Dit artikel is gesjreve (of begos) in 't Mofers . Laes hie wie v'r mit de versjillende saorte Limburgs omgaon.

Brits-Columbia ( Ingels : British Columbia ) is 'n pervinsje ane westelike kus van Canada , mit 'n oppervlakdje van 944.735 km². De pervinsje haet zon 4,4 miljoen inwoonders. De houfstad is Victoria , meh de grotste stad en ouch 't ikkenomisch centrum is Vancouver , waat ouch de op twiee nao grotste stad van 't landj is.

Brits-Columbie ligk in 't weste van Canada; de uterste westelike grens wuuert gevormp dore Stillen Oceaan en in 't naordweste doren Amerikaanse staot Alaska . De naordelike grens is mit 't Canadees territorium Yukon enne Northwest Territories ; de oestelike mitte pervinsje Alberta . De zujelike grens is mitte Amerikaanse staote Washington , Idaho en Montana . Langs de westelike kus van Brits-Columbie ligke vaol fjorden en eilenj.

De houfstad Victoria ligk op 't zujelik puntj van 't grotste eilandj, Vancouvereilandj , en haet 330.700 inwoonders in 't stejjelik gebied. Vancouver haet zon 2,2 miljoen inwoonders en ligk inne zuudwesteliken hook vanne pervinsje. Anger groeate stej en dorper zeen Abbotsford (150.000 inwoonders) en Chilliwack (74.000) in 't zuudweste, Kelowna (148.000) en Kamloops (90.000) in 't zujelik binnelandj, Nanaimo (90.000) op 't Vancouvereilandj, en Prince George (83.000) in 't naorde.

De reveer de Fraser ontspringk inne pervinsje en haet hie ouch zien oetmunjing.