|
karbengan
|
Dagiti obra a literatura ken ania man nga articulo a nakapaskil ken/wenno nakalebben iti daytoy a sitio ket addaan ? karbengan/kalintegan ti panangipablaak wenno panangimaldit dagiti maseknan nga autor/mannurat. Malaksid no naibatad iti sabali a wagas, kaaduan kadagiti sinurat ditoy ket nakalisensia iti babaen ti
Creative Commons License by-nc-nd 2.5
. Sumagmamano met ti maiwaras iti babaen ti lisensia a
GFDL
. Ania man a panggep a panangaramat kadagiti articulo ditoy a sitio, sibubukel man wenno paset laeng, iti ania man a wagas wenno sukog, ket nasken nga ipakada nga umuna iti/kadagiti autor ken/wenno agiggem iti karbengan ti panangipablaak, para iti tumutop a pammalubos.
|
|
 |
|
adtoyen ti dadapilan.com...
|
|
Kamaudiananna, adtoyen ti
dadapilan.com
. Nabayag daytoy a nain-inaw, namulmulmulan iti isip ken iti rikna, ket itan naipasngayen ken agmatan.... Dadapilan, malaksid a maysa a napatak ken teddek a simbolo ni Ilokano ken ti Kailokuan, ipalnaad ken ipamutektekna ita babaen ti
dadapilan.com
ti maysa a naisangayan a sitio wenno naiduma nga ummong a pagsasarakan ken pakasarakan kadagiti matubbo ken madapil a nainliteraturaan ken nainkulturaan a kapampanunotan, maluto a bennal, mayadi a sam-it ken ingel ti tagapulot man wenno basi nga agtalinaed ken agnayon. Umaykay' ngaruden ta agdapiltayo iti kurdit, isip, sirmata, parmata, mutektek...
|
|
sinurat, damag, pakaammo, kdpy.
|
|
|
|
|
|
Miting ti GF Board no Marso 4
|
|
|
|
|
Impaskil ni paraposte
|
|
Tuesday, 13 February 2007
|
Inton Marso 4, 2007 ti maudi a board meeting ti GUMIL Filipinas (GF) sakbay ti pannakaangay ti maika-39 a national convention ken literary seminar ti gunglo inton Abril 13-17, 2007 iti Currimao, Ilocos Norte.
Maangay ti miting iti Currimao babaen ti panangsangaili ni Elizabeth M. Raquel, GF Director ken presidente ti GUMIL Ilocos Norte.
Para iti dadduma pay nga informasion, umawag/agtext message iti ania man kadagitoy a numero: 0917-4706382, 0920-6754671, 0921-4285950.
(Manipud iti BANNAWAG/Leo S. Fagaragan)
|
|
Tao ken ayup iti RFAAFIL 2007-2008
|
|
|
|
|
Impaskil ni paraposte
|
|
Sunday, 11 February 2007
|
Tao ken ayup. Dayta ti tema ti sarita a suraten iti maika-6 a pasalip ti Reynald F. Antonio Awards for Iloko Literature (RFAAFIL), iti 2007-2008, kalpasan a natratar ti maipapapan iti familia, panagsakripisio, pagsapulan, panaggayyem, ken ayat.
Iti salip iti daniw, nawaya ti mannaniw a mangpili iti temana ngem nasaysayaat no ti daniw ket maipanggep met laeng iti tao ken ayup. Ruknoy iti www.rfaafil.com, panaggayyem, ken ayat dagiti tema a natratar kadagiti napalabas a pasalip iti daniw.
Kas iti nakaisigudan iti salip iti sarita, maipaay ti premio a P10,000 iti mapili nga umuna a gunggona. P7,000 iti maikadua, P5,000 iti maikatlo, P3,000 iti maikapat, ken P2,000 iti maikalima. Iti daniw, P2,000 ti umuna a premio; P1,500 ti maikadua, P1,000 ti maikatlo, ken sag-P500 iti dua a consolation prize. Maikkan pay iti sertipiko ti pammadayaw dagiti mangabak ken maipaay ti Reader's Choice Award iti sarita ken iti daniw a magustuan dagiti agbasbasa.
Basaen ken pagtutungtungan ti kompleto a pagannurotan ti salip iti sarita ti RFAAFIL 2007-2008 iti dap-ayan ti dadapilan.com.
Basaen ken pagtutungtungan ti kompleto a pagannurotan ti salip iti daniw ti RFAAFIL 2007-2008 iti dap-ayan ti dadapilan.com.
|
|
Palanca Awards 2007, silulukaten
|
|
|
|
|
Impaskil ni paraposte
|
|
Friday, 09 February 2007
|
Pinnalancaan manen. Agawaten ti Palanca Foundation kadagiti entries para iti maika-57 a Carlos Palanca Memorial Awards for Literature, itoy a 2007. Rugianyon dagiti pakisalipyo, wenno ipatulodyon dagiti nabayagen a pekpekkelan ken paypayubyubanyo a pakipallot a sinurat. Ngem saan a 'tay pakipolis laeng, a, a baud, 'tay pakiderby ti pakitadiyon!
Deadline inton tengnga ti rabii ti Abril 30, 2007, lukat ti salip iti amin a Filipino ken amin a sigud a Filipino citizens (kayatna a sawen, uray dagiti Filipino a sabalin ti citizenshipda, dagiti addat' abroad), iti katkategoria nga ababa a sarita, sarita para ubbing, salaysay, daniw, maysa-a-parang a drama, drama, ken screenplay. Tagalog (Filipino) ken English dagitoy (malaksid ti screenplay a Filipino laeng). Adda pay laeng Iloko, ken Cebuano ken Hiligaynon, ngem iti laeng sarita. Naikkaten dagiti kategoria a futuristic fiction ken teleplay.
Downloaden iti sarusar ti dadapilan.com ti kompleto a pagannurotan ti salip, ofisial nga entry form, ken authorization form.
Basaen ken pagtutungtungan iti dap-ayan ti dadapilan.com ti kompleto a press release ken kompleto nga annuroten ti Palanca Awards 2007.
|
|
Direktorio ti GUMIL Filipinas, maisagsagana
|
|
|
|
|
Impaskil ni paraposte
|
|
Saturday, 27 January 2007
|
Isagsaganan ti GUMIL Filipinas (GF) ti GUMIL Direktorio 2007 ti gunglo a pakailaonan ti ababa a pakasaritaan dagiti agdama ken pimmusayen a mannurat a nagkameng iti GF manipud iti 1969 agingga iti 2007.
Mairaman pay iti direktorio dagiti sumaganad: GF Constitution and By-Laws (agraman amendments a naaprobaran, no adda); dagiti provincial ken overseas chapters ti GF; listaan ti awardees iti Pedro Bucaneg, Leona Florentino, Cornelio Valdez, UMPIL, Carlos Palanca, kdpy.; listaan dagiti nangab-abak kadagiti pasalip iti literatura ti Bannawag ken dagiti nadumaduma a naituyang a salip iti daniw, ababa a sarita, novela, salaysay, saribitniw, kdpy. Addanto pay dagiti mainterbiu a mannurat a mairaman.
Narugian idi Enero 2006 a nasukisok dagiti kasapulan a materiales iti maisagsagana a direktorio. Kadagiti maseknan a chapters ti GF, ipatulod babaen ti email dagiti masapul a documento iti
This email address is being protected from spam bots, you need Javascript enabled to view it
, attention: GF SecGen ken Special Projects Committee Chair Djuna R. Alcantara. No maimakinilia ti ipatulod, iturong ti surat iti No. 4, Acacia St., Namnama Village, San Fernando City, La Union. Pebrero 28, 2007 ti deadline ti panagawat ti Komite kadagiti maipatulod nga updated profile ken ladawan dagiti mannurat a kameng ti GUMIL Filipinas.
(Naadaw iti BANNAWAG/DRA)
|
|
SABALI Awards 2007, naluktan
|
|
|
|
|
Impaskil ni paraposte
|
|
Saturday, 27 January 2007
|
Naluktanen ti Maikatlo a Salip iti Mini-Novela iti 2007 nga esponsoran ti Savella-Baclig Literatura Ilokano (SABALI) Awards, kas impakaammo ti agpapaay a secretariat ti salip, ti
SALINONG dagiti Mannurat nga Ilokano
nga ipabpablaak ni Atty. Nole V. Lansangan ti San Mateo, Isabela.
Uray ania ti tema ti isalip a mini-novela, agatiddog iti 13 a paset wenno chapter a ti kada paset ket agatiddog iti maysa a panid a regular bond paper, single spaced, naimakinilia wenno uray naisurat iti ima basta nalawag a mabasa.
Ipatulod ti pakisalip iti uppat a kopia, iti di naladladaw ngem Mayo 31, 2007 iti SALINONG, c/o Atty. Nole v. Lansangan, Publisher-Editor, Purok 1, Villa Cruz, San Mateo, 3318 Isabela.
(Naadaw iti BANNAWAG)
|
|
Timpalak Talaang Ginto sa Tula 2007
|
|
|
|
|
Impaskil ni paraposte
|
|
Friday, 26 January 2007
|
Lukat manen ti Timpalak sa Talaang Ginto sa Tula ti Komisyon sa Wikang Filipino (KWF) para iti 2007. Rambol daytoy dagiti agdadamo man wenno premiado wenno bangolanen a mannaniw iti Tagalog wenno Filipino. Malaksid a maukkoran iti titulo a "Makata ng Taon" ti mangabak iti umuna a gunggona, maikkan pay iti P15,000 ken tropeo. Sag-P10,000 ken P8,000 met iti maikadua ken maikatlo, ken tallo a sag-P3,000 a pammadayaw-dakamat ti maited.
Padasenyo man ketdi, dakkel a dayaw daytoy, agasem maysa nga Ilokano nga agsursurat iti Iloko, mangabak iti salip iti panagputaran iti daniw a Tagalog? Adu metten ti Ilokano nga agsursurat iti Iloko a nangab-abak iti Talaang Ginto, kas ken ni Apo Reynaldo A. Duque a nabalangatan payen a "Makata ng Taon," ken da Appo Daniel L. Nesperos, Joel B. Manuel, Prodie Gar. Padios, Ariel S. Tabag, kdpy.
Isu a padasenyo man. Agputar wenno ipatulodyon dagiti daniwyo a Tagalog. Nasken nga orihinal ti daniw, nawaya ti tema. Mabalin ti mangipatulod iti uray mano nga entry, kas kuna ti KWF, ti maysa a mannaniw. Agaramat iti parbo a nagan iti entry a daniw. Isobre ti papel a nakailanadan ti pudno a nagan, adres ken ababa a biodata sa isurat iti rabaw ti seliado a sobre ti paulo ti daniw ken ti parbo a nagan nga inaramat.
Deadline ti panagisumite iti entry inton 5:00 ti malem no Marso 16, 2007. Ipatulod wenno ited a personal ti entry iti 1610 Watson Building, J. P. Laurel St., San Miguel, Manila. Mapadayawanto dagiti mangabak no Abril 2, 2007, iti Plaza Beata, Pandacan, Manila.
Para iti dadduma pay nga informasion, umawag iti Dibisyon ng Impormasyon at Publikasyon ti KWF: 736-3832, wenno iti ofisina ni Komisioner Joe Lad Santos, c/o Ms. Lorna Lynn L. Wenceslao: 736-3830 local 103.
|
|
NAKEM 2007, maangay iti MMSU
|
|
|
|
|
Impaskil ni paraposte
|
|
Friday, 19 January 2007
|
Maangay iti Filipinas, babaen ti panangsangaili ti Mariano Marcos State University iti Batac, Ilocos Norte, ti 2007 NAKEM International Conference nga addaan tema a "Panagpanaw ken Panagindeg: Exile and Settling in Ilokano and Amianan History and Culture," inton Mayo 22 agingga iti 25, 2007.
Imatmatonan ken tartarawidwidan ti Ilokano and Philippine Drama and Film Program ti University of Hawai`i iti Manoa, Honolulu, Hawai`i, ti NAKEM Conference, nga agpanggep a mangam-ammo ken mangyam-ammo ken mangintandudo iti kultura ken literatura ang Ilokano ken ti Amianan ken immuna a naangay iti Hawai`i idi Noviembre 9-12, 2006, ket maysa a pagkakammayyetan a programa dagiti naduduma nga institusion ti adal iti Estados Unidos, Filipinas ken dadduma pay a pagilian.
|
|
Basaen ti katuloyna...
|
|
Asino dagiti mangabak iti Tugade Awards 2006?
|
|
|
|
|
Impaskil ni rva
|
|
Thursday, 18 January 2007
|
Asinoda ngata? 'Sinnoda ti pugtoyo? Ania a sarita? Apay?
Nakalabesen ti 2006. Nakompleto met ngaruden dagiti bilang ti
Bannawag
a rimmuaran dagiti sarita a pakapilian ken pakapadayawan dagiti mapangabak iti 2nd Tugade Awards (2006). Kadagitoy a kanito, mabalin nga addan iti ima dagiti hurado dagiti kualipikado a sarita.
Adda inaramidko ti bukodko a listaan kadagiti (kunaek a) kualipikado a sarita a mairaman a mapagpilian. 60 amin a sarita. Daytoy 60 a sarsarita ti nailistak kalpasan nga inanusak a pinilian, kayatko asawen, saanko nga inraman dagiti rimmuar a sarita a premiadon ken dagiti reprints (saan a kualipikado dagitoyen iti salip).
Adda met sangkabassit a panirigan ken paliiwko maipapan kadagiti entries (a nabasakon iti Bannawag). Ken adda met inlistak a top 10 dagiti pagarupek a mangabak a sarita.
Ammuen dagiti 60 entries ken pagtutungtungan ti maipapan iti Tugade Awards 2006 iti dap-ayan ti dadapilan
|
|
Impaskil ni paraposte
|
|
Tuesday, 16 January 2007
|
Ipakaammo ti Tugade Foundation ti California, U.S.A. nga ituloyna ti pannakapili ken pannakapadayaw dagiti kapipintasan a sarita a rummuar iti BANNAWAG iti 2007, babaen ti pannakalukat ti 3rd T. Gabriel Tugade Awards a pakapilian ti lima a kapipintasan a sarita a maipablaak iti BANNAWAG manipud iti Enero 1 agingga iti Disiembre 31 a bilang ti magasin.
Kas kinuna ni Terry Gabriel Tugade, President ken Chief Executive Officer ti Tugade Foundation,
"makaay-ayo dagiti sarita a rimmuar iti BANNAWAG iti 2006 ket patienmi a kastoy manen itoy a tawen no
di man pataranda dagiti rimmuar iti 2006; ngarud, ad-adda pay a malinglingay dagiti readers 'toy
kangrunaan a magasintayo nga Ilokano."
(Naadaw iti BANNAWAG)
Ammuen ken pagtutungtungan dagiti pagannurotan ti 3rd T. Gabriel Tugade Awards iti dap-ayan ti dadapilan
|
|
Nominasion iti Bucaneg, Florentino Awards 2007
|
|
|
|
|
Impaskil ni paraposte
|
|
Thursday, 11 January 2007
|
Agawaten ti Awards Committee ti GUMIL Filipinas (GF) kadagiti nominasion para iti Pedro Bucaneg Award (para kadagiti lallaki a mannurat) ken Leona Florentino Award (para babbai a mannurat) iti 2007.
Mainaig itoy, maipakaammo kadagiti kameng ken ofisial ti nadumaduma a chapters ti GF, a maidatag koma dagiti nominasion babaen ti pannakaipatulod dagiti pagbatayan dagiti agpili a hurado ti dua nga awards kas koma iti pirmado ti GUMIL Chapter President/Chapter Officer a panangilawlawag no apay a rebbengna nga umawat iti Bucaneg wenno Florentino Awards ti inominarda a mannurat, pammaneknek iti pammadayaw ti nominado, listaan ti sinurat ti nominado, kdpy.
(Naadaw iti BANNAWAG)
Basaen ti kompleto a requirements ti nominasion ken pagtutungtungan ti Bucaneg/Florentino Awards 2007 iti dap-ayan ti dadapilan
|
|
Deadline ti Judge Costales Awards, naisapa
|
|
|
|
|
Impaskil ni paraposte
|
|
Wednesday, 10 January 2007
|
Gapu iti pannakaisapa ti pannakaangay ti national convention ti GUMIL Filipinas (GF) iti Abril 13-15, 2007 imbes nga iti maudi a lawlawas ti Abril kas gagangay a nakaisigudan, naisapa met ti deadline ti panagidatag iti entries a daniw ken sarita iti Senior Citizens Literary Contest ti
Judge Joven F. Costales Literary Awards (JJFCLA)
. Manipud iti sigud a Marso 15, 2007, agbalinen a
Febrero 28, 2007
ti deadline ti panagidatag, kas impakaammo ti JJFCLA Secretariat.
(Naadaw iti BANNAWAG)
Basaen ti pagannurotan ti JJFCLA iti dap-ayan ti dadapilan.
|
|
Impaskil ni paraposte
|
|
Thursday, 04 January 2007
|
US$10,000, dandani kagudua a riwriw a pisos. Dayta ti kuarta a premio iti kallukat a Man Asian Literary Prize itoy a tawen. Daytoy ti Man Booker Prize iti Asia. Para laeng kadagiti mannurat nga Asiano a pakairamantayo a Filipino. Ken datayo nga Ilokano, a, siempre. Nupay English a novela ti nasken a suraten a pakisalip, apay, di kad' kabaelan ni mannurat iti Iloko ti agsurat met iti English? Pagsayaatanna pay, mabalin ti patarus. No adda novelayo nga Iloko, mabalinyo nga ipatarus iti English sayo isalip. No masadutkayo a mangipatarus a mismo iti novelayo, mabalinyo nga ited iti maysa a translator ta no mangabak ti novelam, uray ti translator ket adda met abakenna a US$3,000 (dimo no kuan pakarikutan a pabaratuan wenno tangdanan ta adda met apagna a premio)!
Maysa pay a pakaidumaanna daytoy a salip kadagiti pasaliptayo iti literatura kas pagarigan iti Filipinas, ket ti banag a
nayanunsio wenno naipakaammon a sigud no asino dagiti hurado
! No am-ammoyo dagitoy a hurado ket pagaammoyo met ti estilo a kayatda wenno ti panagramanda, addan bentaheyo iti suratenyo nga entry!
Isu a padasenyo man ketdi. Deadline ti panagisumite iti entry no Marso 31, 2007. Ti maysa a naiduma itoy a salip, maisumite ti entry a manuskrito online babaen ti
submission form
iti
website ti pasalip
.
Downloaden/basaen ti pagannurotan ti Man Asian Literary Prize
para iti ad-adu pay nga informasion.
|
|
Lukat a surat ni Manong Ariel maipapan iti TMI
|
|
|
|
|
Impaskil ni rva
|
|
Tuesday, 26 December 2006
|
Di latta agsarday daytoy gera ti sao wenno surat, iti bangir, maipapan iti TMI. Gapuna a nangputar la ket ngarud iti maysa a lukat a surat ti maysa kadagiti fundador ti TMI, ti pagtamdak unay, pagraemak unay a mannurat, mannaniw, kritiko, eskolar, manong, kadua, ni Apo Ariel Agcaoili.
Lukat a surat daytoy ni Mang Ariel ken ni Apo Akang, maysa kadagiti partisipante iti dap-ayan. Lukat a surat ketdi daytoy para iti amin a maseknan ken uray saan a masaknaran. Kunaek man ita a maysa daytoy a surat a napateg ken naiduma a testamento, maysa a historikal a documento iti pakasaritaan ken panarsaritaan ti/dagiti mannurat nga Ilokano ken iti sapasap a literatura nga Iloko.
Patiek a pasetto ken pasetton ti historia ti literatura a Samtoy daytoy a surat. Iti historia dagiti mannurat nga Ilokano ken iti/kadagiti gunglo ken timpuyog dagiti Ilokano a mannurat. Saksi ken saksinto daytoy a lukat a surat iti maysa a paset ti pakasaritaantayo, numan pay dayta a paset ket nakas-ang ta dita a parte ti historiatayo ket adda panagiinnasing dagiti personal a balikas, adda panagdadangadang dagiti sagrado ken di maibabawi a balbalikas ken sasao, sao kontra sao, sao kontra tao, tao kontra tao. Nakas-ang ta imbes koma a maaramat dagitoy a sagrado ken nabibileg a sao ken sao-sao a mailanad ken maimaldit a pangabel ken pagikurdit kadagiti naliteraturaan nga agawa ken gapuanan, maar-aramat ketdi met kas pana ken bala a maitarget ken maipatuyong, maibiat ken maikalbit ken maipaputok kas panglais, pangidadanes, pagranggas. Surat kontra surat. Surat kontra mannurat. Mannurat kontra surat. Mannurat kontra mannurat. Nakalkaldaang, wen, no maminsan ti maaramidan ken magappuanan dagiti awan timonna a sao, dagiti awan masaona a sasao, dagiti awan maisaona a sao.
(Basaen ken pagtutungtungan ti silulukat a surat ni Apo Ariel Agcaoili iti dap-ayan ti dadapilan)
|
|
GF Convention no Abril 13-15, 2007 idiay Currimao
|
|
|
|
|
Impaskil ni paraposte
|
|
Wednesday, 20 December 2006
|
Maangay ti Maika-39 a National Convention and Literary Seminar-Workshop ti GUMIL Filipinas inton Abril 13, 14 ken 15, 2007 iti Ernesto Go Mega Complex iti Poblacion I, Currimao, Ilocos Norte, babaen ti panangsangaili ti GUMIL Ilocos Norte.
Itoy a tawen, mabingay dagiti partisipante iti seminar-workshop iti dua a bunggoy: maysa ti grupo dagiti nabayagen nga agsursurat, sabali met ti grupo dagiti agdadamo. Addanto lektiur/seminar iti daniw, sarita, salaysay, drama, saribitniw, panagsukisok, dokumentasion ken panangtaginayon iti literatura ni Ilokano, ken panagkritiko/panaghurado iti salip iti panagsurat.
Maysa kadagiti tampok ti pasken ti pannakapili ti makoronaan a Miss GUMIL Filipinas manipud kadagiti mutia dagiti nadumaduma a chapters.
Kangrunaanna, maangayto ti eleksion a pakapilian dagiti kabarbaro nga ofisial ti GF para iti sumaruno a dua a tawen. Maipresenta dagiti kandidato kadagiti nadumaduma a takem iti maikadua a rabii, ngem itinto maudi nga aldaw ti kombension ti eleksion.
Kas iti napalabas, P500 ti registration fee. Adda 20% a diskuento para kadagiti senior citizen (masapul ti ID a pammaneknek) ken P350 laeng met ti bayadan dagiti estudiante. Maikkan ti kada rehistrado a partisipante iti aramatenda iti lektiur a kas iti bolpen, notebook ken handouts.
(Leo S. Fagaragan/BANNAWAG)
(Pagtutungtungan ti maipapan iti 39th Convention ti GF iti dap-ayan ti dadapilan)
|
|
|
Libro ti GUMIL Cagayan, maisagsagana
|
|
|
|
|
Impaskil ni paraposte
|
|
Monday, 18 December 2006
|
Maisagsagana ti umuna a libro ti GUMIL Cagayan (GC) a pakatiponan ti napili a sarita dagiti mannurat nga Ilokano a naipasngay ken/wenno nagnaed/agnanaed iti Cagayan, babaen ti pannarabay ken panangilungalong da Cagayan Provincial Board Member Vilmer Viloria, agdama a bise presidente ti GUMIL Filipinas ken mamagbaga ti GC, ken GC President Arthur Urata Sr. Manamnama a mayalnag ti libro iti National Convention ti GF inton kalgaw 2007.
Mainaig itoy, maipakaammo kadagiti amin a mannurat nga i-Cagayan nga interesado a mairaman iti libro nga ipatuloddan iti kabiitan a panawen ti manuskrito ti sarita a kayat a pailibro. Mabalin nga ipatulod ti manuskrito babaen ti koreo, courier service wenno iti email. Pakuyogan ti manuskrito ti sarita iti biodata ken maysa a nalawag a solo a ladawan ti autor. Nasaysayaat no maikompiuter ti manuskrito ket maipakuyog nga ipatulod ti nakadisket a file ti sarita iti MS Word document wenno rich text format (no maikompiuter, nasaysayaat manen no maipatulod iti email ti file ti manuskrito kas attachment agraman file ti biodata ken scanned copy ti ladawan, tapno nadardaras a maawat ken mataming dagiti napusgan nga editor ti libro).
Ipatulod ti pailibro iti asino man kada Freddie P. Masuli, CSU Sanchez Mira, Sanchez Mira, Cagayan; Jobert Pacnis, Ammubuan, Ballesteros, Cagayan; wenno Roy V. Aragon, 144 SVH 2, Atulayan Norte, Tuguegarao City. No iyemail, isend iti
This email address is being protected from spam bots, you need Javascript enabled to view it
wenno iti
This email address is being protected from spam bots, you need Javascript enabled to view it
. Agtext iti 0910-4829039, 0921-4287883, wenno 0917-9920541 para iti dadduma pay nga inpormasion.
|
|
| | << Rugi
< Napalabas
1
2
Sumaruno >
Ungto >>
| | Resulta 1 - 17 of 20
|
|
|
makipinnadamag
|
Looking for real singles?
Find someone now
on the world?s largest online dating network.
FREE signup
! Post a FREE ad w/5 photos, mingle in chatrooms, watch video intros , meet your soulmate! 1000 new photos posted every day.
Meet someone NOW
!
|
|
|
|
|