Quest articol chi l'e scrivuu in lombard , grafia milanesa .

La radiazion solar a l’e la radiazion elettromagnetica mandada foeura del sol .

La radiazion emisa del sol [ Modifega | modifica 'l sorgent ]

El spettro de la radiazion solar a l’e pressappoch quell d’on corp negher che ‘l gh’ha ‘na temperadura de 5700 °C ch’a l’e la temperadura de la fotosfera (el strat defoeura de sol ). A l’e divis soratutt infra i radiazion del visibel , de l’ infraross e de l’ ultraviolett . La soa freguenza pussee forta a l’e la longhezza d’onda de 0,47μm piazzada infra quella di color giald e verd in del spettro visibel , inveci el so valor median a l’e 0,7μm ^[1] El spettro de la radiazion del sol a l’e per el 99% spantegaa infra i longhezz d’onda de 0,15μm e 4μm. ^[2] La part del spettro ind la banda ultravioletta la ven spartida in UVA, UVB e UVC. I ragg UVC gh’hann pussee energia e fann pussee dagn ai organismi vivent de gia che i ond pussee curt hinn pussee energetich. La radiazion ultravioletta l’e doma el 1% de l’energia total de la radiazion solar. I UVB e i UVC hinn anca ciamaa “ultraviolett dur”. ^{[3] [4]}

> ^[4]

Per savenn pussee, varda l'articol Irradiazion#Corp negher .

I interazion con l'atmosfera e la radiazion che la raggiong la Terra [ Modifega | modifica 'l sorgent ]

De tutta l’energia emisa de la superfice solar doma mezz milardesim el ghe riva in su la Terra . ^[3] La quantita de energia solar perpendicolar che la raggiong l’ atmosfera terrestra a l’e ciamada costanta solar e la var 1365 W /m2 ‘me valor medi annual e la varia del +-3,5% a segonda di stagion per via de la diversa distanza infra el sol e la Terra ( afelio e perelio ^[5] ). Foeura de l’atmosfera el valor de la costanta solar a l’e distribuii per el 9,2% in del’ ultraviolett , el 42,4% ind la radiazion visibel e ‘l 48,45% in del’ infraross . ^[1]

I interazion de la radiazion solar con l'atmosfera terrestra [ Modifega | modifica 'l sorgent ]

La radazion solar che l’interagiss con l’ atmosfera terrestra la subiss i fenomen de assorbiment e diffusion ottica ma minga doma ind l’istessa manera per tucc i freguenz. La diffusion, che la ghe va adree ai leg del Mie e del Rayleigh , l’e subida soratutt di ragg che gh’hann la longhezza d’onda pussee piscinina che, in del noster caso, hinn i ragg ultraviolett e i UVC pussee che i UVA e i UVB. In del visibel i freguenz pussee spanduu hinn quej del bloeu e questa chi l'e la reson perche el ciel l'e bloeu . L’ assorbiment inveci el dipend di gas de l’atmosfera, ciaschedun di quaj el surbiss in di so freguenz. L’assorbiment el succed in del’ infraross per via del vapor de acqua ma anca in del’ ultraviolett per di alter gas, inveci aquas nagott in del spettro visibel . ^[6]

La radiazion sola che la riva gio al soeul [ Modifega | modifica 'l sorgent ]

De tutta l’energia che la riva gio del sol ( costanta solar che insegnom con E) quand che l’intraversa l’ atmosfera terrestra ona soa part (D) la ven spanduda segond i legg de la diffusion ottica ( leg del Mie e leg del Rayleigh ) oppur surbida per via di reazion fotochimegh (A) oppur reflettuda di nivol (Rn). La radiazion che la riva gio al soeul (GT), ciamada radiazion solar global l’e dada de la soma de du contribuzion: ^[7]

• la radiazion diretta (I), o ben quella part de radiazion che l’e riessida a intraversa tutta l’atmosfera senza vess stada surbida o spanduda ;
• la part de radiazion spanduda che la va gio vers el soeul (H), H la gh’ha denter oltra la radiazion spanduda che la riva gio del sol anca quella spanduda dopo vess stada riflettuda de la superfice terrestra (R).

${\displaystyle G_{T}=H+I}$

Ovviament compu l'aria l’e nettada e secca compu la quantita de radiazion diretta la sara granda de manera che el rapport ${\displaystyle {\frac {H}{I+H}}}$ el po varia de 0,1 con aria secca e nettada a 0,7 con aria inquinada e umeda. ^[7] L'istess el succed s'a se va su in quota de gia che la diminuiss l'atmosfera che i ragg gh'hann de intraversa. ^[8]

Riflession del soeul [ Modifega | modifica 'l sorgent ]

Quand che la radiazion solar la riva gio al soeul ona part la ven riflettuda, la riflession l'e diversa segond i superfici e segond la longhezza d'onda de la radiazion. La frazion de radiazion riflettuda l'e ciamada albedo . ^[9]

La radiazion ultravioletta che la riva gio al soeul [ Modifega | modifica 'l sorgent ]

I freguenz de la radiazion che riven gio a terra dipenden di freguenz de assorbiment di gas de l’ atmosfera , de gia che ogni gas el surbiss soratutt di cert freguenz . A la fin i ragg ultraviolett che riven a Terra hinn faa su soratutt di ragg UVA, e men de UVB, inscambi tucc i UVC vegnen filtraa de l’ atmosfera terrestra . De sorapu i fattor che influenzen la quantitaa de radiazion UV che la riva gio al sol hinn:

• L’ ora del di : quand che ‘l sol a l’e pussee in alt in su l’orizzont i ragg gh’hann men tragitt de fa dent ind l’ atmosfera terrestra riven gio al soeul pussee fort, de sera i component a freguenza pussee alta compagn di ultraviolett , ma anca i color del visibel pussee arent al violett hinn filtra pussee questa chi a l'e anca la reson del fenomen del ross de sera .
• La stagion : per l’istessa reson come che ‘l sol a l’e pussee alt in del ciel d’ estaa che d’ inverna , d’ estaa i ragg UV riven gio al soeul pussee fort.
• Latitudin : per l’istessa reson come che ‘l sol al’e pussee de sora in sul l’orizzont a l’ equator che ai poli , in su l’quator i ragg UV riven pussee fort.
• Altezza sul livell del mar: s’a se va su in altezza el diminuiss el strat de atmosfera che gh’e de sora che ‘ l filtra i ragg del sol , de conseguenza a quot maggior la quantita de ragg UV che la riva gio la sara pussee.
• Riflession : i superfici del soeul rifletten la radiazion solar de manera che la vegna ricevuda minga doma la radiazion che la riva gio direttament dal sol ma anca quella che l’e stada riflettuda di superfici e i superfici ciar riflette pussee de quej scur. ^[6]

Influenza di eruzion di vulcan [ Modifega | modifica 'l sorgent ]

I eruzion di vulcan metten denter ind l' atmosfera terrestra on mucc de aerosol che 'l so effett principal a l'e quel de ferma la radiazion solar diretta vers el soeul , insci de sfreggi pussee l'atmosfera che gh'e de sota. I aerosol miss denter per via di eruzion vulcanich de diametro minor de 5 μm (de gia che i particol che se metten in mezz a disperd la radiazion in quej che gh'hann 'na longhezza d'onda compagna de le,e d'accord con la leg del Mie e la leg del Rayleigh ) hinn bonn de disperd la radiazion solar ma minga quella terrester che inveci l'indusariss l' effett serra . Per quej reson chi la temperadura , per via di eruzion vulcanich, la se sbassa. I vulcan pero metten denter ind l'atmosfera di solfaa ch'hinn bonn de trasforma i clorofluorocarburi in di sostanz anmo pussee bonn de destruga al strat de ozono (favorissen donca el bus del'ozono ). ^[10]

Per via de la formola chichinsci a l'e possibil valuta la riduzion de l'intensita de la radiazion caosada di eruzion di vulcan : ^[11]

${\displaystyle I_{x}=I\cdot e^{-2n\pi r2x}}$

indoe:

I a l'e l'intensita de la radiazion incidenta innanz de la nivola vulcanica;

Ix a l'e l'intensita de la radiazion che la riva gio al soeul dopo de vegh intraversa la nivola vulcanica;

n a l'e el numer di particol per centimeter cubo de nivola;

r a l'e el ragg di particol in centimeter;

x a l'e el spessor de la nivola volcanica in centimeter.

Vos correlaa [ Modifega | modifica 'l sorgent ]

• Irradiazion
• Ond elettromagnetich
• Sol
• Radiazion terrestra
• Eliofanometer

Riferiment [ Modifega | modifica 'l sorgent ]

1. ↑ ^{1,0 1,1} Mario Giuliacci (2010). Manuale di meteorologia (in italian). Alpha Test, 118-119. ISBN 88-483-1168-7 .  
2. ↑ Mario Giuliacci (2010). Manuale di meteorologia (in italian). Alpha Test, 117. ISBN 88-483-1168-7 .  
3. ↑ ^{3,0 3,1} Mario Giuliacci (2010). Manuale di meteorologia (in italian). Alpha Test, 116. ISBN 88-483-1168-7 .  
4. ↑ ^{4,0 4,1} Mario Giuliacci (2010). Manuale di meteorologia (in italian). Alpha Test, 120. ISBN 88-483-1168-7 .  
5. ↑ Mario Giuliacci (2010). Manuale di meteorologia (in italian). Alpha Test, 127. ISBN 88-483-1168-7 .  
6. ↑ ^{6,0 6,1} Mario Giuliacci (2010). Manuale di meteorologia (in italian). Alpha Test, 121. ISBN 88-483-1168-7 .  
7. ↑ ^{7,0 7,1} Mario Giuliacci (2010). Manuale di meteorologia (in italian). Alpha Test, 123. ISBN 88-483-1168-7 .  
8. ↑ Mario Giuliacci (2010). Manuale di meteorologia (in italian). Alpha Test, 126. ISBN 88-483-1168-7 .  
9. ↑ Mario Giuliacci (2010). Manuale di meteorologia (in italian). Alpha Test, 127-128. ISBN 88-483-1168-7 .  
10. ↑ Mario Giuliacci (2010). Manuale di meteorologia (in italian). Alpha Test, 143. ISBN 88-483-1168-7 .  
11. ↑ Mario Giuliacci (2010). Manuale di meteorologia (in italian). Alpha Test, 144. ISBN 88-483-1168-7 .