Andre Rieu

Dit artikel is gesjreve (of begos) in 't Mestreechs . Laes hie wie v'r mit de versjillende saorte Limburgs omgaon.

Andre Rieu ( Mestreech , 1 oktober 1949 ) is 'ne Limburgse violis en dirigent , dee bekind is gewore met salonmuziek en leechte klassieke muziek .

Andre Rieu, telg oet 'n femilie vaan muzikante, begos met vijf jaor viool te speule. Veural z'ne vaajer, 'ne dirigent, ancourazjeerde haom daobij. Vaan 1968 tot 1973 studeerde heer aon 't conservatorium , iers in Luuk , later in Mestreech, woe heer o.a. les kraog vaan Herman Krebbers . Daonao bezoch heer tot 1977 de Brosselse muziekacademie, boe heer de ierste pries in de wach sleipde.

Daonao begos heer 'n carrier in 't orkesweze, boe heer ziech, door 't Mestreechs Salonorkes op te riechte, al metein op 't leech rippertwaar riechde. Veural de wals intrigeerden 'm. Ouch trad 'r op es soloviolis bij 't Limburgs Symfonieorkes . In 1987 begos heer met zie Salonorkes (wat eigelek mer e klein ensemble waor) 'n ech orkes, 't Johann-Straussorkes .

Nao e paar jaor in relatief ros te hobbe gewerk braok heer in 1993 landelek en zelfs Europees door met de Twiede Wals oet de Jazz-suites vaan Dmitri Sjostakovistj , die 'ne top-40-hit woort. Heer toert sinsdeen euver de ganse wereld, met groete orkestraal shows en 'n rippertwaar vaan good verteerbaar klassieke muziek, salonmuziek, operette , popmuziek , volksmuziek en soundtracks . Heer wet daobij vaol publiek te trekke wat normaol neet nao klassieke muziekoetveuringe kump. Zien shows koste evels zoevaol geld tot heer vaan tied tot tied in financieel probleme zit. Ouch is zien populistische en commercieel marketing haom op groete kritiek vaan 't klassiek concertpubliek koume te stoon.

Oondanks zien frequinte toernees trejt 'r ouch nog deks in zien gebuurdestad of orges aanders in Nederlands Limburg op.

Rieu bespeult 'n Stradivarius oet 1667 .

Selectief discografie [ bewirk | bron bewerke ]

1995 - Strauß & Co
1996 - In Concert
1996 - Wiener Melange
1997 - Mein Weihnachtstraum
1998 - Romantic Moments
1999 - Das Jahrtausendfest
2000 - La Vie est Belle
2003 - Romantic Paradise

Externe link [ bewirk | bron bewerke ]