Es hoofsjtad van de provincie Oas-Vlaandere haet Gent 'n belangrieke administratief functie. Op economisch gebied ies veural de have belangriek. De veurnaamste industrieje zint de sjtaol - en metaalverwerking en de productie van transportmieddele. De sjtad ies 'n importante onderwiessjtad met onder andere de Universiteit Gent . In totaal sjtudere d'r mie es 50.000 sjtudente aan de insjtellinge veur hoager onderwies. 't Universitair Hospitaal haet 'n belangrieke sjtreekfunctie.

Gent haet 'n historische binnesjtad met versjillende bezeenswaerdighede. 't Bekends zint de "drie tores van Gent", de Sint-Niklaaskerk, 't Belfort en de Sint-Baafskathedraal. In de Sint-Baafskathedraal bevink ziech 't waereldberoemp retabel 't Lam Gaods van Jan van Eyck . 't Gravensteen ies 'n mieddeliewse vesting met 'n grach d'rumheen, die aan 't ing van de 19e en 't begin van de 20e iew gerestaureerd woort. Langs de Graslei en de Korelei liegke 'n groat aantal gildhoezer.

Me wet dat de plaats woa allewiel Gent liek bewoond waor in d'n tied van de Kelte en de Romeine . De naam Gent zouw van 't Keltische woord ganda komme, dat samevleujing beteikent.

Vanaaf de 7e iew houw Gent twie belangrieke abdije, namelik de Sint-Pieters- en de Sint-Baafsabdij. Rond 800 moet de sjtad zoa belangriek zin gewaes dat Lodewiek de Vrome , de zoon van Sjarel de Groate , Einhard beneumde tot abt van dees abdije. Einhard waor de biograaf van Sjarel de Groate .

In de 13e iew waor Gent de groatste sjtad nao Paries boete Italie . De sjtad waor groater es Londe , Kolle en Moskou , bieveurbeeld.

Gent ies iewelank de belangriekste sjtad gewaes veur lake (gemaak van wol ), vlas (in de 19e iew sjtong hie de groatste vlasfabriek van Wes-Europa) en katoen .

In 1794 vereuverde de Franse onder Napoleon Bonaparte Vlaandere en dus ouch Gent. In 1815 woort de sjtad Nederlands , totdat Belsj in 1830 onaafhenkelik woort.

• Officieel site van de gemeinte