Pels articles omonims, vejatz Nucleu (omonimia) .

Lo nucleu qu'ei un organet cellular especific de las cellulas eucariotas (e qui las defineish literaument). Qu'ei lo loc on ei concentrat lo cabau genetic de la cellula conservat dens la macromolecula d' ADN (a maugrat, totun, que dus autes organets cellulars, las mitocondrias e los cloroplasts que contienen ua quantitat marginau d'ADN). Dens lo nucleu, l'ADN qu'ei repartit en cromosomas dens los quaus, enrotlat autorn de proteinas, e forma la cromatina . Lo nucleu que dessepara lo liquid de la cellula, lo citoplasma , e lo son mitan interior dab ua dobla envolopa lipidica aperada membrana nucleara (o envolopa nucleara) horadada de traucs formats per un complexe de proteics aperats pors . Aquesta membrana qu'ei en continuitat dab la membrana deu reticulum endoplasmic . Com l'ADN be demora dehens lo nucleu, la soa informacion genetica qu'ei copiada e transcrivuda au mejan de la sintesi d'ua molecula aperada acid ribonucleic messatger (abreviat ARNm) qui ei exportat dens lo citoplasma (com sn nomac ditz, que serveish de "messatger") on la soa informacion qu'ei arrevirada en proteinas. Au dehens deu nucleu que's poden observar un o plusors punts aperats nucleols e qui son entornejats d'un liquid mei dense e escur que la resta deu mitan interior deu nucleu aperat nucleoplasma . Qu'ei lo loc on son sintetizats los ARNr (abreviacion d' acid ribonucleic ribosomic ). Aqueths ARNr que son importats dens lo citoplasma, on, associats dab proteinas, e forman las sosunitats deu ribosomas (qui son los organets on los ARNm e son lejuts e arrevirats en proteinas. Lo nucleu qu'ei tanben lo loc de reproduccion de l'ADN. Durant los proces de division cellulara (la mitosi e la meiosi ), qui la cromatina que pren la forma de cromosomas compactes e visibles e isolables, lo nucleu que desapareish en tot deishar los cromosomas muda's.