Dit artikel is gesjreve (of begos) in 't Mofers . Laes hie wie v'r mit de versjillende saorte Limburgs omgaon.

Waeve is 't verbinje van horizontaal en verticaal groepe textiel oet draoj . 't Is 'n hieel aaj techniek wo-op hieel vaol variante bestaon. De draoj womit textiel wuuertj gewaeve kinne van versjillendj materiaal zeen, wie:

• wol
• vlas
• ketoen
• zie

Veur 't waeve spantj me 'n aantal draoj parallel op. De constructie wo-op dit gebeurt het sjaere. De opgespanne draoj heite sjaering . Soms motte dees sjaeringdraoj (of kittingdraoj) geliemp (gestaerk) waere om miee waerstandj te hobbe taenge breuk tiedes 't waeve. Vervolges waere ein veur ein anger draoj haoks hie-op, tosse de sjaering door, in 't waefgetouw ingelag. Dees draoj heite inslaag . Dees draoj waere strang taengenein aangedrok.

Bie 'n weefgetouw kinne de draoj van de sjaering (of kitting) per groep waere opgepuf door sjech. Door in e bepaold patroean de draoj op te puffe, ontstaon ingewaeve patroeane, die hieel ingewikkeldj kinne zeen. Meistal waere de inslaagdraoj mit beholp van 'n sjeetspeulke in 't weefsel geweve. Dit sjeetspeulke is 'n sjuutvormig blokske wo-in 'n speulke mit draod, dae tiedes 't haen en weer bewaege wuuertj aafgewikkeldj.

Bie modernere waefmesjiender waere de inslaagdraoj ingebrach mit ofwaal starre steng (griepers geneump), mit e klein metaal projectiel (op Sulzer waefgetouwe) of de inslaagdraoj kinne ingebrach waere mit lochdruk en/of waterstraol. 't Saort waefgetouw en de gebroekdje techniek om de inslaagdraoj in te waeve waere meistal bepaald door 't saort weefsel det me wins te waeve. Veur tapiete en zwaore waefsele waere meistal griepers gebroek. Bie waefmesjiender die mit waterstraoltechniek wirke kin me meistal slechs mit synthetische gaores waeve.