Partido MAN
Imagen desea: Partido MAN
Historia
Fundashon	6 februari 1971
Informacion basico
Aktivo na	Korsou
Wepsait ofisial

Partido MAN , ofisialmente Movementu Alsa Nashon , ta un partido politiko na Korsou di signatura sosialdemokratiko. Originalmente M.A.N. tabata e abreviashon di Movementu Antia Nobo te ora ku e partido den su kongreso di 2005 a disidi di skrap e nomber kompleto i e puntonan a disparse. For di e tempu ei, MAN ta solamente un palabra. Desde 2021 partido MAN ta representa ku dos asiento den Parlamento di Korsou .

Historia [ edita | edita fuente ]

E partido a wordu funda riba 6 di februari 1971 . ^[1] Kofundado, prome presidente i lider di partido tabata Don Martina .

E partido a adopta un perfil sosialdemokratiko i asina a pone su mes den e spektrum politiko na banda robes di e partidonan bieu DP i NVP , pero tabata mas modera ku FOL . Na e elekshonnan pa e konseho insular di Korsou na 1971 e partido a gana un asiento, pero dos ana despues na e elekshonnan di Parlamento di Antias Hulandes e partido no a logra ningun asiento. P'esei na 1975 nan a disidi di uni ku e partido mas grandi FOL, pa asina, komo partido grandi di banda robes, purba kibra e poder di e partidonan bieu DP i NVP. Esaki a logra: e FOL a bira e partido mas grandi den e elekshonnan di konseho insular di 1975 ku 8 di e 21 asiento i Don Martina a bira diputado den e Kolegio Ehekutivo na nomber di MAN. Ademas, Wilson Godett por a tuma parti den e gobiernu antiano na nomber di FOL, despues ku e parti mas chikitu di PSD a bandona e koalishon. Sinembargo, dos ana despues na 1977, e kombinashon-FOL a logra solamente 3 di e 12 asiento di Korsou den parlamento di Antias Hulandes (mes tantu ku FOL a logra den 1973 so), loke a pone ku FOL no a drenta e gobiernu antiano i a pone ku e koalishon na nivel insular a ser detona dor di NVP. Seguidamente FOL tambe a anula su kooperashon ku MAN.