A Midsummer Night’s Dream (plattduutsch so veel as: En Middsummernachts Droom ) is en Theaterstuck van William Shakespeare van 1595 of 1596 . Foorst afddruckt worr dat 1600 . Dat Stuck is bet huut en van Shakespeare sien meestspeelt Warken met manni Adaptschoonen. Binnen A Midsummer Night’s dream hett Shakespeare dree Ebenen metenanner verwoven. Dat Stuck is to glieke Tied ok een Speel met dat Speel.

Worum dat gait [ annern | Bornkood annern ]

Dat beginnt in Athen : Theseus schall gau Hippolyta frigen. Egeus hett sien Dochter Hermia na Demetrius hen beloovt. Na een ool Wett van Athen mag he de Broogam utsoken. Wenn de Dochter dat neet will, schall se doodbliven. Man Hermia is wat dull in Leevde met Lysander. Theseus meent, wenn Hermia de Demetrius neet frigen will, schall se in de Orden van Diana binnenpedden. Hermia un Lysander nait tosammen ut. Fudder gait dat in een toversch Holt met Maanschien un een Mass Elvenluud. Oberon hett Stried met sien Fru Titania. De hett sik een indisch Wesselkind utsocht. Met sien Deenstmann Puck will he Titania weer upp’n rechten Padd trugg wiesen. To glieke Tied sund sess Handwarksluud in’t Holt een lutt Theaterstuck Pyramus un Thisbe (na Ovid ) bi to proven. Middelwiel sund ook Demetrius un Helena in’t Holt lopen: Demetrius upp Sook na Hermia un Helena achter hum ran. Puck verwannelt Bottom in en Esel. Oberon seggt Puck, he schall en Toverblaam halen. Puck vertovert Lysander, dat he sik in Helena verkiekt. Oberon vertovert Demetrius, dat he sik ook in Helena verkiekt. Met de Toverblaam loppt Puck ook na Titania hen, de just bi to slapen is. He strakelt hor met de Blaam over de Ogen un seggt en Sprook: "What thou seest, when thou dost wake, do it for thy true love take". As Titania wack warrd, kummt hor just even Bottom as Esel inne Moot un se is strax in Leevde met hum. Wiel Titania de indischen Fent fri gifft, maakt Oberon de hele Toveri truggels. Denn gifft dat glieks dreemaal Bruutloop in Athen: Demetrius is nu in Leevde met Helena, Hermia draff Lysander, un Theseus gait Hippolyta frigen. De Handwerksluud kaamt upp de Hochtied un speelt Pyramus un Thisbe . An'n Slutt kummt noch eens Puck un bedankt sik bi de Tokiekers.

Personae [ annern | Bornkood annern ]

De Luud ut Athen:

• Theseus, Hartog van Athen
• Hippolyta, Koningsche van de Amazonen, beloovt met Theseus
• Egeus, Vadder van Hermia
• Hermia, in Leevde met Lysander
• Lysander, in Leevde met Hermia
• Helena, hett Demetrius leev
• Demetreus, schall Hermia frigen, man hett later Helena leev
• Philostrate, Meester van de Zeremonien an Theseus sien Hoff

Dat elvisch Folk:

• Oberon, Koning van de Elven
• Titania, Koningsche van de Elven
• Puck, ookso noomt Robin Goodfellow, Deenstmann van Oberon
• Een Koppel Elven, de Titania to Deenst sund

De Handwarksluud:

• Peter Quince, Timmermann
• Nick Bottom (de Naam beduut Bodden, man ok Koppke un Maars)
• Francis Flute
• Robin Starveling
• Tom Snout
• Snug

Adaptschoonen un Wirken [ annern | Bornkood annern ]

Van dat Stuck A Midsummer Night’s Dream finns veele Vertalen un Adaptschoonen. Daar gifft dat ook Musicals un Films (1999 van Michael Hoffmann) unner. Bekannt is Felix Mendelssohn sien Musik Ein Sommernachtstraum . In dat hochdutske Vertalen van August Schlegel heet Bottom Zettel. Daarvan inspereert is Arno Schmidt sien Booknaam Zettels Traum . Upp Plattduutsch gifft dat een Adaptschoon van Holger Jansen as Hoorspeel Mittsommernachtsdroomen . Een Middsummernachtsdroom was 1999 dat foorst Stuck van dat alternative Shakespeare-Theaterfestival (1999-2009) van de neddersassischen Kring JANUN e.V. .