E articulo aki ta uza ortografia di Papiamento . Lo aprecia si por mantene e articulo aki na estilo di Papiamento .

Gobernador di Aruba

Pais	Hulanda
Hurisdikshon	Aruba
Wepsait ofisial	https://www.gouverneuraruba.com/ , https://www.gobernadoraruba.com/

E Gobernador di Aruba ta e representante di e hefe di estado di Reino na Aruba ; esaki ta conforme stipulacion den Constitucion di Aruba ( Staatsregeling van Aruba ). ^[1] E posicion a keda institui desde prome di januari 1986 ora Aruba a haya su status como pais autonomo dentro di Reino Hulandes . E monarka di Reino Hulandes ta nombra e gobernador pa un termino di seis ana; esaki por wordo prolonga te maximalmente 12 ana.

Facultadnan di gobernador [ edita | edita fuente ]

Facultadnan di e Gobernador di Aruba ta subdividi den e facultadnan asigna na su persona mediante ley como organo di e Reino y como organo di e pais Aruba.

E Gobernador ta representa e gobierno di Reino. Como organo di Reino e ta cuida interes general di Reino, e ta encarga cu implementacion di leynan cu ta conta pa henter Reino (Leynan di Reino), decretonan real administrativo y tratadonan internacional y e ta eherce vigilancia riba cumplimento di esakinan. Ciudadanonan ta hana nan ta trata den e cuadro aki principalmente cu e implementacion di e Ley di Paspoort door di e gobernador (dunamento di documentonan di viahe y visa) y e implementacion di e Ley di Reino riba nacionalidad Hulandes (naturalisacion y opcion).

E gobernador ta representa tambe e Rey na Aruba y esaki ta haci'e hefe di e gobierno di Aruba. E Gobernador ta gosa di inmunidad y ta eherce su facultadnan bou e responsabilidad di e ministernan, kendenan na nan turno mester duna cuenta na Parlamento .

E Gobernador ta representa e Rey den caso di entrega di condecoracionnan real y e inauguracion di Parlamento. E ta responsabel pa e formacion di un gabinete, ta ratifica Ordenansanan di Estado y Decretonan di Estado y ta responsabel pa e nombramento, huramentacion y retiro di algun alto dignatarionan manera minister, miembronan di Ministerio Publico y e Procurador General. Tambe, como hefe di estado, e Gobernador por concede pordon total of parcial di un pena of conmuta esaki y e por duna permiso na avion y embarcacionnan militar di un potencia stranhero para drenta espacio aereo of awanan teritorial di Aruba.

Lista di gobernador [ edita | edita fuente ]

N.º	Imagen	Periodo	Gobernador di Aruba [2]	Nombracion desde
1		1986 - 1992	Felipe Tromp	1 di januari 1986
2		1992 - 2004	Olindo Koolman	29 di januari 1992; re-nombra na 1998
3		2004 - 2016	Fredis Refunjol	1 di mei 2004; re-nombra na 2010
4		2017 - presente	Alfonso Boekhoudt	1 di januari 2017