Da Wikipedia, l'enciclopedia libara.
El
biłiardo
el ze un zogo conpleso che el ga orijini tanto antighe che al di de onco A ze coreto defenir na disiplina sportiva a tuti i efeti co na organizasion de tornei intarnasionałi e canpionadi del mondo par onji singoła spesiałita.
El zogo el se dezviłupa inte un canpo retangołare sirconda da sponde co ła superfisie cuerta da na carataristega stofa morbia. A se zoga doparando de łe boce sfereghe dite biłie o bijie. Łe bijie łe vien moveste doparando n'asta ciamada steca, o sino łe vien tirae co łe man (inte ła variante ciamada bocete).
El primo tavoło da biłiardo che de cuel A se ga vesto notisia el ze cueło ordena da Jiji XI, sovran de Fransa inte el 1470.
El tavoło da biłiardo el ze un retangoło zenaralmente in proporsion de 2x1, A saria che el ga el łato łongo che el ze el dopio del curto, ma A ghe ze anca de łe ecesion. Łe buze, par i tavołi che i ghin ze provisti, łe ze inte el numaro de 6: cuatro łe ze a i cantoni e do al sentro de łe sponde łonghe. Tutavia A eziste serti modełi dei antighi tavołi a buze strete che i ga sol che cuatro buze a i cantoni.