Sos istudios de genere (in inglesu gender studies ) rapresentant un'acostamentu multidisciplinare e interdisciplinariu a s'istudiu de sos significados sotziu-culturales de sa sessualidade e de s' identidade de genere .

Naschidos in Nordamerica a caddu de sos annos setanta e otanta in s'ambitu de sos istudios culturales, si difundent in Europa Otzidentale in sos annos otanta. S'isvilupant partende dae unu tzerta currente de su pensamentu feminista e agatant ispuntos fundamentales in su post-istruturalismu e decostrutzionismu frantzesu (mescamente Michel Foucault e Jacques Derrida ), in sos istudios chi unint psicologia e limbagiu ( Jacques Lacan e, in una prospetiva postlacaniana, Julia Kristeva ). De importu dillindadu pro sos istudios de genere sunt fintzas sos istudios gay e lesbicos e su postmodernismu .

Custos istudios non costituint unu campu de s'ischire a sese, ma rapresentant in antis de totu una modalidade de interpretatzione. Sunt su resurtadu de una rugrada de metodologias diferentes chi abratzant diversos aspetos de sa vida umana, de sa produtzione de sas identidades e de su raportu intre individuu e sotziedade, intre individuu e cultura. Pro custu motivu una letura "gender sensitive", atenta a sos aspetos de genere, est aplicabile a belle calesisiat brancu de sas sientzias umanas, sotziales, psicologicas e literarias, de sa sotziologia a sas sientzias etno-antropologicas, a sa literadura, a sa filosofia, a sa teologia, a sa politica, a sa demografia etz.

Mescamente a sos iscumentzos, ma in parte fintzas oe in die, sos istudios de genere sunt caraterizados dae un'imprenta politica e emantzipativa. Sunt difatis in istrintamente connetidos a sa cunditzione feminile e a cussa de sugetos minoritarios. Non si limitant tando a proponnere teorias e las aplicare a s'analisi de sa cultura, ma mirant fintzas a realizare cambios in ambitu de sa mentalidade e de sa sotziedade. Sunt in manera istrinta ligados a sos movimentos de emantzipatzione feminile, omosessuale e de sas minorias etnicas e linguisticas e a s'ispissu s'ocupant de problematicas connetidas a opressione ratziale e etnica, isvilupu de sas sotziedades postcoloniales e globalizatzione .