Dat Konzentratsjoonsleeger Dachau bestuude fon dan 22. Meerte 1933 , bit dat ap dan 29. April 1945 fon US-amerikoanske Suldoaten befraid wuuden is. Dat waas dat eerste Leeger in ju NS-Diktoatuur , wier ju aleenige Gjuchtsspreekenge bie aan SS-Leegerkommandant liech un somad jaildend Gjucht buute Funktsjoon sat wuuden is.

In't KZ Dachau sunt touminst 200.000 Ljuude fangen heelden wuuden. Dat wieren tou Begin politiske Juunsattere, man leeter uk fuul Juuden un uur Ferfoulgede. Sowat 41.500 Ljuude sunt binne dat Leeger direkt uumebroacht wuuden of stoorwen oun do stuure Bedingengen, wier sik Kroankhaide as biespilswiese Typhus uutspreede kuuden. Buppedat sunt masse Ljuude, do deer fangen sieten, foar'aaln Juuden, in sonaamde Fernailengsleegere ( Vernichtungslager ) faarebroacht un junner in Massen moarend wuuden.