Na hingango biani atene nengo tere ti zo na lingbingo tere ti angangu ti lo laa si ayeke na gunda ti zara , ti nzoni ngbanga na ti siriri na ndo ti dunia,
Na hingango ni pepee na kengo andia ti bata nengo tere ti zo laa adu kpale ti bira so abi ngonzo na be ti ahalezo, nga si gango ti mbeni fini kodoro so ahalezo kue alingbi ti tene tene ti be ti ala, ti mabe ti ala afa ni tongana taa kota beku ti azo ti ndo ti gigi,
Ayeke kota ye mingi ti tene azi le na ndo ti andia ti bata nengo tere ti zo gi na lengo mbeni gere ti ndia ndali ti sioni segbia na lengo pasi,
Na hingango ni atene ayeke kota ye mingi ti mu ngangu na maingo ti lengo songo na popo ti kodoro nde nde,
Na hingango ni atene na ya ti sendia halezo ti bendo ti gigi afa ti fini ni mabe ti ala na ataa ndia ti zo , na nengo tere nga na kota ti zo na lingbingo tere ti angangu ti koli na wali, si ala atene ani yeke sara ngangu kue ti maingo ti seduti ti zo na lengo anzoni lege ti duti na ya ti mbeni kota zara ,
Na hingango ni atene akodoro so abungbi amu yanga ti le kpengo ndia ti bata nengo tere ti zo na zara ti lo na ya ti kua ti maboko na maboko na bungbi ti bendo ti gigi,
Na hingango atene mangbingo be na andia so na azara so nga ayeke biani ngangu ye mingi ti sara kua so gi na peko ti yanga so ala mu,
Kota Lingo
Avunga
Depa ti popokodoro ti batango nengo tere ti zo so
tongana kunibe so halezo na akodoro kue alingbi ti wara, si azo kue nga na akundu ti boso kue asara ngangu, na lege ti fango mbeti na fango-ndo, ti le kpengo andia na azara so nga ti sara na kode ti andia ti kodoro wala ti popokodoro ti tene ayeka ni nga si ale tambula ni na ndo kue, na popo ti halezo na letaa ni so alu mbere ni, tongana ala so angba na gbe ti le ti ala.
Adu azo kue yamba, nga ala lingbi tere na lege ti nengo-tere na ti angangu. Ala kue awara ndara na boro-li si ala lingbi ti duti na amba ti ala gi na lengo songo.
Zo oko oko alingbi ti pika kate na ndo ti angangu so depa avunga, na sarango kangbi oko pepe wala na ndo ti tene ti mara, wala ti nzoroko ti tere wala ti ndia wala ti koli na wali ti yanga kodoro wala ti mosoro, ti ndo ti dungo wala ti mara duti,
Na ndoni kue, alingbi ti sara mbeni kangbi oko pepe so alondo na ndo ti tene ti poroso wala ti ndia wala ti popokodoro, ti mbeni zo wala ti mbeni kodoro ni so alingbi ti duti lipanda wala na gbe le ti mbeni kodoro wala so ayeke na kpale ti segbia.
Zo kue ayeke na ngangu ti duti na fini ti lo, ti duti yamba na ti duti na mbeto ti wara sioni pepee.
Zo oko alingbi ti duti na gbe ti ngbaa pepee. Akanga lege biani na duti ti ngbaa nga na dengo buze ti kango zo na ngbaa.
Zo oko alingbi ti sara mba ti lo na pasi ti ponon wala na pasi ti finon pepee.
Zo kue ayeke na ngangu ti tene ndia abata lo na asioni lakue na ndo kue.
Azo kue alingbi tere na le ti ndia, nga ala yeke na ngangu lege oko na sarango kangbi oko pepee. Amu na ala ngangu na sebatango tere lege oko, na tene ti kangbi ti mara so alingbi ti fingi depa so nga na tene ti gingo lege ti kangbi ti mara so.
Zo kue alingbi ti li ngbanga na adangbanga ti kodoro ti lo tongana azo akpe pepee angangu so sendia ti kodoro ti lo amu na lo.
Alingbi oko pepee ti gbu zo na kanga wala ti bata lo na kanga wala ti tokua zo yongoro na kodoro ti lo gi senge senge, tongana nda ni ayeke da pepee.
Zo kue ayeke na ngangu, lege oko na amba ti lo, ti tene ama polele tene ti yanga ti lo na le ti boro ngbanga so fade afa ande wala angangu wala akuandia ti lo wala tongana pango iri na tene so ali ngbanga da na ndo ti lo so ayeke mbirimbiri.
- 1. Zo kue so apa iri ti lo na ndo ti mbeni kpale angba mokondo asi na ngoi so afa na lege ti ndia atene lo sara sioni, na le ti mbeni ngbanga ti polele so awakoko kue adu da na peko ti lo.
- 2. Alingbi pepee ti kanga zo ndali ti aye so lo sara wala ti begirisa so, na ngoi so asi so, ndia ti kodoro wala ndia ti popokodoro afa ni tongana kpale pepee. Lege oko, alingbi ti diko pepee mbeni ponon so akono ahon ndo ti lo so ayeke de ka ni na ngoi so zo asara kpale so.
Alingbi oko pepee ti yoro tere na mbana na ya ti seduti ti zo wala ti sewa ti lo wala ti da ti lo wala ti diko mbetisu ti lo. Alingbi pepee ti buba iri ti zo nga na wungo ti iri ti lo. Zo kue ayeke na ngangu ti tene ndia abata lo ngbanga ti amara kpale tongaso.
Sura 13
- 1. Zo kue ayeke na ngangu ti fonon yamba na ya ti kodorosese kue. Lo yeke nga na ngangu ti soro ndo ti duti ti lo na ya ti mbeni kodorosese.
- 2. Zo kue ayeke na ngangu ti sigi na ya ti kodorosese kue ata adu kodoro ti lo, nga ti kiri na kodoro ni tongana so be ti lo aye.
- 1. Na ya ti ponon ti honga-ndo, amu lege na zo kue ti gi ndo ti duti da nga lo lingbi ti wara ni na kodoro wande.
- 2. Alingbi pepee ti mu ngangu so na wakpale ti fango zo wala na zo ti sarango aye so ague pepee na lege ti apo na akunibe ti bungbi ti bendo ti gigi.
- 1. Amu ngangu na zo kue ti tene lo du zo ti mbeni kodorosese.
- 2. Alingbi pepee ti gbanzi mbeni zo na mbana ti du wakodorosese nga na ngangu ti gbian kodorosese ti lo.
- 1. Asi na ngoi so ala lingbi ti mu tere, amu ngangu na koli na wali ti mu tere tongana koli na wali, si ala le sewa senge, tene ti mara wala ti kodorosese wala ti mabe alingbi ti kanga lege ni pepee. Na mbage ti mungo tere, amu ngangu, lege oko na koli na wali na ya ti dutingo ti ala nga na kangbingo ti ala.
- 2. Koli na wali alingbi ti mu tere gi tongana be ti ala use kue aye tene ni biani.
- 3. Sewa ayeke na gunda ti halezo. Ni laa, amu ngangu na letaa nga na azo kue ti tene ala bata ni ngangu.
- 1. Zo kue wala lo duti na bosongbi wala lo duti lo oko ayeke na ngangu ti wara akungba ti lo mveni.
- 2. Alingbi pepee ti mu akungba ti mbeni zo na ngangu na maboko ti lo.
Amu na zo kue zara ti bibe, ti boro-li na ti mabe ; ngangu so afa atene zo kue ayeke na zara ti gbian mabe ti lo, wala bibe ti lo nga na zara ti fa polele mabe ti lo, lo oko wala na ya ti mbeni bungbi, polele wala koiko, na lege ti fango mbeti, ti sarango ye, ti vorongo nzapa nga na sarango angobo.
Amu na zo kue ngangu ti zara ti bibe na ti sarango tene. So atene alingbi ti doroko zo pepee ndali ti abibe ti lo. Amu nga na zo kue ngangu ti gi, ti wara na ti vunga asango na akode na amara lege kue, na ziango be pepee na ndo ti tene ti ameka.
Sura 20
- 1. Amu na zo kue ngangu ti zara ti gbe lingo, ti li na ya ti bosongbi ti siriri.
- 2. Alingbi pepee ti gbu zo na ngangu ti li na ya ti mbeni bosongbi.
- 1. Amu na zo kue ngangu ti sara kua ti lengo kodoro ti lo, wala lo mveni wala na lege ti awasele so asoro ala yamba.
- 2. Amu na zo kue ngangu ti wara kua na ya ti ndokua ti letaa, lege oko na amba ti lo.
- 3. Kunibe ti halezo ayeke na gunda ti ngangu ti awalengo kodoro. Kunibe so alingbi ti fa gi na lege ti aboro soro so ayeke baa gigi ngoi na ngoi, na lege ti gbego mobimba nga na kobo soro wala na mbeni ngobo so amu ngangu ti zara ti soro.
Zo kue tongana waboso ti halezo ayeke na ngangu na kodekua ti batango tere. Alondo na abango nzoni na peko ti angangu ti mosoro, ti zangbingoro tere, ti ndara so ayeke kota ye ndali ti nengo tere na boro maingo ti setere ti lo; gi na lege ti gbungo mbirimbiri kua ti kodoro nga na ti tangbingo kua na akodoro wande so abaa dongongbi na mosoro ti kodoro oko oko.
- 1. Amu na zo kue ngangu ti sara kua, na zara ti sorongo kua ti be ti lo, na ya ti boro nga na nzoni gere ti kua. Alingbi nga ti bata zo ngbanga ti tene ti ponon ti sarango kua pepee.
- 2. Zo kue alingbi ti wara boro nginza ti kua so alingbi na kua so lo sara
- 3. Zo so asara kua alingbi ti wara boro nginza ti kua so alingbi ti tene lo na asewa ti lo aduti na ya ti nengo tere. Na ndoni kue, amu na lo anzina ngangu ti sebatango tere.
- 4. Zo kue awara ngangu ti kii na amba ti lo abungbi ti awakua, nga ti li bungbi na ambeni abungbi ti awakua ngbanga ti gbungo koko ti ala.
Amu na zo kue ngangu ti wotere ti lo, ti sara ngia nga. So atene alingbi ti de gi na lege ni lango kapa ti kua nga na alango ti wongo tere so afuta ni.
- 1. Zo kue alingbi ti wara nginza so alingbi na lo si lo le seni ti lo, nzoni duti ti lo nga na ti sewa ti lo biani na lege ti tengo kobe, yungo bongo, mungo yoro nga na zangbingo tere. Amu na lo ngangu ti baa nzoni na lege ti zangbingo tere na ngoi so lo du na kua pepee, wala na ngoi ti songo tere wala ngbanga ti zen, wala ngbanga ti ndu, ti kangba wala na ya ti ambeni ngoi so zo ni ayeke na mbeni lege ti batango na fini ti lo pepee, na peko ti ambeni siokpale so asi na lo.
- 2. Awali ti ngo na amolenge ti ala alingbi ti wara taa nzoni na kua ti zangbingo ndo. Amolenge kue, wala adu ala na ya ti mungo tere wala adu ala da pepee ayeke na ngangu na ni lege oko.
- 1. Amu na zo kue ngangu ti mandango mbeti. Ayeke futa mandango mbeti ni pepee, mbirimbiri na akete dambeti. Mandango kodeye na kodekua alingbi ti gbu ndo kue. Zo kue alingbi ti manda mbeti na kota dambeti, gi na lege ti kode ti lo na hingango ndo ti lo.
- 2. Fango mbeti alingbi ti gue na lege ti kono setere ti azo nga ti kono ndia ti batango nengo tere ti azo . Lo lingbi nga ti mu lege ti kpengba mango tere, vurungo be na songo na popo ti akodorosese ti amara wala amabe nde nde nga na maingo akua ti bungbi ti bendo ti gigi ngbanga ti bata siriri.
- 3. Awadungo molenge amveni alingbi ti soro yamba kode lege ti fango hingago ndo na amolenge ti ala.
- 1. Zo kue ayeke na ngangu ti le kua ti sendagao ti asongo ti lo, ti tene lo wara apendere ye ti kodoro ti lo na lo zia maboko na maingo ti asendaye nga na lo baa nzoni na peko ni.
- 2. Amu na zo oko oko ngangu ti sebatango anzoni ye ti lo so alingbi ti duti akungba wala abibe ti lo-mveni. Anzoni ye so alingbi ti londo na peko ti akodekua, asendaye, asendasu wala ti sendagao so lo mveni lo sara.
Ti tene azo akpe angangu so afa ge so, ayeke nzoni mbeni dongongbi adu da so alingbi ti bata ni. Dongongbi so alingbi ti duti na ya ti kodoro ni tongana na ya ti dunia mobimba.
- 1. Zo ayeke na ahonga na mbage ti boso so lo du da si lo mai da yamba . Ni laa si alingbi ti mu na lo lege ti tene setere ti lo amai nzoni biani.
- 2. Ndia alingbi ti le angangu ti batango nengo tere ti zo . Lo lingbi nga ti mu lege na zo oko oko ti kpe amba ti lo nga ti tene amba ti lo akpe lo.
- 3. Angangu so na azara so alingbi oko pepe ti fingi aweselo, apo, na gbegondia ti bungbi ti bendo ti gigi mobimba.
Mbeni kodorosese oko pepee wala mbeni zo ti gigi oko alingbi pepee ti buba lege ti andia so afa ge na ya ti mbeti-depa so.