Dit artikel is gesjreve (of begos) in 't Mofers . Laes hie wie v'r mit de versjillende saorte Limburgs omgaon.

'n Hel sjief , van 't Ingels : hard disk drive of HDD , is 'n vorm van extern onthaad , 'n lektromechanisch computerongerdeil worop gegaeves konne waere bewaardj. Mitte aangaeving "hel sjief" kan me de eigelike sjief meine worop inne vorm van magnetische polarisatie de gegaeves zeen gesjreve, meh meistes mentj me 't gans apparaat mit sjieve, laes- en sjriefkop en besturingslektronica, same inne behoezing. In IT-documentatie wuuertj de term "vaste sjief" gebroek, omdet de sjief vas inne computer wuuertj gemonteerdj. De gegaeves zeen permanent, in taengestelling toet 't vlochting Random-acces memory (RAM) en blieven ouch bewaardj wen de computer oet steitj. 'n Hel sjief is allewiel ummer verzeen van 'n besturingseinhed, de controller. Dit is 'n lektronische sjakeling die d'n toegank toete gegaeves oppe sjief regeltj.

Partitionering [ bewirk | bron bewerke ]

Hel sjieve konne waeren opgedeildj in mieerder partities. Daoveur konne diverse raejene zeen:

• Gegaeves wie documente konnen op daen waeg waere gesjeie van 't besturingssysteem, zodet 't besturingssysteem mekkeliker is te vervange zonger gegaevesverluus;
• Partities zeen meistes nuuedig veur mieeder besturingssystemen op ein hel sjieve te konnen installere;
• Partities zeen nuuedig es me mieeder bestandjssysteme, wie FAT en NTFS , naevenein wiltj gebroeke;
• Sommige fabrikantje gebroeken 'n herstelpartitie, zodet 't apparaat trogk te bringen is wie 't woort gekoch.

Diverse pergramme bestaon veur hel sjieve te partitionere. Bie 't partitionere konne de gegaeves oppe hel sjief verlaore gaon. Daoveur is 't hieel raodzaamp om veur me geitj partitionere iees 'ne back-up te make.

Fragmentatie [ bewirk | bron bewerke ]

Omdet bestenj meistes grotter zeen es 'ne sector enne vriej sectoren inne luip vanne gebroekstied verspredj komme te ligken euvere sjief zal fragmentatie optraeje. Bie fragmentatie zal e bestandj neet in aaneingeslaote sectore waeren opgeslage, meh verdeildj euvere vriej ruumdjes. Dit haet es gevolg det de leeskop dokker nao 'nen track of sector mot zeuken enne benuuedigdjen tied veur 't laezen en sjrieve toenump. Versjillige bestandjssysteme zeen mieer of juus minder geveulig veur fragmentatie.