Dit artikel is gesjreve (of begos) in 't Sint-Joasters . Laes hie wie v'r mit de versjillende saorte Limburgs omgaon.

Buenos Aires ( Spaans veur "gooj lochte" of "gunstige winj") is de houfsjtad van Argentinie en ouch 't ikkenomisch en cultureel centrum van det landj. Mit 2,8 miljoen inweuners in 2001 is 't de grotste stad van 't landj. In de agglomeratie Groat-Buenos Aires, ligkendj aan de munjing van de Rio de la Plata (Spaans veur "reveer van 't zilver") woane mier es 12 miljoen luuj. Aangezeen Groat-Buenos Aires bao e derdje van de Argentiense bevolking hoesves euverhiersj 't mit zien ikkenomie de res van 't landj.

Buenos Aires ligk aan de zie en haet 'nen have. De stad wuertj aan de landjskantj gans omslaote door de pervincie Buenos Aires , mer maak zelf gein deil oet van die pervincie. Buenos Aires is e fidderaol distrik en veltj boete de pervinciaal indeiling van Argentinie.

Dankzie zien talloeaze winkels en boetieks, zien arsjitektuur, zie cultureel laeve, restaurants en zien kosmopolitische bevolking van euverwaegendj Italiaanse, Spaanse, Franse, Duutsje, Ingelse, Oas-Europese, Arabische en Aziatische aafkoms steit Buenos Aires ouch bekandj es 't Peries van 't zuje, allewel 't door vaol ikkenomische perbleme vaol van zien vreuger grandaor haet verlaore. De stad is ein vanne Europeeste van Zuud-Amerika en van 't gans zujelik halfrondj. Oatj kos ze mit haor naordelike taengespelers straeve. De stad belaefdje ziene goljen tied tosse 1880 en 1920, doe Argentinie toet de tien welvarendjste lenjer van de waereld behoort en Buenos Aires nuujkommers oet Europa lokdje die hie e baeter bestaon verzochte te vinje.