Dae Wikipedia, s'entziclopedia libera.
Su
brincu de artaria
o
giampu de artaria
est un'ispetzialidade siat masculina siat femenina de s'atretismu.
S'obietivu est a subracolare cun unu brincu unu listone orizontale postu a un'artaria determinada. Su brincu podet esser realizadu cun cale si siat tenniga, bastughi s'ispicamentu dae su solu acontessat cun unu pee ebia.
In una cumpetidura, sa barra a sa prima est regulada a un'artaria relativamente bassa e est iscostiada chirru a susu cun incrementos de unos 3 o 5 chentimetros, peroe podent esser de 1 chentimetru pro sos tentativos de primadu. Onzi atreta tenet sa possibilidade de isseberare a cale artaria a cumintzare a brincare, peroe una bia chi s'artaria est istada brincada, sos ateros atretas no ant a poder cumintzare a un'artaria prus bassa.
S'atreta tenet unu minutu pro cumintzare su brincu dae su mamentu in ue est mutidu. A pustis de tres brincos nuddos cunsecutivos, s'atreta est eliminadu dae sa porfia. S'atreta chi brincat prus a susu est decraradu su binchidore. Si duos o prus atretas brincant sa matessi artaria massima, su cun su numeru prus bassu de tentativos nuddos (a cale si siat artaria) binchit. Si peri custu non si resessit a definire su binchidore, sunt realizados brincos annanghedores, sas artarias logradas in sos brincos narados abarrant balidas pro su chi pertocat sos primados mundiales e ateru.
Sa barra de su brincu de artaria est fata de prastiga afortida cun
bidru
o
alluminiu
. Ateros materiales sunt autorizados, peroe b'at limitaduras de pesu e curvadura. Sa barra est longa unos 4 metros (s'IAAF regulat sa longaria cun sa finalidade de primadu), cun una partzidura trasversale retunda, triangulare o cuadrada pro su prus de sa longaria sua e de duos puntos de arrimu cuadrados in sas istremidades. Est cullocada a un'artaria medida in duos suportes chi faghent in manera chi sa barra si cullochet in sas istremidades currespondedoras a s'artaria desizada.
Sas artarias brincadas sunt carculadas medende dae su puntu de decollu a s'oru superiore de sa parte prus bassa de sa barra. Deretamente in palas de sa barra, b'est una tramatza modde de gomma-ispuma chi permitit un'aterrazu seguru. Sos atretas devent brincare cun unu pee ebia pro subracolare sa barra. In tempus de su brincu podent tocare sa barra, peroe su brincu est nuddu si custa urtima ruet pro su tocu issoro. Si sunt dados casos raros in ue ant permitidu a s'atreta de repiter su tentativu, custu podet acontesser petzi si su zuighe decrarat chi sa barra nch'est ruta pro neghe de tzircustantzias isternas, comente su bentu. B'at bator partes de s'isecutadura: incannada, ispicamentu, bolu e aterrazu.
