias. Esta situacion se convertio en conflictiba cuan a reforma clunyacense y l'aparicion de dos papas con muita personalidat: Nicolau II y Gregorio VII . Por un decreto pontificio de 1059 os papas encomenzoron a ser esleitos por o conclau u colechio de cardenals por sufrachio secreto, a lo tiempo que os papas feban liga con os prencipes normandos . A perduga d'o poder d'eleccion d'os papas por part d'os emperadors estio o primer paso pa que a Ilesia s'independizase de l'imperio y planteyo o conflicto entre os dos “poders universals”, l'Imperio y o Papato por o dominium mundi dica desembocar en a Baralla d'as Investiduras , que implico o fracaso d'a casa de Franconia debant d'a Ilesia o enfeblimiento d'a reyaleza debant d'os grans sinyors d'o Reich.

A luita por o dominium mundi contino baixo os Hohenstaufen , sobretot dende Frederico I Barbarroya y se sumo a ixa luita l'elemento comunal, con a participacion d'a Liga de Lombardia , que quereba aproveitar pa os suyos fins esta luita. Frederico II consiguio o trono de Sicilia y prebo de fer mes fuerte l'imperio baixando-ie o suyo centro politico, pero topeto de nuevo con l'aristocracia pontificia.

A fins d'o sieglo XIII as comunidaz ciudadanas yeran prou prosperas como pa autogobernar-sen y mirar-sen primero por os suyos intreses que por os de l'Imperio, d'esta traza fue desapareixendo a ideya teocratica d'a cristiandat gobernata por o Papa y lo Emperador. L'imperio yera cada vegata mes restrinchito a lo norte chermanico y s'enfebliba por a luita. En 1356 Carlos IV de Luxemburgo proclamaba a bula d'Oro y depositaba a eleccion de l'emperador en mans de siet prencipes: o duque palacin d'o Rhin, o rei de Bohemia , o duque de Saxonia y o marques de Brandemburgo chunto con os arcebispes de Maganza , Colonia y Treveris . Dende 1438 con Alberto d'Habsburgo a eleccion se limito a los miembros d'a familia Habsburgo .

L'imperio s'iba fraccionando y se creyaban feudos independients, obligando a la formacion de dietas, imposar tributos cheneralizatos y formar un redueito exercito, pero estas mesuras no impidioron que o cisma protestant rematase por fragmentar pa cutio l'Imperio en tiempos de Carlos V . A la suya muerte o titol imperial perdio valideza. Ferrando III querio reviscolar-lo y nombro un nuevo elector, o duque de Bavera en 1648 , pero a paz de Westfalia en ixe mesmo anyo feba terminar a guerra d'as trenta anyatas y reducio l'imperio a una ficcion politica. Leopoldo I conchuro o perigl' turco en Europa Central y estio o verdadero iniciador de l' Imperio Austriaco . En ixos tiempos Prusia encomenzo o suyo camin enta a hechemonia en o norte d'Alemanya y obligo a desplazar o centro de l'imperio enta lo sud con Carlos VI d'o Sacro Imperio Romano Chermanico , qui prebo de creyar un nuevo eixe Espanya-Imperio. D'esta traza a decadencia yera ya un feito consumato y a fins d'o sieglo XVIII y principios d'o sieglo XIX a Francia revolucionaria se disputaba con os Habsburgo bels territorios alemans. A Dieta de Ratisbona en 1803 y o tractau de Presburgo en 1805 facioron retacular a influencia austriaca en Alemania en beneficio de Francia, esgallando-ne Bavera y Wurtemberg . Encara que Francisco II se proclamase emperador d' Austria en l'anyo 1804 como reaccion a la formacion d'o Primer Imperio Frances , a derrota d'a coalicion d' Austria , Rusia y Anglaterra en a Batalla d'Austerlitz en 1805 imposo o tractau de Presburgo y una nueva reorganizacion d'Alemanya. En chulio de 1806 sece prencipes alemans forman a Confederacion d'o Rin ( Rheinbund ) y en agosto de 1806 Francisco II renuncia a lo titol d'emperador aleman presionato por Napoleon Bonaparte .