Postmodernisme is ne stroyming in de filosofy , bouwkunst , kunst un skryverye . Et voarnaamste idee der van is dat der ginne vaste warheid of warkelike autenticiteit besteyt un dus ouk gin good of faute in stylkoases. Darmed trekket postmodernisten ideen uut de Verlichting in twyfel. Se mut niks hebben van de 'groute verhalen' van de moderne tyd, wilt niks weaten van ne vaste unumstoatelike kennis, regels un beduding voar ydereyne (et is ja mar net wo as y et bekyket en wat uwen achtergrund is), un wyst der up dat politiken macht afhangt van et doardrukken van gedachtengood. In et postmodernisme wordt emeynd dat der ginne vaste warkelikheid is, want der valt neet na to gan of ydereyne et up deselvde wyse beleavt.

Et wordt seen as ne voordsetting of 'logisk antwoord' up et modernisme .

Umdat et vaste waerden verwarpet, is postmodernisme to herkennen an ideen dee as den bedenker alleyne by sikselv kan nagan, voal gebruuk van irony , spotdryven med groute ideen of vaste waerden un eklektik (en wild un willekoarig samenvogen van stylen un ideen).

Wat lude hebbet wat teagen postmodernisme, umdat se meynet dat et niks bydragt umdat et weatenskoppelike bewysen un vastigheid in de wearld betwyfelt. As nen weatenskopper wat war enommen hevt, kan nen postmodernist seggen: wo weat y sou vaste dat ik et neet anders sol bekyken?

Voarbealden van postmodernisme [ bewark | bronkode bewarken ]

Eynen postmodernen skryver was Brian O'Nolan uut Yrland . Syne boker trekket sik niks an van ideen oaver wat skryven sol mutten weasen. Et book 'An Beal Bocht' ( Et Arme Kueren ) is eyne groute parody up eyrdere yrske skryvers dee de yren altyd eynsydig typeerden. Hee nemt bepalde typiske beskryvingen un maket se letterlik. In voale literare warken wordt esegd dat "echten yrsken jungens upgroiden doar in de aske to krupen" (med andere woorde: buten in den drek spollen un de bukse good swart krygen). In syn book lot nen olden kearl synen kleinsoane letterlik doar de aske krupen.