Revołusion franseza

Sorte	avegnimento istorego revołusion
Intervało de tenpo	14 de lujo del 1789 - 9 de novenbre del 1799
Data	5 de majo del 1789
Pozision	Fransa (Fransa)
Stato	Fransa
Partesipador	Louis Antoine de Saint-Just
Istorego
	Tolta de ła Basteja
	Masacri de setenbre
	Execution of Louis XVI (en)
	Convension termidoriana
	Colpo de stato del 18 frutidoro, ano V
	Colpo di Stato del 30 pratile (it)
	Colpo di Stato del 18 brumaio (it)
Forma da
Rezime del Teror proclamation of the abolition of the monarchy (en)

La revołusion franseza ła ze na union de avegniminti e mudamenti intercoresti intra el 1789 e el 1799 che i segna el limite intra l' eta moderna e l' eta contenporanea inte ła storiografia franseza .

Łe prinsipałi e pi imediae consevense de ła revolusion franseze (che łe ga fato un momento de epocałe canbiamento inte ła storia del mondo, sotolinea dal numaro de morti che el ze intra i 2 milioni e i 2,5 milioni de persone) i ze stai l'abolision de ła monarchia asoluta e ła proclamasion de ła republega , co l'elimenasion de łe baze economeghe e sociałi de l' Ancien regime . La revolusion franseze e cheła americana i ghea ispira łe revolusion de conotasion borgheza che łe vegnara inte el XIX secolo .

Siben che ła organizasion pułitega de ła Fransa ła sbałava intra republega, inpero e monarchia inte i 75 ani seventi ła Prima republega , ła revolusion ła ga segna ła fin de l' asołutismo e ła ga da scumisio a un novo rezime andove ła borghezia e, in racuante ocazion anca łe mase popołari, łe se ghea convertio inte ła forsa pułitega domenante del paeze.

Faturi descaenanti [ canbia | canbia el codaxe ]

Fanti faturi i ghea porta a ła revołusion; inte un serto sentire, al vecio ordene ghe ga toca cascar soto ła so stesa rizidesa davanti a un mondo in piena evołusion; par altri el ze cadesto soto ła anbision de na borghezia evolvesta, in liansa co i contadini e i sałariai, e co individui de tute łe clase che i ze stai influensai da łe idee de l'iłumenismo . Col corar de ła revolusion e el pasajo del podere da ła monarchia ai corpi lejislativi, i intaresi contrastanti de sti grupi inte el prinsipio liai i zera devegnesti fonte de confliti e bagni de sangue.

Intra łe cauze de ła revolusion ghe ze łe seventi razon:

• l'apeze de ła borghezia, co un podero economego cresente, che ła ghea un roło fondamentałe nell'economia de l'epoca;
• el resentimento contro l' asolutismo reałe;
• el resentimento contro el sistema sioriłe da parte de contadini, sałariai e borghezia evolvesta;
• ła inpienia madurasion dei ideałi de l' iłumenismo , intra i cuałi ła libarta, ła fradernita, l'uguajansa, el refudajar na societa dividesta, ła separasion dei poderi del Stato;
• un debito nasionałe inzestionabiłe, cauza e ingrava da ła pezantesa de un sistema de tasasion ineguałe, considarando che łe clasi priviłejae (nobilta e clero) no łe zera obligae a pagare, provocando tension sociałi e pułiteghe contribuindo a na grave crize economega, ingrevada oncor-pi dai seventi fati:
  • ła cołaborasion de ła Fransa a l'indipendensa americana produzendo deficit fiscałe;
  • el cało dei costi dei prodoti agricułi;
  • l'inalsamento de ła popolasion gavesto grasie a ła medezina in progreso;
  • ła carensa de magnar inte i ani prima de ła revolusion;
  • el resentimento par i privileji de ła nobilta e el so dominio de ła vita publega da parte de na anbisioza clase profesionałe;
  • l'influensa de ła Guera de indipendensa americana .

Fransa pre revołusion [ canbia | canbia el codaxe ]

Contestasion a ła monarchia asołuta [ canbia | canbia el codaxe ]

Inte el 1788 in Fransa el podere el zera ponesto inte ła monarchia asoluta de derito divin. La tradision monarchega ła se inscriveva inte el respeto del costumare, o sia de łe libarta e dei priviłeji dazesti a racuante persone, racuante sita o provinse. Le baze de sto sistema pułitego łe ze stae contestae e intacae inte ła seconda meta del XVIII secolo .

La fiłozofia dei Iłumenisti ła se ghea difondesto inte i strati superiori de ła societa franseze, ła borghezia e ła nobilta libarałe . Al modeło fransezo de ła monarchia asołuta el ze sta contraponesto cheło ingleze de na monarchia limitada da un parlamento (asenblea ełezesta). A l'ubidiensa de łe persone ghe ze sta contraponesti i deriti del sitadin. I fiłozofi iłumenisti i ghea difendesto ła idea che el poder sovran supremo el vive inte ła Nasion .

Anca i previłezai i se ghea revolta contra al poder reałe, parche el asołutismo łi ghea privai de łe so tradisionałi prerogative.

Soto l' Ancien Regime i Parlamenti i zera de łe corti de zustisia. I se profitava del derito, che el ghe zera de tradision dazesto in man, fazendo de łe oservasion al momento de ła rezistrasion de łe leji inte i rezistri dei parlamenti, par critegar el podere reałe. Benche i difendese soratuto i so stesi priviłeji, lori i zera rivai al ponto de esar vedesti da ła publega opinion cofa difenditori del popoło.

La Nobilta, privada del podere soto el re Luigi XIV , ła sognava de tornar ai afari del Stato. A sta revendicasion pulitega se gaveva na revendicasion economega. I nobiłi no i ghea el derito de ezersitar un grando numaro de ativita economeghe, soto ła pena de perdare ła so nobilta. Inte un secoło andove el rendimento de ła tera el stagnava e andove i costi par ła raprezentansa (costumi, carose, etc.) i nava senpre pi su, el so podero de cronpa el se sbasava.

Nesesita de reforme [ canbia | canbia el codaxe ]

Luigi XV e Luigi XVI no i zera restai fermi vedendo el difondarse de łe nove idee e el bloco de łe istitusion, ma no i ghea avesto ła autorita del vecio re Luigi XIV par inporghe ai priviłejai i canbiaminti nesesari:

• ła reforma zudisiaria del canceliero de Maupeou , decidesrt a ła fin del regno de Luigi XV, sbandonada da Luigi XVI che el zera cadesto davanti al Parlamento;
• ła reforma fiscałe : el problema dei re el zera senpre sta cheło del bałanso publego che, dopo el XVIII secolo , el zera tanto defisitario.

La prisipałe inpozision direta, ła taja , ła pezava solche so i no privilejai. La preocupasion dei re ła zera cheła de ingrandir i ingresi fiscałi. Łe ze stae zontae a chełe che za ghe zera de łe nove inposte gravanti so tuti: Ła cavidasion e che in proporsion łe pezava de pi sui no priviłejai; el ventezemo , che el ciapava tuti i rediti (in teoria 1/20 del redito, ma i nobili e el clero i ła ghea conpensa pagandola na volta par tute co ła consevensa da vegner dopo ezentai). Łe nove inpozision no łe zera stae paro bone de contrastar el deficit e el debito publego che el ze na vanti cresar par tuto el XVIII secolo . No-ostante ła Fransa ła fuse un paeze co na economia in espansion, ła ghea na struturasion sociałe in conflito e un stato monarchego in crize. De fato se połe parlar de na crize de l'Antigo Rezime in tuta l'Eoropa Osidentałe, ma andove sta crize ła ga vesto partensa in Fransa ła ze stada inte ła borghezia che ła savea del pezo del so poder, gavendo na revołusion de consevense pi grande respeto a łe corispetive de l'epoca inte chełi altri Stati.

Crize finansiaria [ canbia | canbia el codaxe ]

Ghe zera na opozision zenerałe contro dei regołaminti economeghi e sociałi che i favoria i grupi priviłejai. El Stato fransezo el ghea na grave crize finansiaria, in parte gavesta dal pozo economego invia dal goerno a łe 13 cołonie ingleze d'America durante ła guera d'indipendensa . Durante i regni de Luigi XV e Luigi XVI , vari ministri, intra sti cua anca Anne Robert Turgot e Jacues Necker , i ghea prova de canbiar sto sistema de inpozision par conversionarlo inte un sistema pi justo e progresivo, ma sensa consevir l'intension, par via de ła opozision de ła nobilta , che ła se considerea garante inte ła lota contra al dispotismo. Sti ministri i ze stai cusita costrinzesti a renunsar a so incargo e inte el 3 de novenbre 1783 el re el ga nomena Charles Alexandre de Calonne ministro de łe Finanse. Calonne el ghea ciapa na pułitega de spendimenti forte, fata par convinsar i potensiałi creditori de ła sołidita de łe finanse nasionałi. Durante el so ministero no se sentiva parlar che de pension e gratifegasion. Inte el curto termene se sperava che na dimostrasion de suporto da parte de l'asenblea dei notabiłi ła garia permetesto de recuperar ła fidusa inte łe finanse fransezi e de ciapare dei prestiti coi cuałi darghe contro a łe speze. Dopo de un studio detaja de ła situasion finansiaria, Calonne el se ga rendesto conto che no zera altro sostegnibiłe ła situasion e el ghea declara che se ghese da far suito nove reforme. Inte el partegołare, el ghea scrivesto un codaze tributario progresivo in canpo dei gaveri terieri, col cuało el segurava che se garia ciapa un resanamento de łe finanse. Co Calonne el ghea dito al re de ła necesita de ła reforma proponesta, l'Asenblea dei Notabili ła ga refudaja de acetar sti remedi, par via de ła reputasion de imorałita che Calonne el se zera guadagna inte i ani del so ministero e parche a lu ghe se zera atribuia na parte del deficit. Le finanse fransezi łe zera rivae a ła bancarota : el debito publego el zera de 1.646 milioni de livre, co un deficit anuałe de 46 milioni ^[1] .

Tentativi de reforma [ canbia | canbia el codaxe ]

El re vedendo che Calonne no el zera bon de zestir ła situasion, el 1° de majo del 1787 lo ga sostituio col so prinsipałe critego, el prezidente de l'asenblea dei notabili e lider de l'opozision, Etienne-Charles de Lomenie de Brienne , arcivescovo de Tolosa .

Brienne el ghea tenta de far aprovar łe reforme proponeste da Calonne, ma ste cua łe cata oncora na forte opozision, soratuto dal Parlamento de Parize (na organizasion de controło so ła lejitimita dei ati, ma sensa funsion pułiteghe). Brienne el ghea prova de nar vanti co ła reforma tributaria no-ostante i parlaminti, ma sto fato el ga provoca granda rezistensa dei grupi benestanti che ła ze sfogada inte el retiro dei prestiti de curta durada. In cuel momento, sti prestiti i dazeva osizeno e vita a l'economia del stato fransezo, motivasion par ła cuała se ga vesto na situasion de bancarota nasionałe.

Convocasion dei Stati Zenerałi [ canbia | canbia el codaxe ]

El 18 de disenbre 1787 , el re Luigi XVI , el ga prometesto de convocar i Stati Zenerałi inte ła volta de sincue ani.

Ła monarchia no ła ga podesto far nisuna reforma fiscałe par via del sistematego ostrusionismo del Parlamento. El Di dei copi de Grenoble , gavesto inte el 1788 el ga mostra na liansa contraditoria intra el Parlamento e el popoło. Le proteste de łe fameje tocae da ła crize economega łe se ga molteplega dopo del meze de majo e ste movense łe ga obliga a l'intervension inte el 7 de zugno , co ła resposta dei rezidenti che dai cuerti de łe caze i ga tira i copi contro łe trupe reałi.

Na asenblea dei tre ordeni (clero, nobilta e terso stato) ła se ghea reunio inte el casteło de Vizille co l'ezito de indir un sioparo de łe inpozision. Miga bon de calmar ła situasion, el re Luigi XVI el ga cedesto e el 8 de agosto del 1788 el ga consentio ła convocasion dei Stati Zenerałi par el 5 de majo del 1789 , par ła prima volta dai ultemi del 1614 .

El 25 de agosto 1788 Brienne el ga renunsa l'incargo de łe Finanse fransezi el ze sta riciama Necker , el cuało el ga rendesto publego el bałanso del regno. El Stato el ciapava 503 milioni de livres de entrae contro 620 de łe speze. I intaresi sol debito i zera de 310 milioni, o sia ła meta de łe speze. L'opinion publega ła zera scandałizada inte el saver che ła corte ła spendea 36 milioni in feste e pension par i cortezani.

El declin de ła monarchia asołuta [ canbia | canbia el codaxe ]

La canpagna eletorałe par l’ełesion dei deputai ai Stati Zenerałi [ canbia | canbia el codaxe ]

La prospetiva dei Stati generałi ła ga rezalta el conflito de interesi intra el Secondo stato (ła nobilta) e el Terzo stato (che el ghea drento tuti i francezi, che no i zera nobiłi e gnanca ecleziasteghi, da ła granda borghezia ai brasanti rurałi).

La societa ła zera canbiada in confronto al 1614 : el Primo Stato (el clero) col Secondo Stato (la nobilta) i raprezentea solche el 2% de ła popolasion franseza; el Terzo Stato , teoregamente el zera el resto 98%, majoransa che ła podea oncora esar metesta in menoransa dai primi do stati, vedesto che storegamente i ghea frecuentemente vota unitariamente. Tanti inte ła clase emerzente i ghea vedesto ła convocasion dei Stati Zenerałi cofa na pusibiłita de guadagnar podere .

La convocasion dei Stati Zenerałi ła ghea ełeva tante speranse intra ła popolasion franseze. I contadini i sperava inte un mejoro de łe so condision de vita sbandonando i deriti feudałi. La borghezia, formada a łe idee iłumeniste , ła sperava inte ła instaurasion de l’ uguajansa dei deriti e de na monarchia parlamentare drio el modeło inglezo.

Durante ła canpagna eletorałe, inte i cahiers de doleances ("cuaderni de łe remostranse") zera sta scrivesta na lista de abuzi ai cuałi el Terso Stato el zera oncora sotoponesto.

I dibatiminti i revardava anca l’organizasion dei Stati Zenerałi: infati ła zera tradision che ogni ordene el ełezese sirca el isteso numaro de deputai e che i ełezesti de ogni ordene el si reunise, el discutese e el votase separa. El rezulta del voto de ogni ordene el vałeva un voto. Sto cua el zera el prinsipio del voto par ordene. In sta magnera, bastava che i do ordeni privilejai i votase conpagno, o sia par el mantegnimento dei priviłeji, che el Terso Stato el se garia senpre cata in menoransa.

El Terzo Stato el ghea dimanda el ridopio del numaro dei deputai, cusita da ver parita co i primi do Stati. Sto cua el zera devegnesto una de łe argomentasion prinsipałi tratae dai fojetisti, intra i cuałi se segnłla l'abate Emmanuel Joseph Sieyes col fojeto "Cosa zeło el Terso Stato?".

Necker, sperando de evitar el conflito, el ghea reunio na seconda asenblea de notabiłi inte el 6 de novenbre 1788 , ma, co so grando pełago, i nobiłi i ghea refudaja l'idea de dopia raprezentansa.

Un decreto reałe del 27 de novenbre del 1788 el ghea anunsa che ai Stati zenerałi ghe garia partesipa almanco un miliaio de deputai, garantindo ła rapprezentansa dopia par el Terso Stato. I senpleghi sacerdoti ( cures ) i podea esar deputai par el Primo Stato, e i protestanti par el Terso.

Par el storego Mignet , dopo de łe elesion razonevolmente oneste, " i deputai de ła nobilta i zera fati da 242 zentilomani e 28 menbri del parlamento; chełi del clero, da 48 vescovi e arcivescovi, 35 abati e decani, e 208 curai; e chełi del Terso Stato, da do ecleziasteghi, 12 nobiłi, 18 majstrati sitadini, 200 menbri de łe contee, 212 avocati, 16 medeghi e 216 marcanti e agricultori ". Altre fonti łe ne da invese sifre difarinti (vedi Stati Generałi ).

El Terso Stato el ghea anca dimanda el prinsipio del voto par testa , o sia che ogni deputa el gavese un voto. Luigi XVI, che el ghea pena aceta el rindopio el Terso Stato el ghea tazesto so sta cuestion del voto par testa, dasandoghe ła decizion ai Stati Zenerałi stesi. Se se fuse ndai vanti a votar par Stato, cofa che zera senpre sucedesto, el Terso Stato el se saria cata isteso in menoransa.

Dai Stati Zenerałi a l'Asenblea Nasionałe ( 5 de majo 1789 - 17 de zugno 1789 ) [ canbia | canbia el codaxe ]

Co che i Stati Zenerałi i se ga reunio a Versailles el 5 de majo 1789 , tanti inte el Terso Stato i vedeva ła raprezentansa dopia cofa na revolusion za portada a conpimento.

Partindo dai discorsi fati dal re e da Necker inte el corso de ła vertura dei Stati zenerałi, i deputai del Terso Stato no i ghea sentio par gnente parlar de łe reforme pułiteghe tanto spetae, ma solche de cuestion finansiarie. El podero no el ghea tolto pozision sol voto par ordene o par testa. Co Luigi XVI e Barentin (el vardaseziłi) i ghea parla ai deputai el 6 de majo , el Terso Stato el ghea descuerzesto che el decreto reałe che el garantia dopia raprezentansa el ghea in mezo un fało: el terso Stato el ghea si pi raprezentanti, ma el voto el se garia avesto "par ordeni" e cuindi i 578 rapprezentanti del Terso Stato, dopo ver dełibara, i garia avesto el so voto cołetivo peza conpagno a cheło de uno de chełi altri Stati.

L'intension del re e de Barentin che i dasava intendar el zera cheło che tuti i ndazese al problema de ła tasasion. Ła pi granda raprezentansa del Terso Stato ła ghea da esar solche sinbołega e de consevensa sensa poderi extra. Necker el ghea pi sinpatia par el Terzo Stato, ma in cheła ocazion el ghea parla solche de ła situasion fiscałe, dasiando a Barentin el conpito de parlar su come i Stati Zenerałi i garia opara.

Sercando de evitare el problema de ła raprezentansa e de fogałizarse solamente so łe tase, el re e i so ministri i ghea gravamente malzudega ła situasion. El Terzo stato el volea che i stati i se catase cofa un corpo unzoło e ghe fuse na votasion par testa, i altri do Stati, siben che i malvedese el asołutismo reałe, i credea che i garia perso pi poder verso el Terso Stato de cheło che i garia guadagna dal re. El ministro del re, Necker, favorevoło al Terzo Stato, ma scaltro finansiero el zera un pułitego miga altrotanto scaltro, el gheva decidesto de far continuar sto "ponto morto" fin al masimo prima de smisiarse al pensiero de chełi altri.

El ponto morto el ze riva suito. El primo argomento de tratativa dei Stati Zenerałi el ze sta ła verifega dei poderi. Mirabeau , nobiłe ełezesto par raprezentar el Terso Stato, el ghea prova sensa ezito de tegner i tre ordeni in sała par ła discusion. Invese de discorare łe tase del re, i tre Stati i ghea taca discorar so l'organizasion de ła lejislatura. La społa diplomatega ła ze nda vanti sensa sucesi fin al 27 de majo del 1789 , co i nobiłi i ghea vota par tore pozision ferma so ła verifega separada. El di sevente, l'abate Sieyes (un menbro del clero ma, cofa Mirabeau, ełezesto a raprezentare el Terzo Stato) el se ghea movesto col fin che el Terso Stato, che el ghea taca reunirse cofa i Communes ("Comuni"), el procedese co ła verifega e i invitase chełi altri Stati a ciaparghene parte, invese de spetare che i rivase lori sołi.

El 13 de zugno tre deputai i ghea rispondesto a l'apeło e el 16 i zera divegnesti dieze. El 17 de zugno , i Comuni, esendo el soło Stato a ver poderi propiamente legałizai, i ghea finio el so procedimento de verifega e cuazi suito i ga vota na mezura tanto pi radegałe, declarando l' Asenblea Nasionałe , na asenblea no dei Stati, ma del popoło, invitando tuti chełi altri ordeni a unirse, ma i ghe ghea dato ła idea che i intendese far i intaresi de ła nasion co lori o sensa de lori. El 19 de zugno el clero, che el ghea drento dei preti sensibiłi ai problemi dei sitadini, el ga decidesto de unirse ai deputai del Terso Stato par ła verifega dei poderi.

L'Asenblea Costituente [ canbia | canbia el codaxe ]

L'Asenblea Nasionałe ła se ghea liga suito ai capitałisti , o sia ła fonte del credito nesesario par finansiar el debito publego e a ła zente comun. L'Asenblea ła ghea stabiłiza el debito publego e i ga declara che tute łe tase inponeste in precedensa łe zera iłegałi e siben che i gavese fato sta declarasion, i łe ghea votae provizoriamente solche no i ghea finio de reunirse. Sta situasion ła ghea ridato fidusa al capitałe e ghe ga dato un grando intarese inte el tegnere l'asenblea in sesion. Par ła popołasion, el zera sta stabilio un comitato de susistensa par far fronte a ła carensa de magnar.

El presedente pian de conciliasion de Necker - un schema conpleso de concesion ai comuni so racuanti ponti e de forte rezistensa so altri - el zera sta supara dai avegniminti. Miga pi intaresa ai conseji de Necker, Luigi XVI, soto ła influensa dei cortezani del so consejo priva, el ghea decidesto de parlar a l'Asenblea, descansełar el so decreto, comandar ła separasion dei ordeni, e detare che łe reforme lje fuse fate dai Stati Zenerałi restaurai.

Se Luigi el gavese marcia inte ła Salle des Etats , andove l'Asenblea Nasionałe ła se catava, probabilmente el so pian el garia podesto ver vita, ma invese el zera resta a Marly e inte el 20 de zugno el ga ordena de sarar ła sała, credendo de inpedir a l'Asenblea de catarse par vari di, di inte i cuałi el re el se garia podesto pareciar. L'Asenblea ła ghea solche sposta łe so delibarasion inte el canpo da bałacorda del Re, andove ła ga metesto in pie el Zuramento de ła Sała de ła Bałacorda ( 20 de zugno del 1789 ), col cuało se ga decidesto de no disolvar l'asenblea finche a ła Fransa no ła ghe fuse data na costitusion scrivesta.

Do di dopo, privada anca de ła dopara de ła Sala de ła Bałacorda, l'Asenblea Nasionałe ła se ga cata inte ła ceza de Saint-Louis, andove se ga zonta anca ła majoransa dei raprezentanti del clero: i sforsi par repristinar el vecio ordene i zera servii solche par cełerare i avegnimenti. Co el 23 de zugno 1789 , el re el ga parla finalmente ai raprezentanti dei tre Stati e el se ga cata davanti un siłensio sordante. El re el ga declara che se mantegnese ła difarensa intra i ordani, che ła costitusion dei Comuni ła fuse desfada e che se ła Asenblea Nasionałe ła vegnese desfada, el re el garia fato el ben del popoło, finendo el discorso dimandando a tuti de ndar fora da ła sała, col rezulta che a ubidirghe ze sta solche i nobiłi e el clero, mentre i deputai del Terso Stato i ze restai sentai.

( VEC )
≪ Na forsa miłitare ła sirconda l'Asenblea! Dove zełi i nemighi de ła nasion? Ghe ze Catilina a łe nostre porte? Io ridomando, investi vu stesi co ła vostra dignita, col vostro poder lejislativo, acludi a vu ła rełijon del vostro zuramento. Sto cua no el ve parmete de desfarve finche no gari forma na costitusion. ≫

? Mirabeau contro l'ordene de desfar l'asenblea ^[2]

Necker, ugnoło ministro a no partesipar a cheła reunion, el se ga cata in desgrasia co Luigi XVI ma novamente inte łe grasie de l'Asenblea Nasionałe.

Chełi del clero, che i se ghea cata a l'Asenblea inte ła ceza de Saint-Louis, i zera restai la e altri 47 menbri de ła nobilta, includesto el duca d'Orleans, i se ghea unio a lori.

El 27 de zugno, probabilmente par via de notisie de gravi tumulti e union de rivoltozi, Luigi XVI el ghea fazesto deramar ordeni segreti col fin de far consentrar 20.000 soldai arente de ła capitałe e dl ghea invita ufisalmente nobilta e clero de unirse a ła Asenblea nasionałe, evento avegnesto el 30 zugno ^[3] .

El 7 de lujo el ze sta ełezesto un comitato par ła scritura de ła Costitusion e du di dopo ła Asenblea, recostituendose, ła se ga proclama Asenblea Nasionałe Costituente ^[4] .

Tolta de ła Basteja [ canbia | canbia el codaxe ]

Tanti i ze sti i mesaji de suporto a l'Asenblea, provegnenti Parize e da altre sita franseze. El 9 de lujo del 1789 ła Asenblea ła se ghea recostituio dimandandoghe al re in termani educai ma fermi de cavar łe trupe (che deso łe includeva rezimenti foresti, pi ubidienti al re respeto a łe trupe fransezi), ma Luigi el ghea declara che solche eło el podea zudegar se łe servise o no, segurando ła Asenblea che ła prezensa de łe trupe łe zera solche na mezura de precausion. Luigi el ga "oferto" de spostar l'Asenblea a Noyon o Soisons , o sia de metarla inte el mezo de do ezersiti e de privarla del suporto dei parizini.

Racuanti deputai i ze restai intimorii de come che łe se zera drio metar łe robe e i se ghea dimetesto da l'incargo, i restanti invese i ghea declara che l'incargo dei deputai no el deriva dai singułi ełetori, ma da ła intiera Nasion, metendo in pratega el prinsipio de sovranita nasionałe, difendesto da Diderot . Ła stanpa ła ga taca publegar i dibatimenti de l'Asenblea; ła discusion pułitega ła se ghea estendesto anca fora, inte łe piase e sałoti de ła capitałe. El Palais Royal e l'area da torno łe zera posto de continue reunion de manifestanti democrateghi ^[5] .

Finche łe trupe łe entrava in Parize e Versailles soto i comandi del maresało de Broglie, l'11 de lujo Luigi XV el ghe ga cava l'incargo a Necker e el ghea nomena un novo goerno e al so cao el baron de Breteuil, popołare reałista, co l'intento de sarar na volta par tute ła Asenblea. ^{[3] [6]} .

El di dopo ła popołasion, vegnesta a saver de ła sostitusion, ła ga organiza na granda manifestasion de protesta, andove zera stae portae de łe statue che łe figurava Necker e el duca d'Orleans.

Racuanti soldai todeschi i ghea risevesto el ordene de cargar ła zente, fazendo vari ferii e desfando łe statue. El disenso dopo de sto acadimento el ze cresesto a desmezura e ła Asenblea ła ghea avertio el re del pericoło che ła Fransa ła garia coresto se łe trupe no łe se retirase, ma ła resposta de Luigi XVI ła ze stada contraria al retiro.

La matina del 13 de lujo ła popolasion in revolta ła ga dato fogo ai cazełi del dasio a łe porte de Parize ^[3] , i rezimenti fransezi i se ga metesto tuto torno ła capitałe e i sitadini i ghea taca protestar viołentemente, sachejar i magazini sospetai de ver drento el magnar, intra sti cua el convento de Saint-Lazare (che el zera un ospedałe, scoła, magazin e prezon), dal cuało ze sta porta via 52 cari de gran, tuto cuanto fato col fin de soravivar e che el re el sbasase el costo del pan.

Dopo de sti dezordeni e sacheji, che i ndava vanti a cresar, i ełetori de ła capitałe (i stesi che i ghea vota inte łe ełesion dei Stati Zenerałi) i se ghea reunio inte el Munisipio de Parize e i ghea decidesto de organizar na miłisia sitadina fata da borghezi, che ła garantise el mantegnimento de l'ordene e ła difeza dei deriti costitusionałi: ogni omo de sto grupo el garia porta, cofa destintivo, na cocarda co i cołori de ła sita (blu e roso). Par armar ła miłisia se ghea scumisia a sachejar i posti andove se ritegnese ghe fuse armi.

Cusita el 14 de lujo del 1789 i Parizini, inte n'atmosfera revolusionaria, i ghea roba 28.000 arme da l’arsenałe de l’ Hotel des Invalides ^[7] , andove paro no se ghea cata polvare da s-ciopo. Se ga asedia ła prezon reałe de ła Basteja par sercarla. El governator de ła prezon Bernard de Launay el voleva rezistare, ma a ła domanda dei mediari vegnesti da l’ Hotel de Ville , andove ghe zera un comitato permanente de insuresion borgheza, el ga dasa che ła foła ła entrase inte ła prima corte, par dopo ripensarghe e copar sta zente, fazendo un sentenaro de morti. Sto avegnimento el ga provoca ła resposta dei soldai amutinai che i ga porta dei canoni, fazendo rendare el governador, el cuało el ga rispondesto sbasando el ponte ełevatore, finendo par esar copa dai partesipanti a ła protesta e ła so testa, tajada co un corteło, ła ze stada metesta in publego inte el sentro de Parize ^[7] .

Dopo de ła vitoria popołar [ canbia | canbia el codaxe ]

Inisialmente el re el ga dato poca inportansa a sti avegnimenti, ma dopo el ga reconosesto ła gravita de ła situasion demołision de ła Basteja el ga respinzesto i sujeriminti dei fradełi e de Breteuil de retirarse a Compiegne e de ristabilir l'ordene co ła forsa ^[8] .

El Re el ga decidesto ełora de conzedar Breteuil e de reciamar Necker ^[9] ; el 15 de lujo 1789 el re el ze nda a l’Asenblea nasionałe dizendo che da chel momento el garia laora co ła nasion, che el se fidava dei so raprezentanti e che el garia ordena a łe trupe de dasar Versailles e Parize. Sti anunsi i zera stai ciapai da aclamasion zenerałi.

A l’ Hotel de Ville de Parize, tuti i menbri de ła presedente aministrasion i zera scanpai e Jean Sylvain Bailly , prezidente de l'Asenblea nasionałe, el ze sta nomena par aclamasion Sindaco de Parize. La Fayete el ze sta nomina Comandante Zenerałe de ła Guardia Nasionałe e ła ze sta metesta in pie na nova organizasion munisipałe. Luigi XVI ła ga reconosesta co el ze nda a Parize el 17 de Lujo. In sta ocazion Bailly el ghe ga dato ła cocarda blu e rosa, i cołori de ła capitałe, che Luigi XVI el ga fisa al so capeło asociandoghe anca el bianco de ła monarchia. Sto zesto el voleva sinbołejar ła reconciliasion de Parize col so re, fazendo cusita nasar ła Cocarda Franseza Tricołore.

In sti di, i fradełi del sovran e vari cortezani, intra sti cua Breteuil, e numarevołi aderenti e sostegnitori i zera scanpai oltre i confini: in manco de du mezi i ze stai dasai pi de 20.000 pasaporti ^[8] .

La notisia de ła Tolta de ła Basteja ła se ghea difondesto in tuta ła Fransa, fazendo cresar ła consapevołesa che ła popołasion ła ga na forsa bona de sostegner łe idee dei reformatori. Par disfrutar de sto momento contro de ła monarchia, a ła Basteja ghe ze stato dato un signifegare sinbołego: ła ga raprezenta el podero arbitrario ma vulnerabiłe del re.

Ła granda paura [ canbia | canbia el codaxe ]

In provinsa, dal 20 de lujo 1789 al 6 de agosto 1789 , inte łe canpagne sircołava na falsa notisia de ła prezensa de briganti vegnesti a desfar ła produsion contadina, dopo de łe revolte agrarie che łe ga intaca ła nobilta ^[10] . Sto clima de "Granda Paura" el ghea spenzesto i contadini armarse de forche, false e altri arnezi, in serca de pi granda protesion. In tanti i ndava dai siori locałi par torse s-ciopi e polvare da s-ciopo, ma cua i finiva par sfogar ła so rabia inte i confronti dei poderi dominanti, pretendendo i titułi sioriłi par poderli bruzare. Tanti siori i se ga difendesto anca co ła forsa, altri i ze restai copai, tanti i ze i castełi che ze stai sachejai o insendiai. In testimoniansa del periodo critego del feudałezemo Jules Michelet el ghea scrivesto, "tuti i castełi de canpagna i zera devegnesti de łe Basteje da concuistar".

Davanti a ste viołense, inte ła note del 4 de agosto ła Asenblea ła ga rispondesto abołendo i priviłeji, i deriti feudałi, ła venałita dei ufisi e łe dezuguajanse fiscałi. Sto ato el segna ła fin de ła societa de l' Ancien Regime .

Finmente che se scriveva i decreti dal 5 a l'11 de agosto, i deputai, cuazi tuti propietari fondiari nobili e borghezi, i ghea canbia idea so łe proposte orizenarie ^[11] : i servisi d'opara agratis che el titołar teriero el ghe inponeva ai contadini i zera stai abołii, ma i deriti bazai so ła rendita i continuava esar vołesti, parmetendo ai propietari de risevar na indenita che ła salvavardase i so intaresi economeghi e che in parte ła saria servia par cronpar beni nasionałi col fin de termenar łe revolte. ^[12]

granda parte dei contadini, ritegnendose desvincuła dal vecio rezime no i ghea paga nisun indenizo ai propietari terieri, che par altro, i zera stai condonai inte el 1793 ^[13] . In sinteze, i decreti de l'agosto del 1789 i ze stai uno dei fondaminti de ła Fransa moderna: i ghea desfa totalmente ła societa feudale bazada su "stati" e priviłeji sostituindoła co na societa moderna, autonoma, individuałe, libara de far tuto cheło che no zera proibio da ła leje ^[14] . Drioman, a novenbre del isteso ano, i ze stai sospendesti tredaze parlaminti rejonałi, spetando ła so definitiva abołision che ła saria avegnesta inte el setenbre del 1790; avegnimento che el ga porta al desfamento del sistema zuridego e istitusionałe de l' Ancien Regime ^[15] .

Notasion [ canbia | canbia el codaxe ]

1. ↑ ( FR ) Francois-Auguste Mignet, Histoire de la Revolution francaise depuis 1789 jusqu'en 1814 , Parigi, Firmin Didot pere et fils, 1827
2. ↑ ( FR ) Adolphe Thiers , Histoire de ła Revolution francaise , Parigi, Furne, 1842.
3. ↑ ^{3,0 3,1 3,2} Cobban , op. cit. , p. 143 .
4. ↑ Schama , op. cit. , p. 312 .
5. ↑ Cobban , op. cit. , p. 144 .
6. ↑ Schama , op. cit. , p. 317 .
7. ↑ ^{7,0 7,1} Giorgio Bonacina, 14 luglio: la folla irrompe come un fiume , articolo su "Storia illustrata" nº 126, maggio 1968, p. 30
8. ↑ ^{8,0 8,1} Cobban , op. cit. , p. 146-148 .
9. ↑ Cobban , op. cit. , p. 145-146 .
10. ↑ Hibbert , op. cit. , p. 93 .
11. ↑ Lefebvre , op. cit. , p. 130 .
12. ↑ Forster , op. cit. , pp. 71-86 .
13. ↑ Hanson , op. cit. , pp. 293-294 .
14. ↑ Furet , op. cit. , p. 112 .
15. ↑ Thompson , op. cit. , pp. 90-111 .

Altri projeti [ canbia | canbia el codaxe ]

• Wikimedia Commons el detien imajini o altri file so Revołusion franseza

Linganbi foresti [ canbia | canbia el codaxe ]

• Rivoluzione francese Treccani.it ? Enciclopedie on line , Istituto de ła Enciclopedia Italiana.
• Alberto Maria Ghisalberti, FRANCESE, RIVOLUZIONE , in Enciclopedia Italiana , Istituto de ła Enciclopedia Italiana , 1932.
• Rivoluzione francese , in Disionario de istoria , Istituto de ła Enciclopedia Italiana , 2010.
• ( IT ,  DE ,  FR ) Revołusion franseza hls-dhs-dss.ch , Disionario storego de ła Svisara .
• ( EN ) French Revolution Enciclopedia Britannica , Encyclopædia Britannica, Inc.
• ( EN ) Opere riguardanti Revołusion franseza Open Library , Internet Archive .
• ( EN ) Revołusion franseza , in Catholic Encyclopedia , Robert Appleton Company.