Dit artikel is gesjreve (of begos) in 't Mestreechs . Laes hie wie v'r mit de versjillende saorte Limburgs omgaon.

'n Etniciteit of 'nen etnische grop is 'n gropering vaan minse die ziech met mekaar identificere op groond vaan gedeilde attributes die hun oondersjeit vaan aander groppe. Die attribute kinne gaon euver geliekenisse in traditie , aofkoms en veurgeslach , taol , historie , maotsjappij , cultuur , natie , relizjie of sociaol meneere vaan doen in e bepaold gebeed. Etniciteit weurt deks geliekgesteld aon 'n natie en e volk , veural binne 't nationalisme en daan in 't speciaol 't etnisch nationalisme . Etniciteit weurt evels meistes es los gezeen vaan ras , al hobbe de concepte vaol gemein.

Etniciteit weurt door sommege gezeen es get wat allein kin weure euvergedrage via erfenis . Aandere zien 't es 'n sociaol construk wat allein get meint umtot vaol lui d'r belaank aon hechte. Etnisch lidmaotsjap neig wel meistes nao 't idee vaan gedeild cultureel erfenis, mythes (veural mythes euver de origine vaan de grop), historie, heimat , taol of dialek , symbolische systeme zjus wie relizjie , mythologie en rituele , cuisine , kleierdrach , kuns of fysiek versjelle. Etnische groppe kinne 'n nauw of zjus breid spectrum vaan genetische gemeinsjap hantere; de interpretatie ligk groetdeils aon individue meh 't gief deks ouch 'n bepaolde gebrukeleke cultuur binne 'nen etnische grop um e bepaold spectrum te hantere. Zoe hobbe Jao vaan ajdsher 'n ing bezej vaan genetische gemeinsjap: traditioneel is iemes 'ne Juud es de mam Juudse is en aanders neet. Wijl Nederlanders en Duitsers 'n breier spectrum hantere, en Belzje nog wijer gaon door deks 't idee vaan 'n Belzje etniciteit te verworpe. In bekans alle gevalle spreke etnische groppe 'ne gezaomeleken taol of 'ne gezaomeleke grop aon taole. Jao zien dao-in 'n bekende oetzoondering en deile hun etniciteit door cultureel, relizjieus en genetisch verwantsjap mer kinne mekaar deks neet verstoon umtot zie aander mojerstaole hobbe.

In versjellende weitesjappe weurt etniciteit gezeen es 'n interessant oonderwerp. In de antropologie kiek me deks wie 'n bepaolde etniciteit es idee oontsteit en/of wat veur beteikenis weurt gegeve aon die etniciteit of aon etniciteit in 't algemein in 'n maotsjappij . Ouch in de sociologie en de polletieke weitesjappe oonderzeuk me etniciteite; veural wat veur rol etniciteite speult in de maotsjappij en hun invlooje op polletiek .

Wat me percies 'n etniciteit maak en wat neet blijf in eder geval reie veur discussie. Zoe deile Limborgers vaol dinger die 'nen etnische grop ouch kin deile (zoewie taol/dialek, historie, traditie en geografie), mer weure zie bekans noets gezeen es 'n etniciteit.