Band Simaenaria no sambua gangowuloa band ^[1] nifasindro ba Lahewa me 1972. Band andre goi no band sifofona sibai ba Dano Niha sangoguna'o fakake musik nifotoi elektronik . ^[2] Gitar khonia tenga gitar sito'olo, bahiza gitar sangoguna'o listrik ena'o terongo linia. Baero da'o Band Simaenaria no goi band sifofona sibai mamazaewe zinuno khora faoma kaset , si tola lafoli ba nomo khora niha ero zamosana na so khora wakake nifotoi tape recorder . Ngawalo zinuno ni'anunoisira no moroi ba gumbu si fabo'o-bo'o. So osa nihalora moroi ba zinuno si no to'olo la'anunoisi niha ba mbanu-banua misa, so nihalora moroi ba band nasional (simane Koes Plus , Panbers ) ba internasional (simane Beatles ba CCR ) (hato lafazokhi doinia ba li Niha ), ba so goi zinuno nifazokhira samosa molo'o lala wanuno ( gaya ) ndra band nasional ba internasional andro. ^[3]

Toi Simaenaria [ bulo'o | bulo’o kode ]

Lahalo doi simaenaria moroi ba doi maena ba ngawalo zinuno same'e muhi'a dodo nifotoi ceria ba li Indonesia. Moroi ba da'o lafasahe ia tobali Simaenaria .

Sifao awo [ bulo'o | bulo’o kode ]

Band Simaenaria tola mufasindro boro Martin Zebua (toi fogaoni khonia Gadi'u ) ba Asadin Bu'ulolo , si so nekhe-nekhe wanuno sitedou sibai. Ba aefa da'o so P. Adelhem Sturm , samosa pastor Katolik , sondronia'o band andre. Meluo da'o mohalo?o P. Adelhem Sturm tobali misionaris ba Lahewa . Me i'ila wa'onekhe-nekhe sibai ndra Martin awo Asadin, i'osindruhugo todo wangalui lala ba wanga'asogo fakake band . Boro me so khai-khainia ba zahakho todo ba Jerman , tola te'a'asogo band elektronik sifofona sibai ba Dano Niha . Boro ia goi tola lafazokhi kaset , irege tola oya ba alio tefazaewe zinuno khora ba zi sagoro Tano Niha . I'anema'o ba ginoto da'o goi teborotaigo tohare tape recorder ba Dano Niha .

Ya'ira sifao awo bakha ba Band Simaenaria (1972-1976) andre ya'ia: ^[4]

• Martin (Gadi'u) Zebua ( sondronia'o zanuno )
• Asadin Bu'ulolo (gitar, kibord, sanuno)
• Teos Zebua (sanuno)
• Trisman Zendrato (sondronia'o gitar, 1972-1973)
• Winay (sondronia'o gitar, 1974-1976)
• Robert Tan (gitar/sanuno)
• Yusuf/Hiap (gitar/sanuno, 1973-1974)
• Ui (bas, 1972-1974)
• Kiat (bas, 1974-1976)
• Frans (drum)

Sinuno si tehongo [ bulo'o | bulo’o kode ]

Ba mborota gofano?ara la'anunoisi ngawalo zinuno pop nasional si tehongo ba ndrofia si-70 simane Koes Plus ba Panbers , nibe'era toi ba li Niha . Bahiza lo ara aefa da'o laborotaigo wo'anunoisi zinuno pop internasional simane sinuno ndra CCR ba Beatles . Tatu mano so ba gotalua zinunora goi ngawalo zinuno si no to'olo la'ila niha ba mbanu-banua misa (nifotoi lagu rakyat ). Goto we'aso grup band andre, no lafazokhi 3 kaset , i'otarai 1972 me musindro ira irugi me laboholi ia me 1976.

Bahiza tenga ha famazokhi kaset nifaluara. Asese moi ira goi manoro ba wanuno (nifotoi tur ) simane ba Gunungsitoli ba ba Pulau Tello. Tenga na'i ha ba Dano Niha . No goi moi ira manoro manuno ba hulo Sumatera (ba Sibolga awo ba Samosir ).

Sinuno fondrege tehongo ni'anunoisira:

• Mefona Me Ide-Idedo
• Hadia Guna Gana'a
• Sogai Gito
• Bululehu
• Bute Gasagore
• Tenga Boro Sa Ndra'aga
• Ba Nakhi
• Toto Sowoho
• Hewisa (Asadin Bu'ulolo)
• No Abu Sibai Dodogu (Asadin Bu'ulolo)
• Maena Lahewa 1975

Tola ta?a'o wa fefu niha sibohou'ebua me ndrofia si-70 si lo tola lo'o la'ia la'anunoisi zinuno Mefona Me Ide-idedo . Tola mufondrondrongo fefu zinuno andre ya?a ba YouTube . Faigi khaikhainia tou ba khaikhai baero.

Bahiza oroma goi moroi ba gangolifa zinuno si tehongo andro ya?a, wa so goi zinuno asli nifazokhira, tenga ha sinuno niwowoli simane Mefona Me Ide-Idedo nihalo moroi ba zinuno pop internasional. Sinuno Sogai Gito andro duma-dumania no sambua zinuno si sokhi sibai manutuno lala wa'auri ndra sogai gito mefona ba Dano Niha . Simano goi zinuno Bululehu, sanutuno wa'auri ndraono si lo ama si lo ina.

Bakha ba zinuno Tenga Boro Sa Ndra'aga latutuno zalua khora ya'ira soloyo ba we'amoi ba wekoli ba ba zinuno Toto Sowoho latutuno zanandrosa ba wamaisa toto ba fasa Lahewa .

Afuriatania [ bulo'o | bulo’o kode ]

Alimago lo ara so band andre. Me 1976 labatogo halo?ora. Bahiza gasa-gasa da'o no so mato ha'uga grup musik tano bo'o sanohugo wamazokhi zinuno pop ba Dano Niha .

Faigi goi [ bulo'o | bulo’o kode ]

• Sinuno Pop ba Turia Somusododo
• Sinuno Nias ba Inkulturasi Gereja
• Mardiana ba Fa'amuzaewe Zinuno Pop ba Dano Niha
• Mefona Me Ide-idedo
• Bate'e Brothers
• Potret Musisi Nias: Yas Harefa
• Potret Musisi Nias: Man Harefa
• Potret Musisi Nias: Havino S. Duha

Baso?a [ bulo'o | bulo’o kode ]

• Band Simaenaria Lahewa , blog Klaus Sturm , mufaigi me 13/05/2024.
• Lagu-Lagu Nostalgia di YouTube , blog Klaus Sturm , mufaigi me 13/05/2024.

Khai-khai baero [ bulo'o | bulo’o kode ]

• Sinuno Band Simaenaria (YouTube)
• Sinuno Pop Nias Satua (YouTube)

Umbu [ bulo'o | bulo’o kode ]

1. ↑ Lafotoi band sambua gangowuloa niha sanuno sangoguna'o fakake zinuno simane gitar , kibord ba drum (faigi gambara ba nga'oro andre).
2. ↑ Lafotoi elektronik sambua wakake na silotolalo'o moguna listrik ena'o tola moli ia. Duma-dumania lo tola moli gitar elektronik na lo lafakhai ia ba listrik.
3. ↑ Klaus Sturm , Band Simaenaria Lahewa , blog, mufaigi me 13/04/2024.
4. ↑ Klaus Sturm , Band Simaenaria Lahewa Archived 2020-02-20 at the Wayback Machine .