Antogno Stradivaio o Stradeva ( Cremona 1644 - 1737) chitara.

Vitta [ modifica | modifica wikitesto ]

O nascette verso a fin do 1643 probabilmente inte 'n vilaggio rente Cremona . A Cremona o Stradivaio o gh'arivo figioame, e o fu alevo da-o Nicolla Amao, into laoeio do quæ l'e prezumibbile ch'o segge arestao aomanco fin a-o 1680. In quell'anno o l'acato 'na caza in ciacca San Domennego (ancœu ciacca Romma), e o ghe travagio fin a-a morte, avegnua o 18 dexembre 1737.

O Stradivaio o l'ebbe unze figgi, di quæ soltanto o Francesco (1° freva 1671-11 mazzo 1743) e l'Ommobon (14 novembre 1679-8 zugno 1742) seguin a profescion paterna, senca pero ecelle.

O Stradivaio o l'e l'arteffixe che pe genia intuito e apascionao fervo, sempre adescio inta ciu tarda veciaja asci, o l'ha saciuo porta a-o ciu ato grao de perfecion a chitaraja.

Fando tezoo de groioze tradicioin de doe scœue, a bresciana e a cremoneize, e vaindose do conseggio di violinisti contempoannei, o Stradivaio, into corso de otra 75 anni, o l'ha continoamente elaboao i princippi da proppia arte, co l'agiutto asci de 'n'ececiona senscibilitæ vixiva e de 'na ræa prontecca manoa. Tutti i elementi essenciæ inta construcion di strumenti a ærco son stæti ogetto de studdio da parte so, e inte ciaschedun o l'e ariescio a aferma a proppia personalitæ. Scina e parte segondaie e quelle interne han avuo da le de cue insollite; tanto che i so strumenti son arestæ, in ogni particola, modello insuperao. Solo o mannego e a cosci dita cadena han dovuo ese modificæ sucescivamente pe risponde a-e exigence da progredia tecnica violinistega e do corista ciu erto.

I varri elementi o Stradivaio o fuze da pœu inte 'na linnia squixiamente armonioza, e l'incessante perfecionamento estettico o l'equilibro sempre, pe instinto, co-e lezze acusteghe da chitaraja. Sci che da-i so strumenti, specce da-i violin e da-i violoncelli, sccioi 'na voxe de belecca incomparabbile, ch'a i reize i preferii da tutti i magioi concertisti. Meito de tanti coefixenti: dimenscioin generale, spessoi e convescitæ da taoa e do fondo, qualitæ do legno; ma sorvettutto meito da vernixe. Probabilmente a so vernixe a no diferiva, inta compoxicion, da quella dœuvia da-i atri chitaræ do tempo: de rexine deslengoæ inte l'œuio e unie a de sostance colorante. A particolaritæ a conscisteiva inta mainea de doza questi ingredienti, de manezali e de destendili insce-o strumento, in moddo da otegni 'na pasta leggia e transparente, da-o colorio doce e brilante. O tempo da pœu o g'ha steizo 'na patina, che indærno se cerchiæ inte 'n strumento apena construio. Comme l'e natura, a personalitæ do Stradivaio a se vegne mœuando a poco a poco. Ma saiæ erao atriboi senca distincion de virtu speciale a tutte i œuvie de 'n dæto periodo da so ativitæ.

O Stradivaio o comencava a construcion de 'n strumento fissandone i contorni esterni con di apoxiti stampi de legno, di quæ se n'e atrovao 19 exempræ. Pe o fondo, e fasce, o ricco, a tastea e o scagnetto o preferiva l'axeo, tagiao segondo a fibra o a connio: axeo indiggeno, de scarso valo, inti primmi e inti urtimi strumenti, axeo provegninte da-a Darmaccia o da-a Croaccia , de ottima qualitæ, inti strumenti megioi. Pe-o fondo di violoncelli o dœuviava de votte l' arboa o o tiggio . A toa invece a l'e invariabilmente d' abeto , de doi tocchi inti violin e inte viœue, de quattro inte certi violoncelli. E parte interne son de saxo .

Co l'anda di anni o l'amermo o spesso da toa e sorvetutto do fondo, sempre assotigiandoli, pero, ciu longo i bordi che 'nto mezo (fa eccecion arcune toe de spesso identico inte ogni ponto). A convescitæ asci a varria benben da 'n strumento a l'atro: scimmile daprimma a quella aduta da l'Amao, ciu tardi a l'aomenta conscidieivemente, senca pero mai ecede, e a torna a ascciattase inti urtimi strumenti. Repigiando un'antiga consuetuddine o Stradivaio, abiliscimo dizegnato, o l'orno o ricco, e fasce, a tastea e o cordia de quarche precioxi strumenti, comme quelli quintetti destinæ a-o Coximo de Meghi e a-o Feipo V, con di intarsci de moæperla, o d' avoio e ebbano o mastico neigro.

A-i so strumenti anteioi a-o 1690 l'e stæto dæto l'apellativo de amæzæ , perche inte quelli l'influenca do Nicolla Amao a se manifesta senscibiliscima, specce inte quelli datæ 1666-69. Tippico de quest'eppoca o violin Selliere . (I so megio strumenti fun battezæ da-i postei con di nommi proppi, soventi in omaggio a di cellebri strumentisti o colecionisti che ne fun tempoanniamente possessoi).

Into dexennio sucescivo, pu conservando o formao picin de l'Amao (longhecca da cascia armonnega: cm. 34,9-35,2) e o co giano da vernixe, o Stradivaio o da a-i proppi violin un aspetto ciu robusto. Otr'a co o construisce generalmente o fondo tutto de 'n tocco (mentre quelli de l'Amao son in doi) e o cerne l'axeo fra o legnamme ciu costozo importao da l'atra sponda de l'Adriattico. A questo periodo apartegne l' Hellier (1679), che pe-e dimenscioin asci (cm. 35,9) o marca un progresso a peto di strumenti precedenti, e o prezenta a caratteristega de ese intarsciao.

Ma soltanto doppo a morte de l'Amao (1684) o Stradivaio, no ciu ocupao a agiuta o vegio meistro, o pœu dedicase escluxivamente a-a construcion di proppi strumenti. A vernixe a l'assumme un ton ciu cado e a voxe a vegne ciu possente. Ormai padron assoluo into manezzo di utenscili, o Stradivaio o razonze za inte questi anni a 'a strazordenaia netixe de laoacion (o Spagnollo do 1687). Quarche strumenti do 1688 g'han i bordi do ricco tenti de neigro.

L'e pero into 1690 che se veifica un cangiamento decixivo inta producion do Stradivaio. Exempra perfetto de quest'anno o l'e o Toscan , a quæ belecca a l'e aresta inegoalia e a quæ voxe a l'e a un tempo schilente e tennia. Subindo in parte l'influenca do Mazin, o Stradivaio o crea un tipo de violin de gren dimenscioin, longo cm. 36,2. Epu e proporcioin son amieivemente conservæ, e certi de sti violin chie, da-o son pin, grave - sciben che meno lesto - en paragonabbili a tanti de quelli ch'o faia into periodo settecentesco.

Into 1698 o Stradivaio o repiggia o formao de l'Amao, co-o fondo in doi tocchi a venatua larga, e o comenca a da a-a vernixe 'na tenta cetron-sangoin. L'anno doppo o torna a-o tipo de violin alonghio, ma into 1700 o ghe renoncia definitivamente. Comenca cosci quello che o G. Hart ^[1] o l'ha definio "periodo d'oo" (1700-1725).

O primmo cao-lao in orde de tempo o l'e constituio da-o Betts , do 1704, da-i canti longhi e slancæ, e co-e effe ardiamente tagiæ.

Doppo quest'anno di princippi arestan squæxi inmutæ. Soltanto o formao o l'aquista magio compatecca. Da amia o deliciozo violin do 1708 custodio into conservatoio de Pariggi e o Viotti (1709), superbi sotta tutti i aspetti e da-o son nobiliscimo. E effe ghe son ciu averte, co-i pertuxi a forma de pei, o ricco o l'e ciu druo, a vernixe a l'e brillante comm'a foise ancon a-o stæto liqquido.

Inte sto periodo a longhecca a l'e porta a 36 cm., pu senca abandona o formao de 35,5.

Da-o 1710 a-o 1720 o Stradivaio o produxe o ciu gran nummero de violin, e tanti de questi s'elevan, pe-e so prerogative, a 'na celebritæ speciale. Do 1710 o l'e o Vieuxtemps ; do 1711 o Parker , d'aspetto imponente, vernixao con pasta tennia, perfetta; do 1713 o Boissier , apartegnuo a P. Sarasate, un di ciu belli segondo o Fetis ^[2] ; do 1714 o famozo Derfin ; do 1715 i trei strumenti apartegnui a J. Joachim e l' Alard , ch'o riunisce tutti i prexi dexidiabbili inte 'n violin; do 1716 o portentozo Mescia , de propietæ di fræ Hill, stupendamente conservao, e da-o quæ o Stradivaio o no se separo mai, o Cessol , ch'o sumeggia a-o Derfin , e o Meghi , custodio into muzeo do conservatoio de Firence, fræ binello do Mescia pe agilitæ de fatua; do 1717 o Sasserno , do 1718 o San Loenco , do 1719 o Lauterbach .

L'ezamme comparativo fra questi strumenti o riveliæ inta conformacion do ricco, inte l'ertixe de fasce, into spesso di bordi, into dizegno da fietœua, inte l'intaggio de effe , de legge diference, che dan a ciaschedun de questi un'inconfondibbile individoalitæ. Conscidiandoli into complesso, resata o fondo, squæxi sempre inte doi tocchi, d'axeo stupendo, a vernixe, de tenta variabbile fra o cetron e o brun-rossastro, con di riflesci d'ambra, e a voxe de ræa lestixe e intenscitæ.

Da-o 1720 a-o 1725 ancon no s'averte o peizo de l'etæ do vegio arteize, ni s'intravedde l'agiutto dætoghe probabilmente da-i figgi Francesco e Ommobon e da l'alevo Carlo Bergonco. Foscia liatri se limitavan a sboca o legno o a completa e parte acessoie. Se quarche particola o rivela meno precixon de travaggio e o legno e a vernixe son meno belli che inti strumenti precedenti, in compenso o modello o l'e magniffico e a voxe de certidun, pu essendo mordente e un poco metallica, a l'e straordinaia. A questo periodo apartegne o Rode (1722), o megio di strumenti decoræ, e ch'o s'arosa da questo tipo de voxe, o violin dœuviao da P. Sarasate (1724), da-o son trilante e perlao, e quello dœuviao da A. Wilhelmj (1725).

Doppo quest'anno o deschina dovuo a-a veciaja e l'agiutto di figgi e do Bergonco vegnan vixibbili. Pero fin a-o 1730 o Stradivaio o l'ariesce a produe ancon un certo nummero de strumenti de prexo ececiona, e soltanto inti urtimi anni o bordo e i canti s'apezantiscian, e effe no son ciu taggiæ con destrixe e a-a mæxima atecca, a fietatua a l'e un poco incerta, e o ricco, no perfettamente scimettrico, o se diæ cernuo fra quelli construii in zoventu e scartæ inte 'n primmo tempo. Do 1731 son i violin apartegnui a H. Heermann, a F. Habeneck, a E. Ysaye, e o Kreutzer . Un di urtimi strumenti o l'e o Muntz , do 1736.

O Stradivaio o construi asci, sporadicamente, arcune viœue; ma in quelle o no razonse sempre grande armonia fra e varrie parte. Specce o ricco o l'e de sollito troppo grosso, privo de graccia. Foscia ghe noxe' l'incertecca do formao. Da-o modello do 1672 (longo cm. 41,1) o passo de fæto a quello da gigantesca viœua "teno" conserva a Firence (longa ben 47,9), senca dane 'n ezempla inta mezua idea de centimmetri 42,5. Fra tutte e so viœue a megio a l'e conscidia a Macdonald do 1701. Assæ aprexa asci a l'e quella intarscia, l' Archinto (tutte doe do 1696), e quella do 1731, possedua da-o Paganin .

A so voxe a l'e brilante, scimmile a quella di violin construii da-o Stradivaio inti mæximi anni, ma relativamente debbole, specce in sce-e doe corde ciu grave, e priva do timbro luvvego ch'o distingoe e viœue do Gaspao da Salo, do Mazin e di Amæ.

L'abilitæ do Stradivaio a splende invece inte tutta a so grandecca inti violoncelli. Pe questi se ripete a parabbola za oserva pe-i violin. Pe de ciu, bazandose in sce-e transformacioin za misse in dœuvia da-i so predecessoi, e tegnindo conto de exigence da lettiatua ch'a l'andava nascendo, o Stradivaio o l'ha saciuo modifica gradoamente o modello longo 79,7 scin a zonze a quello de 75 centimetri, ch'o l'e arestao pægio inti seccoli. E o l'ha superao tutti i chitaræ, i ciu grendi asci, pe ardieca e nobiltæ de concecion. O so ciu antigo violoncello o l'e do 1667. Da-o 1680 a-o 1700 o ne construi circa trenta, tutti de gran formao. Pe desdiccia a ciu gran parte de quelli a fu da pœu reduta a de dimenscioin ciu picine, e n'aresto intatto che quello creao pe-o Coximo de Meghi (1690), l' Aylesford (1696) e quello za de propietæ do marcheize de Piccolellis.

Do 1700 son o Crestien , con vernixe superba, e o violoncello conservao inta Capella rea de Madrid, longo 76,9. L'anno seguente ricompa, co-o Servais , o gran formao de cm. 79,1, largo inta parte infeio cm. 47. Ma tutte e parte son mai ben proporcionæ, da falo pai snello. O legno, comme inti doi strumenti precedenti, o l'e stupendo. Probabilmente solo into 1707 o Stradivaio o zonse a-o nœuvo formao longo cm. 75,9-75, e o produsse 'na vintena de strumenti, da-o son schilente, magniffico in sce-e corde mezane asci. Inti ciu ariescii i bordi e a fiœua son legeriscimi, e o ricco e e effe tagiæ con gran seguecca. Celeberrimi o Duport (1711), de laoacion finiscima; o Batta (1714), de aspetto viri; o Piati (1720), perfettamente conservao, con vernixe rossa scua, l'unnico violoncello co-o mannego origina; o Romberg , con fondo e fasce d'arboa e fietatua soo che neigra; o Davidoff con vernixe de ton cado, rosso cetron. Into Chevillard do 1726 l'agiutto di allevi o l'e paleize, e inti strumenti construii inti anni 1730-1731 a man do Stradivaio a l'e zœumoæ squæxi do tutto assente.

Se calcola che, co-a rapiditæ ch'a gh'ea proppia, o Stradivaio o l'agge construio ciu che mille fra violin e viœue e aomanco 80 violoncelli, otr'a di ærchi, chitare, cittoe e strumenti de forma varria, tranne che di zonzoin. Tanti violin e violoncelli andon destruti inte vexende che turbon l'Œuropa inti seccoli XVIII e XIX, e tanti fun inremediabilmente deturpæ. Atoalmente se conosce circa 540 violin, 12 viœue e 50 violoncelli.

A famma do Stradivaio a comenco a difondise fito, se za into 1682 ghe fu comiscionao un quintetto completo (do quæ s'ignora a fin) da ofri a-o Giacomo II, re d'Inghiltæra. O brevetto de fornito relasciaoghe da l'arcivesco de Benevento into 1686, o muniffico premmio ofertoghe da-o ducca de Moddena e e nomioze ordinacioin che ghe vegniva da principi e personalitæ d'ogni categoria, dimostran inte quæ conscidiacion o foise tegnuo fin d'alloa. A so nommina in Itallia e in Spagna a superava zœumoæ quella do N. Amao e do Stainer. Quande dapœu, into 1782, o Viotti o fecce conosce i so violin a Pariggi e sucescivamente a Londra, in Franca e in Inghiltæra asci fun benben ricercæ. Cosci emigrava a poco a poco e ciu belle colecioin italiane. Atoalmente in Itallia no gh'e arestao che pochi strumenti do Stradivaio, otr'a-o violin, a viœua "teno" e o violoncello custodii into conservatoio de Firence.

Fra i alevi che o Fetis e o l'Hart han atribuio a-o Stradivaio, certi, comme o Goarne "do Gexo" e o Montagnana, descciæan inte proppie œuvie de tæ diference de concecion e de laoacion da-o prezunto meistro, che no se stenta a dimostra a so provenienca da di atre scœue. O Baistre asci o no fu alevo do Stradivaio, ma do Peo Goarne, e o Michelangeo Bergonco do proppio poæ Carlo. Quindi pochi arteffixi ebban pe meistro o Stradivaio: de seguo i so doi figgi e o Carlo Bergonco, che travagion delongo da-a rente a-o Stradivaio e ghe sucedettan into laoeio, e foscia o Lusciandro Gaggian, o Francesco Gobetto e o Loenco Guaagnin.

Notte [ modifica | modifica wikitesto ]

1. ↑ G. Hart, The violin, its famous makers and their imitators , Londra 1875
2. ↑ Francois-Joseph Fetis, Antoine Stradivari, luthier celebre , Pariggi, 1856.

Bibliografia [ modifica | modifica wikitesto ]

• ( IT ) Paolo Lombardini, Cenni sulla celebre scuola cremonese degli stromenti ad arco e sulla famiglia del sommo Antonio Stradivari , Cremonn-a , Tipografia Dalla Noce, 1872.
• ( EN ) August Riechers, The Violin and the Art of Its Construction: A Treatise on the Stradivarius Violin , Gottinga , Carl Spielmeyer's Nachfolger, 1895.
• ( DE ) C. Schultzer, Stradivaris Geheimnis , 1901.
• ( IT ) Michelangelo Abbado, Enciclopedia Italiana di scienze, lettere ed arti , Romma , Istituto Treccani, 1936 .
• ( IT ) Alfonso Mandelli, Nuove indagini su Antonio Stradivari , U. Hoepli, 1903.
• ( IT ) Angelo Berenzi, Vox clamantis pro Stradivario , in Rivista musicale italiana , vol. 2, 1908, p. 436.

Colegamenti esterni [ modifica | modifica wikitesto ]

• Wikimedia Commons a contegne di files in sce Antogno Stradivaio