Hans Koschnick

Hans Koschnick (* 2. April 1929 in Bremen ; † 21. April 2016 ok dor) weer en duutschen Politiker vun de SPD un ehmaligen Bremer Borgermeester . Vun 1987 bit 1994 hoor he to den duutschen Bundsdag to.

Ollern [ annern | Bornkood annern ]

Koschnick sien Vadder is an’n 1. Mai 1933 achter Trallen sett wurrn, weil he bi de kommunistisch Gewerkschaft RGO mitmaakt hett. He harr dat Drepen to’n 1. Mai organiseert un en Reed holen. Dorum hefft se em veroordeelt vunwegen Hoochverrat. He moß in’n Knast, in’t Tuchthuus un in dat KZ Sachsenhausen . Eerst Enn 1938 is he wedder freekamen. 1943 hefft se em intagen to’n Kriegsdeenst unner Beding . 1944 is he umkamen in Finnland . Ok siene Mudder hett een Jahr in’t Lock seten, weil se mank verscheden Gruppen vun den Wedderstand Nahrichten hen un herbrocht harr. Faken hett se ehr Arbeitsstell verlaren vunwegen se bi de Duutsche Arbeitsfront (DAF) nich mitmaken woll un ok nich Heil Hitler seggen woll. Bi en Schausteller hett se amenn Slickersaken un Bontjen verkofft. Dut allens bedude, dat Koschnick siene Ollern de meiste Tiet nich tohuse weern, un dat he un siene Sustern un Broder bi de Grootollern upwussen sund.

Krieg [ annern | Bornkood annern ]

Nah de Middelschool hett Koschnick sik vun Januar 1945 af an utbillen laten to’n bovern Deenst in de Verwaltung. In’n Marz moß he noch to’n Arbeitsdeenst vun’t Riek ( RAD ) un to de Suldaten. De Briten hefft em fungen un nah Brussel brocht. Vun dor is he denn in’n September 1945 wedder nah Bremen kamen.

Bremen [ annern | Bornkood annern ]

Koschnick is in Bremen Baas vun de Afdelen Joogd, Familie, Sport bi den Senator for Soziale Saken wurrn. 1950 is he in de SPD intraden. Vun 1955 af an weer he in de Bremer Borgerschup . Vun 1951 bit 1954 weer he Bezirkssekretar vun de Gewerkschaft OTV un vun 1963 af an hett he bi’n Binnensenator arbeit. An’n 28. November 1967 is he an Willy Dehnkamp siene Stae traden un Prasident vun den Senat un Borgermeester vun Bremen wurrn. Dormit weer he de Baas vun de Regeren in dut Bundsland. Dat is he meist 18 Jahre lang bleben, bit up’n 18. September 1985 , as Klaus Wedemeier em up dussen Posten folgt is.

Duutschland [ annern | Bornkood annern ]

Vun 1970 bit 1991 weer Koschnick in den Vorstand vun de SPD in Duutschland mit bi. Vun 1975 bit 1979 weer he twete Vorsitter vun de SPD in Duutschland un de Partei ehr twete Mann achter Willy Brandt . Vun 1970 bit 1971 un denn nochmal vun 1981 bit 1982 weer he Prasident vun den Bundsraat in Duutschland. Vun 1987 bit 1994 hett he in’n duutschen Bundsdag seten un weer twete Vorsitter vun den Utschuss for Butenlandsche Saken.

Europa [ annern | Bornkood annern ]

Vun’n 23. Juli 1994 bit to’n 2. April 1996 weer Koschnick as Beupdragten vun de Europaasche Union in Mostar in Bosnien-Herzegowina . He harr de Upgaav, en Oog up dat Wedderupboon vun de Stadt to smieten. An’n 11. September 1994 is en Anslag up Koschnick unnernahmen wurrn, dorbi is sien Kontor in Dutt gahn, man he sums hett keen Schaden nahmen. An’n 7. Februar 1996 hett dat enen tweten Anslag geben, man ok dor is nix vun wurrn. An’n 26. Februar 1996 hett Koschnick vor den Raat vun de Butenministers vun de Europaasche Union Bott geben.

Koschnick weer verheiraat un harr enen Sohn. 2016 is he in’t Oller vun 87 Johren doodbleven.

Kiek ok bi [ annern | Bornkood annern ]

Borgermeesters vun de Free Hansestadt Bremen na den Tweeten Weltkrieg