Di Wikipedia, e ensiklopedia liber
E artikulo aki ta skirbi na
papiamentu
. Lo ta apresia si por mantene e artikulo aki na estilo di
papiamentu
.
Daniel Robert Hodge
(☆
23 di oktober
1959
na
Korsou
) ta un bankero i politiko di
Korsou
. E tabata e
di tres prome minister di Korsou
(2012-2013).
Hodge a nase dia 23 di oktober 1959 na Korsou. E tabata alumno di
Maria Immaculata Lyceum
, unda el a gradua na 1978.
[1]
Despues di esaki el a bai Hulanda pa kontinua su estudio. Na 1984 el a pasa su examen di
bachelor
di ekonomia na
Universidat di Tilburg
. Tres ana despues, na 1987, el a optene su master den ekonomia na Universidat Erasmus na
Rotterdam
. Bek na Korsou, Hodge a kuminsa su karera na Kodela, unda e tabata un empleado di analisis finansiero i presupuesto.
[1]
Di 1989 te 1997 Hodge a traha pa
Maduro & Curiel's Bank N.V.
i despues a swich pa Giro Bank. E tabata konosi prinsipalmente komo direktor-general di PSB Bank, e eks-Postbank di
Antias Hulandes
, retirando na 2023. Na momentu ku el a asumi su funshon na 2002, el a risibi e enkargo pa realisa un 'turn around' na e banko publiko ku na e momentu ei tabata den nesesidat. Despues el a keda enkarga ku supervisa e independensia di e banko i e ekspansion di Postspaarbank te na un banko general kompleto.
[1]
Nomina pa partido
Pueblo Soberano
Hodge a wordu aserka na desember 2012 pa dirigi un gobiernu di transishon pa seis luna.
[1]
Esaki tabata pa duna
Helmin Wiels
, ganado di e elekshon di
19 di oktober
2012
, tempu pa negosha un futuro gobiernu. E gabinete apolitiko, konsistiendo di ekspertonan ku e meta pa sanea finanzas di Korsou
[2]
, a ser forma dor di abogado Glenn Camelia.
Hodge a huramenta dia 31 di desember 2012 i a keda den funshon te 7 di yuni 2013. E tabata susesor di
Stanley Betrian
komo prome minister i tambe tabata minister di Hustisia. E situashon finansiero di e pais, ku a sali for di man bou di gabinete
Schotte
, a kondusi na un instrukshon for di
Den Haag
i na tumamentu di medidanan drastiko dor di gabinete Hodge. Por ehempel, a subi e impuesto riba produkto di nesesidat diario di 6 pa 9% i a subi e edat di penshun di 60 pa 65 ana.
[3]
Dia 25 di yuni 2013 Hodge a keda skohe komo e lider nobo di
PAR
, remplasando
Emily de Jongh-Elhage
. Tres luna despues e ta entrega su retiro di politika, komo e funshon no por wordu kombina ku su trabou komo direktor di PSB Bank.
[4]
El a okupa ademas varios otro funshon di dirigente. Komo representante di sektor bankario e tabata miembro di direktiva di Vereniging Bedrijfsleven Curacao (VBC) (1999-2001, 2017-2019). Na 2015 e tabata presidente di Curacao Bankers Association (CBA). Na 2020 el a wordu nombra director di VBC, ku e enkargo pa restruktura e organisashon representativo di gremio empresarial. Na 2021 el a keda elegi komo su presidente. Desde 2022 e ta miembro interino di SER Korsou, representando e gremio di dunador di trabou.
Sinembargo, su nominashon dor di
CBCS
pa e bira miembro di su hunta di komisario a wordu revoka na mei 2024 despues ku hues a sentensia Hodge pa paga PSB Bank un suma konsiderabel bek. Kontra e sentensia aki Hodge a bai den apelashon.
[5]
