Dit artikel is gesjreve (of begos) in 't Mofers . Laes hie wie v'r mit de versjillende saorte Limburgs omgaon.

d'n Atmosfeer is 't totaal van de gase die zich om e bepaoldj, vas hieemellichaam bevinje. d'n Atmosfeer van de Aerd wuuertj ouch waal d'n aerdatmosfeer of dampkrink geneump. Ouch al anger planete van os zonnestelsel hobben 'nen atmosfeer.

De gase in d'n atmosfeer waeren aangetrog door 't zwaordjekrachsveldj van 't hieemellichaam en waere zoea vasgehaje. De lichter gase, wie waterstof, kinnen 'n snelheidsverdeiling hobbe die veur e deil groeater is es de ontsnappingssnelheid; dees gase zolle den lankzaam oet d'n atmosfeer verdwiene.

Aerdatmosfeer [ bewirk | bron bewerke ]

Ozen atmosfeer, dae dus ouch waal d'n dampkrink geneump wuuerdj, heltj de planeet op 'n confortabel temperatuur (zoeaget vieftieen graoj) doordet d'r de wormdje vanne Zon toet oppe grondj leet doordringen en 't veurkump det de oetgaondje wormdje nao de ruumdje ontsnap. 't Daeke van loch is hieel erg don vergeleke mit de Aerd. Dees leste haet namelik 'ne straol van rondje 6370 km, wie d'n atmosfeer "slechs" 1000 km diek is. d'n Dampkrink kin men in veer laogen opdeile: d'n troposfeer , de stratosfeer , de mesosfeer en d'n ionosfeer . 't Waer speeltj zich aaf in de laog dae 't korts bie de Aerd ligk: d'n troposfeer. De diekdje vannen troposfeer varieertj van tieen km ane poeale toet zestieen km inne gebiede rondjen aevenieer en is de wermste en vochtigste laog vannen dampkrink.